Read Yimchungru Naga Nahum 1 Bible Online

Nahum 1 - Yimchungru Naga bible

Nahum 1

¹Nineve dünkheak müchityu. Elkoshrü Nahum michih hüm.

²Mükthsükhi tüsho royimkhi Thrünpuh ju ATUNGPUH ah, royimpü tüsho mulong zhipzhip ju ATUNGPUH ah; ATUNGPUHNÜ api azhihrü kheak royimchoh tüsho api riribo azhihde bukakhiukchoh.

³ATUNGPUHNÜ arünnü bukakhiukchoh tüshe wu ching ato, tüsho ATUNGPUHNÜ küdüdüshe amülimrü müthsümüchidüa mülachoh. Api limro ju chinthrüm tüsho tsüngpungtsüngpung ching lah, tüsho amobo ju api jing yo asungthulung ah.

⁴Apinü keto thürühchoh tüsho ngahshihchoh, tüsho apinü ayungbo alala ngahshihchoh; Bashan tüsho Karmel mukuhabahchoh tüsho Lebanon pungkhi yiuhabahchoh.

⁵Api miki müzüngbo niukchoh tüsho awungbo niuchoh; api miki alomi, alomiküp tüsho ju ching larü alala ajanchoh.

⁶Api bukakhiukkhi müngüh shenü azhipkhukpü? Api bukakhiukkhi atak shenü arümkhukpü? Api mulong zhipzhip ju mo nangde dungkhitchoh, tüsho api hode lungtobo adütre kamde yihnakchoh.

⁷ATUNGPUH tsülah, küpkhuk nimung ching chipi khülang lah; api kheak tsoyukrü apinü kümchoh.

⁸Tüshe azündokhi kekingnü apinü api azhihrü shahde akheamshihbah, tüsho apinü api riribo amiting ching yanyukbah.

⁹Tümüde nünü ATUNGPUH azhihcho? Apinü akheam thsüshihbah; azhihrü sheshe mahne kipü masürü.

¹⁰Arübo ayangbo nangde thrukrama lah, amüshangrü nangde arübo müshanga lah; arübo amukuh sünit nangde aniua lah.

¹¹Nü kheaknü rük amütsü thsüde ATUNGPUH azhihrü wukhiukdo.

¹²ATUNGPUHNÜ ha thachoh, “Arübo sühmüh lakhi tüsho hih-a lalashe, arü athsümünimbah tüsho adükheakbah. Inü nü thsümüchia lalashe, inü kheaküa nü müthsümüchi.

¹³Tüsho kheaküa inü api sangkaplak nü kheaknü ayihshakbah tüsho nü rhükkhi wuhrünliu yihshakbah.”

¹⁴ATUNGPUHNÜ nü dünkheak thiyukhüm jihdo: “ Nü mung lapü thsüde tsühsoniusobo müla; nü thrünpuhbo yam chingnü inü nü sangthsübo thsümünimjihbah. Inü nü kiuyuk thsübah, tümüde nü amo mülakhi lah.”

¹⁵Kheahang! Müzüngbo kheak, thiyusheak atsü handarürü, mungtsü zhiyukrü arüchoh! Nü thüniobo arüngang, O Juda, nünü thiyuchihchimkhi jihang, tümüde kheaküa mihbukmuyuknü nü lomi ching mazah; arü shahde adükheakbah.