Read Yimchungru Naga Mika 7 Bible Online

Mika 7 - Yimchungru Naga bible

Mika 7

¹Ayokhe! Tümüde I a muzhu sangaso rho dunglim, kurungaso rho dunglim, atsühpü adüchi müngürü ruk kamdo; I khümkhi thsungkheaknü akhuh münkhi khubaso müla.

²Athülünkhi alomi chingnü kheamabahdo tüsho alungki larü sheshe müla; arü alalanü thiyih bukpü aleangde binchoh, tüsho arünü keang lubah jimachihchoh.

³Arü khahbo amütsü thsüpü yuklah; atorü tüsho mahkhaprünü buknim kheangchoh, tüsho wularübonü arü künkhi thachoh; hanangde arünü lümkhi amütsü thsüchoh.

⁴Arü bolung atsüdakbe ju khingphu nangde lah, arü bolung khide alungki ju ayangrung lah. Arü aheangrü nimungbo arü thsümüchipü arüdo; kheakü arü yingyingpü khah ki lah.

⁵Müyamrü kheak akin düla, amuzhokhi kheak mulongram düla; niube-niubuh ki she nü mün kümkangang;

⁶tümüde tsührünü buhrü bahyukde rhimochoh, tsührübenü berü azhihde wusuchoh, tsühmeakbenü anihbe ani azhihchoh; nü riribo ju nihbuh betsührü ah.

⁷Tüshe I a, inü ATUNGPUH kheahbah, inü I khümkhitbuh Thrünpuh aleangbah; I Thrünpuhnü I ki anijihbah.

⁸I kurungkheak dasühachih, O I riri; küyimki I angakbanü, I asürübah, küyimki I amiting ching binbanü, ATUNGPUH ju I ki ayin labah.

⁹Tümütüsho inü api azhihde neak yihbeak, api I kilim tsangkhi tüsho I mahkhapkhi khiungde inü ATUNGPUH bukakhiukkhi arümpü lah. Apinü I ayin ching bekhitbah; inü api thiyuro-lungki ngübah.

¹⁰Judüki I ririnü angübah, tüsho achihnü anihbe lüpdobah, shepünü I ki tha, “ATUNGPUH nü Thrünpuh küching la?” I mükbonü anihbe lungkhi ngübah; kheakü anihbe ju kiudunglimro akhimniuhniuh nangde athrümyukbah.

¹¹Nü chipibo thsüpü nimung arüchoh! Ju nimungnü aredung shude akhinbah.

¹²Ju nimung arünü Asiria chingnü Ijip, tüsho Ijip chingnü Ayung, keto chingnü keto tüsho müzüng chingnü müzüng nü kilim arübah.

¹³Tüshe ju ching larü rhimo sangasobo dünkheaknü alomi zhikrangkhündo alabah.

¹⁴Nü tsonü nü mihtsürü, nü yo namfimihnu boto neakang, küpü murung khülang ching alo atsü phulung la; arübo awün nimungbo nangde Bashan tüsho Gilead ching yimtsühshang.

¹⁵Nünü isa Ijip chingnü bekhitkhi nimungbo ching nangde, isa ki amüyinsahbebo huhang.

¹⁶Trükshihbonü angübah tüsho arü sühmüh alala dünkheak achihbah; arünü arü khahbo arü mün hümbah; arü nükhün peangbah;

¹⁷arünü alo kheak chinde abükhi phuruto nangde asungthulung müleakbah; arübonü arü chipibo chingnü ajande akhiukbah; arünü ATUNGPUH isa Thrünpuh kilim trede rholobah, tüsho arünü nü dünkheak trebah.

¹⁸Nü nangde she Thrünpuh la, shepünü api yamrüplurüp aningkhi neak tüsho alakmihkhi bahjihcho? Nünü lünnü bukakhiukde müla tüshe mihmüthsüm huhpü mulungchoh.

¹⁹Nünü isa kheak mihmuzholobah; nünü isa mülimkhibo müphü khüp thrümbah. Nünü isa neakbo alala keto asük ching bahjihbah.

²⁰Nünü awün nimungbo ching isa jipürü ki thiyuchihchimkhi nangde Jakob ki thiyuro tüsho Abraham ki mihmüthsüm huhbah.