Read Yimchungru Naga Zephania 2 Bible Online

Zephania 2 - Yimchungru Naga bible

Zephania 2

¹Rukhüh mukhungang, mukhungang, O machihkhi trükshih,

²hitsüt nangde nü yüna mutsoshihyikinü, ATUNGPUH mulong zhipzhip nü kheak marüyichokinü, ATUNGPUH bukakhiukkhi nimung nü kheak marüyichokinü!

³ATUNGPUH yimang, nüsa lomi ching azhihayihrü alala, sherünü api yukhümbo rhimocho; thiyuro-lungki yimang, azhihayih yimang; khükijua ATUNGPUH bukakhiuk nimung nü tsokhitbah.

⁴Tümüde Gaza ju abahyukbah, tüsho Askelon zhikabahbah; Ashdod mihtsürübo animuro yankhita bahbah.

⁵Ah, keyean larübo, nü Kerethrü trükshih! ATUNGPUH yunü nü azhihde lah, O Kanan, Filistia lomi; inü sheshe maningshihde nü dükheakshihbah.

⁶Tüsho nü, O kemungyean ju rimlopung kambah, namfimihnu neakrü ku alampung tüsho mihnu boto yambo kambah.

⁷Kemungyean ju Juda yamkhün aningkhi yamalo thsüde, ju kheak arünü mihnu boto yimkipbah, tüsho Ashkelon yambo ching arünü azhing ching yapbah. Tümüde ATUNGPUH arü Thrünpuhnü arü kümbah tüsho arü kuhibo jihlobah.

⁸Moabrü tüsho Amonrünü I mihtsürü mükthsüde arü lomi azhihde kükheangkhi inü sodo.

⁹Jumonü Wuto ATUNGPUH Israel Thrünpuhnü thachoh, I lale, Moab ju Sodom nangde tüsho Amonrü ju Gomorra nangde ayangbo tüsho thimi khün lakhi lomi kambah, tüsho lünnü thsümünima labah. I mihtsürü aningkhinü arü yankhia lubah tüsho I trükshih rhangdung larünü arü müküh-a lubah.

¹⁰Ha arü kükheangkhi müthri arü shihcham labah, tümütüsho arünü Wuto ATUNGPUH mihtsürü azhihde mükthsü tüsho kükheang.

¹¹ATUNGPUH mihtrebe thsüde arü azhihbah; apinü lomi thrünpuhbo alala thsümünimbah, tüsho keyeanlobo tüsho kekung-lo trükshihbo alalanü nihbuh dangpung chingnü api ki kingaünbah.

¹²O Ethiopiarü, nüsa she I nukshangnü alaksahbah.

¹³Tüsho dukulim azhihde api khah chungkihbah, tüsho Asiria thsümünimbah; tüsho apinü Nineve ju azhikkhi, loshelo nangde abahkhi akung kamshihbah.

¹⁴Moshi, mihnu tüsho mütüm shiwüh lüpdükhi ju ching labah; loshelo lungru tüsho amüsükbe lungru dungjingku kheak labah; lungrunü ayinripit kheak khungbah, khüjaknü ripit-limro kheak khungbah; tümüde cedar sangnü arhimokhi ju aleangkheak labah.

¹⁵Ha lülüshishi tüsho tsüde lah dükhi kiuto, anihbenü tha, “ I lah tüsho sheshe müla!” Anihbe küdükhüh athsümünimkhi kamde, mütüm shiwüh yam lah! Anihbe tsahhorü abannü ish thsüchoh tüsho khahduthrung hitchoh.