Read Yimchungru Naga Mika 4 Bible Online

Mika 4 - Yimchungru Naga bible

Mika 4

¹Arübe nimung ching ATUNGPUH yam wung ju müzüng bolung achangbe labah, tüsho awungbo kumung shuhkihbah. Mihtsürübonü ju kheak shobah,

²tüsho trükshih ahihdonü arübah tüsho athabah: “Arang, isanü ATUNGPUH müzüng, Jakob Thrünpuh yam ching wutuanü; junangde apinü isa ki api limrobo thsangyubah tüsho isanü api tsahpungbo ching tsahbah.” Tümüde Zion chingnü thsangdankhi, tüsho Jirusalem chingnü ATUNGPUH yu mikhuh ching yübah.

³Apinü mihtsürü ahihdo dükeak mahkhapbah, tüsho limshu ching sühmüh lakhi trükshihbo dükeak alim-amülim mokhitbah; arünü nukshangbonü thuwuhbo kingbah, tüsho arü thsühbonü hirhüpbe kingbah; trükshihnü trükshih azhihde nukshang mushuhkih, arünü kheaküa thirithsüpü mümükheahde alabah;

⁴tüshe arü alala arü nihbuh kurungaso tüsho khubasodung khüp binbah, tüsho shenü arü mütreshih; tümüde Wuto ATUNGPUH münnü asukdo.

⁵Mihtsürü alalanü nihbuh thrünpuh mung ching tsahchoh, tüshe isanü ATUNGPUH isa Thrünpuh mung ching lünnü lün tsahbah.

⁶ATUNGPUHNÜ thachoh, ju nimung ching inü jingkikrü bemukhungbah tüsho yanyuka bahrü tüsho inü thsümüchirü bemukhungbah.

⁷Inü jingkikrübo aninga larü kamshihbah, tüsho yanyuka bahrübo, sühmüh lakhi trükshih kamshihbah; tüsho ATUNGPUHNÜ Zion Müzüng ching arü kurungkheak kheakü tüsho lünnü kiulongthsübah.

⁸Tüsho nü, O namfimihnu aheangsadam, Zion wung, akhuhlim yakzan shuhkhi nü kheak arübah, Jirusalem kheak kiulongthsü arübah.

⁹Kheakü tümüde nünü achangnü zhicho! Nü lung kiulongthsürü müla de? Nü lümthiyan-jihrü dükheakbah aliberü thsünükhi nangde nü thsünüla de?

¹⁰O Zion mihtsürü, aliberü thsünüchoki nangde kolahang tüsho asheang; tümüde kheakü nü kiuto chingnü ayübah tüsho mükeak ching binkheambah; nü Babilon lim yübah. Ju ching nü bekhitbah, ju ching ATUNGPUHNÜ nü riribo khah chingnü nü rhokhitbah.

¹¹Kheakü trükshih ahihdo nü azhihde mukhungbah thachoh, “Anihbe müneanshang, tüsho isa mükbonü Zion kheak kheahshang.”

¹²Tüshe arünü ATUNGPUHNÜ lümkhi mümükheah; arünü apinü rhimopung ching hiphungbo nangde arü hanmukhungkhi api lümkhi thsükhi manikhit.

¹³Asürang tüsho nitang, O Zion mihtsürü, tümüde inü nü juh yinchi tüsho nü biuo müwayinchi kamshihbah; nünü mihtsürü ahihdo adütre kamde akingbah, tüsho arü yo ahühkhi lakhit ATUNGPUH kilim kingaün jihbah, arü lakhit alomi lüpdükhi Tungpuh kilim jihbah.