Read Yimchungru Naga Zekaria 3 Bible Online

Zekaria 3 - Yimchungru Naga bible

Zekaria 3

¹Judüki apinü Achangbe Amükeambuh Jihusua ju ATUNGPUH miki zhipde, tüsho api amülim jihpü akhah tsülim peang Arimri zhipde I ki huh.

²Tüsho ATUNGPUHNÜ Arimri ki tha, “ATUNGPUHNÜ nü thürühchoh, O Arimri! Jirusalem mokhitbuh ATUNGPUHNÜ nü thürühchoh! Ha buh mihtsürü ha mo chingnü adukkhitkhi mozhuh yung de?”

³Kheakü Jihusua ju yunirü miki zhipchoki amüneankhi khimmih yihbah alakheah.

⁴Yunirünü api miki zhiprübo ki tha, “Amüneankhi khimmihbo ju api kheaknü yihkhitjang.” Tüsho apinü anihbuh ki tha, “ Kheahang, inü nü mülimkhi nü kheaknü hande tsochoh, tüsho inü nü khimmih aso phuyujihbah.”

⁵Tüsho inü tha, “Arünü api ku kheak kuhingbe amüsüh yihkihshang.” Jumonü arünü api ku kheak kuhingbe amüsüh yihkihjih tüsho api kheak khimmihbo phuyujih; tüsho ATUNGPUH yunirü ju ki zhipde alakheah.

⁶Judüki ATUNGPUH yunirünü Jihusua ki thsangdande tha,

⁷“ Wuto ATUNGPUHNÜ ha thachoh: Nünü I limro ching tsahsho tüsho inü alunekhibo zosho, nünü I yam kurungkheak yakzan shuhbah tüsho ju khiungshakbo neakbah, tüsho ha ching zhiprü bolung inü nü kilim dangpung ngüpü alim jihbah.

⁸Kheakü aniang, Jihusua, Achangbe Amükeambuh, nü tüsho nü miki binrü nü zhimzhurübo! Tümüde arübo ju arübe kuhi-atsü amütsan lah: Inü I yamlarü Akhah hande arübah.

⁹Tümüde inü Jihusua miki zokhi lung khülang thrip thüne lakhi kheak, inü adokihbah, Wuto ATUNGPUHNÜ thachoh, tüsho ha lomi amülim inü nimung khülangnü yihkhita bahbah.

¹⁰Wuto ATUNGPUHNÜ thachoh, ju nimung nüsanü nüsa kurungaso tüsho khubasodung khüp khülangnü khülang jiyukachihbah.”