Read Yimchungru Naga Mika 6 Bible Online

Mika 6 - Yimchungru Naga bible

Mika 6

¹ATUNGPUHNÜ tümü thachonü aniang: Asürang, nü lümkhi müzüngbo müngüh hande arang, tüsho awungbonü nü düsheak soshang.

²Nüsa müzüngbo, tüsho nüsa akheam mülakhi alomi khimtanbo, ATUNGPUHNÜ müdamkhi soang; tümüde ATUNGPUHNÜ api mihtsürü kheak müdampü lah, tüsho apinü Israel kheak müneahbah.

³“ O I mihtsürü, inü nüsa ki tümü rhimoa la? Tümü ching inü nüsa khishih-a la? I ki aloang!

⁴Tümüde inü nüsa Ijip lomi chingnü bekhit, tüsho azhorü yamkhün chingnü nüsa rhokhit; tüsho inü nüsa müngüh Mosa, Aron, tüsho Miriam yüshih.

⁵O I mihtsürü, Moab kiulongthsüpuh Balaknü tümü rük thsükheanü kheakü lümkhitang, Beor tsührü Balaamnü api ki tümü alokhea, tüsho Shittim chingnü Gilgal khiungde tümü dünjikhea, junangde nüsanü ATUNGPUH akhümkhit rhimobo mükheahbah.”

⁶“Tümü lubah inü ATUNGPUH miki arüba, tüsho achang kheak Thrünpuh miki khukningba? Inü kam khülang bankhi moshi nunubonü taka kingaünpü api miki lubah arüba shi?

⁷ATUNGPUHNÜ namfimihnupung chithürübo, müdangke ayung chithürübo kheak asühba de? Inü alakmihkhi thsungkheak I tsührü jihba shi, I me neak thsungkheaknü I pang chingnü asokhi jihba shi?”

⁸O mihtsürü tsührü, tümü atsüanü apinü nü ki huhdo; tüsho ATUNGPUHNÜ nüsa kheaknü alunekhi ju thiyuro, tüsho mihmüthsüm muzhopü, tüsho azhihayihde nü Thrünpuh lung tsahpü lah.

⁹ATUNGPUH trekhi ju lümlung atsü, apinü kiuto ki jichoh, Aniang, nüsa kiuto ching mukhungrü mihtsürübo!

¹⁰Mihbukmuyukrü yambo ching, arünü thiyuronü müngükhi rahpungbo lah. Arünü inü athraneankhi mukhiukdahkhi akesang ahorichoh.

¹¹Mukhiukdahkhi akesang tüsho adünarabo ahorikhi mihtsürü ki küde thsah inü neak bahjihkhukpü?

¹²Anihbe alarübo athsümünimrü ah; anihbe mihtsürübo akeangyu tharü ah, tüsho arü mulonü mülapmüjide thachoh.

¹³Jumonü inü nü neakbo dünkheaknü nü shikpü tankihkheah.

¹⁴Nünü atsühbah, tüshe reangmükeam, nü buk kheaküshe akeangkeang labah. Nünü zomukhungbah tüshe tümü she muzokhit, tümütüsho nünü tümü zokhita lanü inü thirithsü ching thsümünimbah.

¹⁵Nünü ayangbah tüshe müyimlu; nünü olivbo nitbah tüshe nü kheak müdangke mumuju, nünü kurungaso thsünbah tüshe yukhu muyung.

¹⁶Nünü Omri yakzan thsükhibo tüsho Ahab yamkhün rhimobo zodo, tüsho nünü arü lalimlakobo yando. Jumonü inü nü ju athsümünim, tüsho nü kheak larübo ish thsüpü kamshihkheah; jumonü I mihtsürünü abahyukkhi nünü ahanbah.