Read Yimchungru Naga Zekaria 14 Bible Online

Zekaria 14 - Yimchungru Naga bible

Zekaria 14

¹Kheahang, nüsa kheaknü yankhia lukhi nüsa bolung chama lupü ATUNGPUH nimung arüchoh.

²Tümüde inü trükshih alala Jirusalem azhihde keochihpü bemukhungbah, tüsho kiuto lubah tüsho thüyambo lubah tüsho aliberübo reangkihde thsümüchibah; mihtsürü niukshakkhüh ramtso ching yübah, tüshe aningkhi mihtsürü kiuto chingnü müdükheak.

³Judüki ATUNGPUHNÜ keochih nimung apinü keochihkhi nangde khuhto ching yübah tüsho jurü trükshihbo bede keochihbah.

⁴Ju nimung api jing Jirusalem miki aniakhiuklim kheak lakhi Oliv Müzüng kheak zhipbah; tüsho Oliv Müzüng ju aniakhiuklimnü aniyüzahlim jindükhün khide mülihde mahne kamde achambah; junangde müzüng chamkhüh ju dukulim tüsho püpü chamkhüh ju düjinglim anguhbah.

⁵Tüsho nüsanü ATUNGPUH müzüng jindükhün hode atsobah, tümüde müzüngbo dükeak jindükhün ju Azal khiungbah; tüsho nüsanü Juda kiulongthsüpuh nimungbo ching muliuyuk chingnü atsokhi nangde atsobah. Judüki ATUNGPUH I Thrünpuh lung amüsührü alala bebah arübah.

⁶Ju nimung athsak yungsho thüwün müla.

⁷Tüsho ju ching mutukzhakde animung labah (ATUNGPUHNÜ ha mükheahlah), animung tüsho are müla, tümüde azhing kim ching ayin labah.

⁸Ju nimung Jirusalem chingnü rhangdung kebo bukkhitbah, chamkhüh aniakhiuklim keto lim tüsho chamkhüh aniyüzahlim keto lim yübah; ha tsüngkam ching le muzhu ching mutuklode alabah.

⁹Tüsho ATUNGPUH ju lomi alala kurungkheak kiulongthsüpuh kambah; ju nimung ATUNGPUH khülang tüsho api mung khülang labah.

¹⁰Alomi athrünkhi, Geba chingnü Jirusalem düjinglim Rimmon khiungde adükhün kambah. Tüshe Jirusalem a Benjamin chipiripit kheaknü adüso ripit dangpung, Amühit Chipiripit khiungde, tüsho Hananel Aheangsadam kheaknü kiulongthsüpuh yukhu nitpung khiungde adüpheak labah.

¹¹Mihtsürü ju ching labah, tümüde kheaküa küyimkishe athsümünimpü makhu; Jirusalem ju kuram tsükhi ching labah.

¹²Ha Jirusalem azhihde thirithsürü mihtsürü alala kheak ATUNGPUHNÜ ashikpü arüm-tukthsü lah: arü jing kihde alachoki arü yin shuhbah; arü mükbo tüsho arü mulobo shuhabahbah.

¹³Ju nimung thsünü ato ATUNGPUH kilimnü arü kheak yükihbah, junangde mihbüm abannü nihbuh yamhingrü khah kheak tholobah, tüsho khülang khahnü püpürü kheak azhihachihde wusubah;

¹⁴Judanü she Jirusalem bede keochihbah. Tüsho mühirü trükshih alala lakhit hanmukhungbah — suna, shotoyinchi, tüsho khimmihbo suhdahde alabah.

¹⁵Tüsho hadürü arüm-tukthsü ju khorabo, khoranunu, kemel, donki, tüsho binpung ching tümüpürü shiwüh labanü arü kheak yükihbah.

¹⁶Judüki rhangdung larü trükshih alala Jirusalem azhihde arürünü kam aban Wuto ATUNGPUH , kiulongthsüpuh kingaünpü, tüsho arüngkhimyam thünio mungpü wutubah.

¹⁷Mürangkhüh alomi yamkhün khürünü Wuto ATUNGPUH , kiulongthsüpuh kingaünpü Jirusalem lim muwutusho, arü kheak tsüng marüde alabah.

¹⁸Tüsho Ijiprünü wutubah shihcham mulusho arü kilim tsüng marüshih; arüngkhimyam thünio mungpü muwutukhi trükshihbo kheak ATUNGPUHNÜ thsümüchikhi arüm-tukthsü arü kheak labah.

¹⁹Harü ha Ijip thsümüchi tüsho arüngkhimyam thünio mungpü muwuturü trükshih alala thsümüchi labah.

²⁰Ju nimung khora yinchibo kheak dokih-a labah, “ATUNGPUH Amüsüh thsang.” Tüsho ATUNGPUH yam ching dükihthüra phühbo ju kingaün sadam miki amüsüh phurusükbo nangde amüsüh labah;

²¹tüsho Jirusalem le Juda ching dükihthüra phüh aban Wuto ATUNGPUH kilim amüsüh labah, junangde laksah-a kingaünrü alalanü arübah kingaünpü lubah. Tüsho ju nimung kheaküa Wuto ATUNGPUH yam ching yinzüyindorü mülade akambah.