Read Yimchungru Naga Nahum 2 Bible Online

Nahum 2 - Yimchungru Naga bible

Nahum 2

¹Nü azhihde ayanrü atua lah! Chipibo aheangang; limro kheahang; nü chimbo rümang; keochihpü thsakhamang.

²( Tümüde ATUNGPUHNÜ Jakob wüntre-müretah, Israel wüntre-müretah jihlochoh, tümüde yankhia-lurünü arübo rhoa lu tüsho akhahbo thsümünima lakheah.)

³Api thirithsürü tsung ju amürüm ah; api bonungrü aneakrüm khim yihlah. Apinü arü bemukhungkhi nimung khora-lolungbebo kheak yinchi phürapchoh; arü khorabo jukkihchoh.

⁴Khora-lolungbebonü kiudunglimrobo hode yingying alihchoh, arübo wungdo hode yüla arüla de nanachihchoh; arübo tsün nangde rakrakde chinchobe nangde alihchoh.

⁵Apinü anihbuh torübo jichoh; arü khuhto ching arüchoki jing mükhechoh; arübo chipi lim niokheamde arüchoh tüsho atsunglobe tsung thsakhamlah.

⁶Ayung yean chipiripitbo lakashunga lah, kiulongthsürü-yam ajanchoh.

⁷Kiuto yana lubah tsodo, azhorü liberübo müthrithrümpü nangde ashede tüzhochoh, tüsho arü khüh yümchoh.

⁸Nineve ju ke bukkhita bahkhi kekung nangde lah. “Tukloang! Tukloang!” de alanchoh — tüshe she murholo.

⁹“Shotoyinchi luang, suna luang! Ju ching lakhit akheam müthsü! Shoto kukruk lüpdükhi suhdahlah!”

¹⁰Thsümünimdo, bahyukdo, zhikabahdo! atrekhinü mulongbo niuthünakdo; mukhukbo ajanchoh, sühmüh tsodo; mirobo pheakmulukdo kamdo!

¹¹Kheakü kekhüzü yam küching la, küpü dangpung ching arü nunu yimkipkhea, küpü ching kekhüzü tüsho kekhüzü dreto, tüsho anunubo mütrede ayükhea?

¹²Kekhüzünü amüyambe tüsho anunu khilim shih laksah tüsho adütre kamde thonak; apinü shih thonakkhinü ayam mishih.

¹³Kheahang, inü nü azhihde lah, Wuto ATUNGPUHNÜ thachoh, tüsho inü nü khora-lolungbebo mokhüh alükde atakbah, tüsho nukshangnü nü yo kekhüzü nunubo muyubah; inü nü shih alomi chingnü akheamshihbah, tüsho nü yunithsürü düsheak musolo.