Read Yimchungru Naga Zephania 3 Bible Online

Zephania 3 - Yimchungru Naga bible

Zephania 3

¹Ayokhe, athsümünimkhi, amüneankhi, junokhi kiuto!

²Hanü tümü düsheak mani; hanü athsülangkhi müleangkhi. Hanü ATUNGPUH kheak mükin; hanü nihbuh Thrünpuh kilim phünide müyü.

³Ju ching atorübo ju ahukkhi kekhüzübo lah; mahkhaprübo ju are tsahbe rimrebo, junangde yapsu khiungde tümü maningshih.

⁴Wukihrübo mükümkangkhi, müthülünkhi mihtsürübo lah; amükeamrübonü tümü amüsüh lanü ju müneando, arünü yakzan thsümünimdo.

⁵Ju ching lakhi ATUNGPUH ju thiyuro-lungki; apinü amülim mürhimo. Yapsu aban apinü mahkhapchoh, anipdokhün mülakphah; tüshe thiyuro mülakhinü achihbe tümü mümükheah.

⁶Inü trükshihbo phüta bahdo; arü chipibo athsümünim ching lah; inü arü kiudunglimrobo thsümünima lashihlah, junangde shenü jurü ching mütsahho; arü kiutobo ching mihtsürü mülade zhikabahshihdo.

⁷Inü tha, “Tsükjide kiutonü I trebah, hanü athsülangkhi lubah; inü arü ki thsangyukhi yumük küyimkishe mümih.” Tüshe arü rhimobo thsümünimpü arünü alü künde kam.

⁸Jumonü ATUNGPUHNÜ thachoh, inü thiyumütsan thsüde wusurüpü nimung aleangang. Tümüde inü apungkhikhi ju trükshihbo bemukhungpü, kiulongthsübo bemukhungpü, arü kheak I mulong zhipzhip tüsho bukakhiukkhi dungkihpü lah; tümüde I bukakhiukde mo trukhi ching alomi alala aniuabahbah.

⁹Ju kim ching inü mihtsürübo kilim atsangkhit yutha khülang jihbah, junangde arü alalanü ATUNGPUH mung jibah tüsho arihako khülangnü api tankihbah.

¹⁰Ethiopia ayungbo hode alakhi chingnü, I kingaünrübo inü hiumüzütshihrünü I kilim kingaün hande arübah.

¹¹Ju nimung nünü I azhihde arhimokhi alala dünkheaknü nü achih müngü; tümüde inü nüsa bolungnü kükheangde asühachihrübo yihkhita bahbah, tüsho nüsanü kheaküa I yo amüsüh müzüng kheak lülüshishi müthsü.

¹²Tümüde inü nüsa bolung azhihayih tüsho akheamkhibe mihtsürü zojihbah. Arünü ATUNGPUH mung ching tsoyukpung yimbah —

¹³aningkhi Israel; arünü amülim tümü mürhimo, tüsho akeangyu mütha, yungsho arü mün ching mülapyukkhi mulo müngü. Judüki arünü mihnu boto yimkipbah, tüsho zuhyuka yapbah, tüsho shenü arü mütreshih.

¹⁴Achangnü khün thsang, O Zion mihtsürü, ahoang, O Israel! Asühachihang tüsho nü mulong alalanü asühang, O Jirusalem!

¹⁵ATUNGPUHNÜ nü azhihde mahkhap lude tsodo, apinü nü riribo rholode tsoshihdo. Israel kiulongthsüpuh, ATUNGPUHNÜ lung lah; nünü kheaküa thsümütsü tümü mütre.

¹⁶Ju nimung Jirusalem ki ha thabah: Dütre, O Zion; nü khahbo dükheahkhishih.

¹⁷ATUNGPUH , nü Thrünpuh, nüsa bolung lah, Wuto Khülangnü nü khümkhitbah; apinü nü kurungkheak asühbah, apinü api muzho ching nü aso kamshihbah; apinü nü kurungkheak asühde khün thsübah,

¹⁸thünio nimung nangde inü nü kheaknü thsümütsü hanakhinbah, junangde nü achih mühan.

¹⁹Inü ju kim ching nü junorü alala ki rhimobah. Tüsho inü jingkikrü khümkhitbah tüsho hiumüzüta larü bemukhungbah, tüsho inü arü achih ngükhi ju mungshi müthrijihbah tüsho alomi alala ching mungthu labah.

²⁰Ju kim ching inü nüsa bemukhungchoki nü thüyam lim bedarübah, tümüde inü nü kuhibo jihlochoki, nü alomi mihtsürü alala bolung mungthu tüsho mungshi kamshihbah, ATUNGPUHNÜ thachoh.