Read Yimchungru Naga Habakkuk 3 Bible Online

Habakkuk 3 - Yimchungru Naga bible

Habakkuk 3

¹Wukihbuh Habakkuknü Shigionoth bede tamkhüntamnükhi.

²ATUNGPUH , inü nü mungthukhi sodo; nü rhimokhibo dünkheak inü trede zhip, O ATUNGPUH . Isa nimungbo ching jurü thsüphuloshang, isa kimbo ching jurü mükheahshang; mulong zhipzhip ching mihmüthsüm lümkhitjang.

³Teman chingnü Thrünpuh, Amüsühbuh Khülang Paran müzüng chingnü arü. Api müretahkhinü thüningbo muhiudo tüsho api shikhinü alomi mide lakheah.

⁴Ayinatrümkhi ju ani nangde alakheah; anijingbo ju api wu jika lapung api khah chingnü arü.

⁵Api müngüh ashebe-tukthsü yü, tüsho adunglim arümnü yande yü.

⁶Apinü tukloa zhip tüsho alomi niuk; apinü kheah tüsho trükshihbo ajanshih. Lün lakhi müzüngbo shuh-a ajan; jipü limtsah limrobo bede lün lakhi wungbo keamyuk.

⁷Inü Kush khimyambo thsünüde ngü; Midia lomi khimyam zhindokhimbo ajan.

⁸Nü bukakhiukkhi ju ayungbo azhihde alakhea de, O ATUNGPUH ? Nü mulong zhipzhipkhi ayungbo azhihde alakhea de? Nünü khora tüsho lolungbebo bechoki nünü keto azhihde bukakhiukkhea de?

⁹Nünü nü sanglüh atünado, nü hühzobo kippü thsakham. Nü ketonü alomi azüshih.

¹⁰Müzüngbonü nü ngüchoki, arünü ajan; thüningbo chingnü kebo bukkhi. Alomi khüp kebonü ahuk tüsho arü abükkhibo changde yükih.

¹¹Nü hühzobo phürapkhi ching, nü thsüh rakrakkhi ching, ani tüsho khinu thüningbo ching zhikde zhip.

¹²Mulong zhipzhip ching nünü alomi jung, bukakhiukkhi ching nünü trükshihbo thrüm.

¹³Nünü nü mihtsürü khümkhitpü, mujude-mokhitkhi khümkhitpü mikhuh ching arü. Nünü mihbukmuyuk lomi limberü zünak, ku chingnü jing khiungde khuka bahjih.

¹⁴Nünü isa hiumüzütshihpü chinthrüm nangde, jikde alakhi zhochihrü muyupü nangde arükhi, api thirithsürübo limthobuh anihbuh hühzonü chinkhitshih.

¹⁵Nünü nü khorabonü keto jung, ke atobo rhuzhihzhih.

¹⁶Inü sochoh, tüsho I mulong ching thukthukchoh; düsheaknü I münküpbo niukchoh. I robo ching ashuh yüzahchoh, tüsho I jingbo ajanchoh. Isa yanrü mihtsürü kheak thsümütsü nimung arüpü thsungkheak inü zhikde aleangchoh.

¹⁷Khubasodung mupungpung she, tüsho kurungasodungbo kheak aso mükihkih she; olivnü masoso she tüsho thulubonü jim makhiukkhiuk she; mihnu yam chingnü mihnu boto mülade kamkam she, tüsho moshi yam chingnü moshi boto mülade kamkam she,

¹⁸tütüshe inü ATUNGPUH lung asühachihbah; inü I khümkhitrü Thrünpuh lung tode asühbah.

¹⁹Atungpuh T H RÜ NPU H ju sühmüh; apinü I jing ju shihmüchi jing nangde kamshihchoh, tüsho achangbo kheak inü jungshihchoh. Aliu kihkhi khün-khungbenü: khün-huhrü kilim.