Read Yimchungru Naga Zekaria 11 Bible Online

Zekaria 11 - Yimchungru Naga bible

Zekaria 11

¹Nü ripitbo khimshuhang, O Lebanon, junangde monü nü yo cedarbo aniubah!

²Tüzhoang, O saipress, tümüde cedar lungdo, tümüde sangbo müretahkhi thsümünimdo! Tüzhoang, Bashan thülamsangbo, tümüde murung akheahbo kiukheamdo!

³Aniang, namfimihnu neakrünü tüzhokhi, tümüde arü müretahkhi thsümünima lah! Aniang, kekhüzübo arungkhi, tümüde Jordan ching khide akheahkhi murung thsümünimdo!

⁴ATUNGPUH I Thrünpuhnü ha thachoh: Alaksahpü akhua lakhi namfimihnu boto neakrü khülang kamang.

⁵Sherünü arü thulochonü arü laksahchoh tüsho amülim müla de lümchoh; tüsho sherünü arü yinchonü thachoh, “ATUNGPUH müngühmühi thsang, tümüde I alarü kamdo”; tüsho arü namfimihnu neakrübonü arü kheak amuzho müla.

⁶Tümüde inü kheaküa alomi ching larü amuzho müla, ATUNGPUHNÜ thachoh. Inü arü mihbüm abannü yamhingrü tüsho kiulongthsürü khah ching jihbah; tüsho arünü alomi thsümünimbah, tüsho inü arü khah chingnü she mübekhit.

⁷Jumonü, namfimihnu yinzüyindorü thsung thsüde I alaksahpü akhukhi namfimihnu boto neakrü kamdo. Inü tso mahne ludo; khülang mung inü Mihmüthsüm, püpü ki Arihako de jilah, tüsho inü namfimihnu kümchoh.

⁸Khinu khülang ching inü namfimihnu neakrü mahsam yankhita bahchoh, tümüde arü kheak inü marümkhukde kamdo, tüsho arünü she I mükheahne.

⁹Jumonü inü tha, “ I nüsa namfimihnu neakrü müthsü. Tümü ashepü lanü, ju sheshang; tümü athsümünimpü lanü, ju thsümünimshang; tüsho aninga larünü khülangnü khülang shih tsühshang!”

¹⁰Inü Mihmüthsüm tso lu tüsho inü mihtsürü alala kheak tangzüngkhi thsümünimde ju yihshak.

¹¹Jumonü ju nimung ha thsümünim, tüsho namfimihnu yinzüyindorü I kheak kheahde larübonü ha ATUNGPUH yu ah de mükheah.

¹²Judüki inü arü ki tha, “Ha nüsa ki alungki nangde lasho, I mihkhah dün jihang; tüshe jude yungsho, arübo zoang.” Jumonü arünü I mihkhah dün shotoyinchi 30 jih.

¹³Jushu ATUNGPUHNÜ I ki tha, “Ha akhamde amo akhukhi ju rahpung-yam ching yukang.” Jumonü inü shotoyinchi 30 ju ATUNGPUH yam rahpung-yam ching yuk.

¹⁴Jushu inü mahnepü Arihako tso ju Juda tüsho Israel keonione dükeak arihakokhi thsümünimde yihshak.

¹⁵Judüki ATUNGPUHNÜ I ki tha: Kheaküshe müthülünkhi namfimihnu neakrü kukrukbo luang.

¹⁶Tümüde kheakü lomi ching inü, adükheakkhi müküm, yungsho rümde atsahkhi müyim, yungsho yurikhi müthsüngu, yungsho ashih kihkhi müyimkip, tüshe ashih kihkhi shih tsühde, arü biuo she achakrüpshihpü lakhi namfimihnu neakrü khülang asürüshihchoh.

¹⁷Namfimihnu boto bahyukrü, müthülünkhi namfimihnu neakrü are! Nukshangnü api bin tüsho amük tsülim thsümünimshang! Api bin shahde keahkhishang, api mük tsülim shahde tukabahshang!