Read Yimchungru Naga Habakkuk 2 Bible Online

Habakkuk 2 - Yimchungru Naga bible

Habakkuk 2

¹Inü aheangsadam kheak zhipbah, tüsho ju kheak aleangbah; apinü I ki tümü thaba tüsho inü atsangkhi dünkheak apinü tümü alobanü inü kheahde alabah.

²Judüki ATUNGPUHNÜ I ki alo tüsho tha: Michih ju lungbeakbo kheak müzhide thrütkihang, junangde ashanrünü ju khekhukbah.

³Tümüde kheaküshe akhukhit kim thsungkheak michih khülang lah; ha akheam yo asukchoh, tüsho mükeangrü. Ju lakmama she, aleangang; ha tsükjide arübah, mashu.

⁴Akükheangrü kheak kheahang! Arü me arü kheak mulungki, tüshe thiyuro-lungkirü arü akin hode alabah.

⁵Judüalalashe, yukhunü api thsungyukchoh; api bukmüke tüsho keamramde müla. Tümütüsho apinü Ashe-lomi nangde yihnelunelah; Ashekhi nangde küyimkishe api musuhdah. Apinü nihbuh thsungkheak trükshih alala bemukhungchoh, tüsho arü yo thsüpü mihtsürü alala kitmukhungchoh.

⁶Hadürü mihtsürü ki mihbüm abannü mükhemükimde arü ki keangrüde müthaba de, “Shepünü ahühkhi kukruk tüsho jangkhijangrakhinü nihbuh alarü kamchonü ayokhe!” Hanü külokhüh yüba?

⁷Nü shozüngrünü nahde masürüba de, tüsho arü asürübah nü majanshihba de? Judüki nü ju arü thsungkheak ayankhikhi kukruk thsübah.

⁸Tümütüsho nünü trükshih ahihdo yankhia ludo, tümütüsho mihtsürü thiyih bukkhi tüsho alomi kiutobo tüsho jurü ching larü alala ki athsümünim rhimokhinü aninga larü mihtsürü alalanü nü yankhia lubah.

⁹“ Nüsa sherü nüsa yambo thsungkheak amülim alü thsükhinü, thsünimthsüshi chingnü khümkhitpü thsüde nüsa sap achang kheak lanü are!”

¹⁰Nünü mihtsürü ahihdo laksahde nü yamkhün thsungkheak achihbe lümkhi thsüdo; nünü nü rhangdung dükheakshihdo.

¹¹Lungbonü rhü chingnü azhibah, tüsho sanglung chingnü abinkiunü alojihbah.

¹²“ Nüsa sherünü thiyih bukkhinü kiulongto thsücho, tüsho amülimkhinü kiuto thrünchonü are!”

¹³Mihtsürübonü motrushihpü mokhih lang ATUNGPUH kilimnü mürhimode tüsho akeangkeang ching trükshihbo khichoh yung de?

¹⁴Tüshe kebonü keto zhidokhi nangde, ATUNGPUH müretahkhi mükheahmudunü alomi mibah.

¹⁵“ Nüsa sherünü yamhingrü ki arü mümüshangyi khiungde arü bünkeang kheahpü thsüde keluh chingnü duhchonü are!”

¹⁶Nü müretah müthri achihnü mide akambah. Nü yungang, tüsho yingyingde tsahang! ATUNGPUH khah tsülim peangnü nü mükamde pung arübah, tüsho nü müretah kheak mungchih arübah!

¹⁷Tümüde Lebanon kheak athsümünim rhimokhinü nü zhidobah; tümütüsho mihtsürü thiyih bukkhi tüsho alomi le kiutobo tüsho jurü ching larü alala ki athsümünim rhimokhi hode shiwühbo thsümünimkhinü nü trede akamshihbah.

¹⁸Athsürünü athsükhi sangthsü, yungsho akeangyu thsangyukhi mejak tümü yihnüpü la? Tümüde athsükhitkhi ju thiyu masukde sangthsü khülang lalashe ha thsübuhnü ju kheak kinchoh!

¹⁹Nüsa sherünü sang ki, “Asürang!” de thacho, malankhi lung ki, “ Wusuang” de thachonü are. Hanü thsangyukhukla de? Kheahang, ha suna tüsho shotoyinchi mujukihkhi lah, tüsho ju ching sheak müla.

²⁰Tüshe ATUNGPUH api amüsüh arüngyam ching lah; alomi alalanü api miki malande laang!