Read Yimchungru Naga Zekaria 1 Bible Online

Zekaria 1 - Yimchungru Naga bible

Zekaria 1

¹Darius kam mahnepü, khinu tizheah ching Iddo tsührü Berekia tsührü wukihbuh Zekaria kilim ATUNGPUH yu arü:

²ATUNGPUH nüsa jipürü kheak khide bukakhiukde alakheah.

³Jumonü arü ki thaang, Wuto ATUNGPUHNÜ ha thachoh: I kilim rholoang, Wuto ATUNGPUHNÜ thachoh, tüsho inü nü kilim rholobah, Wuto ATUNGPUHNÜ thachoh.

⁴Nüsa jipürü nangde düla, sherü ki akhuhlim wukihrübonü zhiyuk, “ Wuto ATUNGPUHNÜ ha thachoh, Nüsa amütsü limrobo tüsho nüsa amütsü rhimobo chingnü rholoang.” Tüshe arünü muso yungsho I ki mani, ATUNGPUHNÜ thachoh.

⁵Nüsa jipürübo, arü küching la? Tüsho wukihrübo, arü lünnü la shi?

⁶Tüshe I yubo tüsho I yakzanbo, küpü inü I yamlarübo tüsho wukihrübo ki thiyukhüm jihkhea, jurünü nüsa jipürü müyanphuhkhea de? Jumonü arünü mulong müthri tüsho tha, “ Wuto ATUNGPUHNÜ apinü arhimopü lümkhi thsükhi nangde isa limrobo tüsho rhimobo yande isa ki rhimodo.”

⁷Khinu thürükheak khülang nimung mukukheak phüyi nipü, Shebat khinu, Darius kam mahnepü ching, Iddo tsührü Berekia tsührü wukihbuh Zekaria kilim ATUNGPUH yu arü; tüsho Zekarianü tha,

⁸Azhing ching inü mihtsürü khülang khora amürüm kheak binde ngüdo! Api ju jindükhün ching martel sangbo lung zhipde alakheah; tüsho api dunglim ju khorabo amürüm, mürümmuchu tüsho amüye zhipde alakheah.

⁹Judüki inü tha, “ I tungpuh, harü ha tümü a?” I ki asukde alabuh yunirünü I ki tha, “Arü tümüanü inü nü ki huhbah.”

¹⁰Jumonü martel sangbo lung zhipkhi mihtsürünü alo, “Arübo ju ATUNGPUHNÜ lomi rhuakheahpü thiyikhi lah.”

¹¹Judüki arünü martel sangbo lung zhipkhi ATUNGPUH yunirü ki asuk, “ Isanü alomi rhuakheahdo, tüsho kheahang, lomi athrünkhi akhimahede lah.”

¹²Judüki ATUNGPUH yunirünü tha, “ O Wuto ATUNGPUH , nünü kam nerü bukakhiukkhi Jirusalem tüsho Juda kiutobo kheaknü külokhüh nünü mihmüthsüm tholoba?”

¹³Judüki ATUNGPUHNÜ I ki asukachihbuh yunirü ki muzhode tüsho ashukheam yubonü alo.

¹⁴Jumonü I ki asukachihbuh yunirünü I ki tha, Ha yusheak zhiyukang: Wuto ATUNGPUHNÜ ha thachoh: inü Jirusalem tüsho Zion thsungkheak khide mükthsülah.

¹⁵Tüsho keamramde alakhi trükshihbo kheak inü khitode bukakhiukchoh; tümüde I bukakhiukkhi anikhüh lachoki arünü tukthsü amütsübe kamshih.

¹⁶Jumonü ATUNGPUHNÜ ha thachoh, Inü muzhode Jirusalem kilim rholodo, I yam ju ching thsübah, Wuto ATUNGPUHNÜ thachoh, tüsho kiuto thsülobah.

¹⁷Zhiloang: Wuto ATUNGPUHNÜ ha thachoh: I kiutobo kheaküshe lakhitnü azhikhiukbah; ATUNGPUHNÜ kheaküshe Zion shukheambah tüsho Jirusalem mokhitlobah.

¹⁸Judüki inü abinkih-a kheah tüsho juh phüyi ngü.

¹⁹Inü I asukachihbuh yunirü ki keokhi, “Harü ha tümü a?” Tüsho apinü I ki alo, “Harü ha Juda, Israel tüsho Jirusalem müzütshihkhi juhbo ah.”

²⁰Judüki ATUNGPUHNÜ I ki rhimorü phüyi yümlung shuhbah huh.

²¹Tüsho inü keokhi, “Arü tümü thsüpü arücho?” Apinü alo, “Harü ha Juda lomi tüsho lomi ayingthrümnü züthünakde müzütshihkhi mihtsürü lahyuka bahpü tüsho müzünpü arüdo.”