Read Yimchungru Naga Zekaria 5 Bible Online

Zekaria 5 - Yimchungru Naga bible

Zekaria 5

¹Kheaküshe inü abinkih-a kheah tüsho küpqiu khülang phinkhi ngü.

²Tüsho apinü I ki keo, “ Nünü tümü ngücho?” Inü alo, “ Inü küpqiu khülang phinkhi ngüchoh; ayunglim khahnap 20, tüsho atolim khahnap 10.”

³Jushu apinü I ki tha, “Ha alomi athrünkhi kheak muthrumünean wukhiukkhi lah; tümüde sherünü ahühbanü thripkhüh lakhi yande adükheakshihbah tüsho sherünü akeangyu thiyuchihchimbanü püpü thrip lakhi yande adükheakshihbah.

⁴Inü yüshihdo, Wuto ATUNGPUHNÜ thachoh, tüsho ju ahührü yam ching tüsho I mung müshide akeangyu thiyuchihchimrü yam ching yüzahbah; tüsho ha ju yam ching labah tüsho sanglung le lungbo chido tsühabahbah.”

⁵Judüki I ki asukachihbuh yunirünü mikhuh ching arü tüsho I ki tha, “Abinkih-a kheahang tüsho ju tü akhiukchonü kheahang.”

⁶Inü keo, “Ju tümü a?” Apinü alo, “Ha muluk akhiukde lah.” Tüsho apinü tha, “Ha lomi alala ching arü mülimkhi mütsan ah.”

⁷Jushu yinchi thrandobe lahkih, tüsho aliberü khülang muluk ching bina lakheah!

⁸Tüsho apinü tha, “Ha mihbukmuyukkhi mütsan ah.” Jumonü apinü alibe ju muluk ching nimyuklo, tüsho athrandobenü hüpdo.

⁹Judüki inü abinkih-a kheah tüsho aliberü mahne mikhuh ching arükhi ngü. Ane wulakhi ghidükeangbo lakheah; ane ghidükeangbo ju kewuhnu ghidükeang nangde alakheah, tüsho anenü muluk ju alomi le thüning dükeak shuhkih.

¹⁰Judüki inü I ki asukachihbuh yunirü ki keo, “Arünü muluk ju küching lude yücho?”

¹¹Apinü I ki alo, “Ha thsungkheak arüngyam thsüpü Babilon lim yüchoh; tüsho küyimki ha thsükhibanü, anenü muluk ju kingaünpü dangpung kheak zobah.”