Read Yimchungru Naga Mika 5 Bible Online

Mika 5 - Yimchungru Naga bible

Mika 5

¹Jirusalem mihtsürü, nüsa thirithsürübo bemukhungang! Isa yandoa lah! Arünü Israel limberü müchip kheak tsonü rhapchoh.

²Tüshe nü, O Bethlehem Ephratha shepü Juda gukbo ching aninibe la, nü kheaknü I thsungkheak Israel ching yakzan shuhpü arübah, shepü ying awün chingnü, jipü nimungbo chingnü la.

³Jumonü thsünüde alakhi liberünü müzübeyi kim khiungde apinü arü bahyukbah; jushu aningkhi api keoniorü Israel mihtsürü kilim alode arübah.

⁴Api azhipbah tüsho A TU N GPU H sühmüh ching, api Thrünpuh ATUNGPUH wüntre-müretah mung ching api namfimihnubo yimkipbah. Tüsho arü tsokhita labah, tümüde kheakü alomi akheambo khiungde api ato labah;

⁵tüsho api ju mungtsü khülang labah. Mürangkhüh Asiriarü isa lomi ching azahsho tüsho isa lo kheak jungsho, isanü isa limberü sühmüh larü arü bede keochihshihpü yüshihbah.

⁶Arünü Asiria lomi nukshangnü, tüsho Nimrod lomi nukshang dukkhitbah yakzan shuhbah; mürangkhüh arünü isa lomi ching yungsho isa aredungyean ching thrümsho arünü Asiriarü kheaknü isa khümkhitbah.

⁷Judüki mihtsürü ahihdonü zündoa lakhi aningkhi, mihtsürü kheak mangükhi yungsho mihtsürü she maleangkhi Jakob ju ATUNGPUH kilimnü ayinke nangde, sangrung kheak tsüngbo nangde alabah.

⁸Tüsho trükshih bolung ching aningkhi Jakob, mihtsürü ahihdonü zündoa lakhi ju, mütüm shiwüh bolung kekhüzü khülang nangde, namfimihnu boto lung hode yüchoki junakkhi, abekhitrü she mülade adütre kamde thonakkhi kekhüzü nunu khülang nangde alabah.

⁹Nü azhihrü kheak nü khah shuhkihbah, tüsho nü riri alala dükheakshihbah.

¹⁰ATUNGPUHNÜ thachoh, ju nimung ching inü nüsa khorabo tüsho khora-lolungbebo nüsa bolungnü akheamshihbah;

¹¹tüsho nüsa lomi kiutobo dükheakshihbah tüsho nüsa chipibo thokheambah;

¹²tüsho inü nüsa khah chingnü wurük dükheakshihbah tüsho kuhi-kheahrü mülade alabah;

¹³tüsho inü nüsa bolungnü mejakbo tüsho dungjingbo dükheakshihbah, tüsho kheaküa nüsanü nüsa khah rhimo ki mukhukning;

¹⁴tüsho inü Ashera sangthsübo nüsa bolungnü arukkhitbah tüsho nüsa kiutobo thsümünimbah.

¹⁵Bukakhiukkhi tüsho mulong zhipzhip ching inü mihyumanikhi trükshihbo kheak royimbah.