Read Yimchungru Naga Zekaria 6 Bible Online

Zekaria 6 - Yimchungru Naga bible

Zekaria 6

¹Tüsho kheaküshe inü abinkih-a kheah tüsho müwayinchi-müzüng mahne chingnü khora-lolungbe jing akhiukde ngü.

²Akhuhbe lolungbe ching khora amürümbo lakheah, mahnepü lolungbe ching khora amürakbo,

³asampü lolungbe ching khora amüyebo tüsho aphüyipü lolungbe ching khorabo aneakjik lakheah.

⁴Judüki inü I ki asukachihbuh yunirü ki keo, “ I tungpuh, harü ha tümü a?”

⁵Yunirünü I ki alo, “Harü ha lomi alala TU N GPU H mikinü arükhi yinmi mebo phüyi ah.

⁶Khorabo amürak lakhi lolungbe ju dukulim lomi lim yü, amüyebonü aniyüzahlim lomi thrip yü, tüsho aneakjikbonü düjinglim lomi thrip yü.”

⁷Küyimki aneakjikbo akhiukkhea, arünü ayüpü tüsho lomi rhua kheahpü marümkheamkhukde kam. Tüsho apinü tha, “ Yüang, alomi rhuakheahang.” Jumonü arünü alomi rhuakheah.

⁸Judüki apinü I ki zhi, “ Kheahang, dukulim lomi thrip yürünü düjinglim lomi ching I me sühakhim ching lashihlah.”

⁹ATUNGPUH yu I ki arü:

¹⁰Babilon chingnü alungkhi ramtsorü Hildai, Tobija tüsho Jedaia kheaknü shotoyinchi tüsho suna luang; tüsho ju nimungnü Zephania tsührü Josia yam ching yüang.

¹¹Shotoyinchi tüsho suna luang tüsho kuthran thsüang, tüsho Jehozadak tsührü Achangbe Amükeambuh Jihusua ku kheak yihkihjang;

¹²api ki thaang: Wuto ATUNGPUHNÜ ha thachoh: Ha ching mihtsürü khülang amung Akhah lah: tümüde apinü nihbuh dangpung ching akhah dübeakde wukhiukbah, tüsho apinü ATUNGPUH arüngyam thsübah.

¹³ATUNGPUH arüngyam thsüpü ju api labah; apinü kiulongthsü wüntrekhi hanbah; tüsho binbahle api kiulongthsübinkiu kheak yakzan shuhbah. Api kiulongthsü-binkiu ki ane dükeak mungtsü anikhitkhi amükeamrü khülang labah.

¹⁴Tüsho kuthran ju ATUNGPUH arüngyam ching mümihpü khülang nangde Heldai, Tobija, Jedaia, tüsho Zephania tsührü Josia arünü akümbah.

¹⁵Sherübo limshude lanü arübah tüsho ATUNGPUH yam thsüpü rungbah; tüsho Wuto ATUNGPUHNÜ I ju nü kilim thiyikheah de nünü amükheahbah. Nünü düshihde ATUNGPUH nü Thrünpuh yu anisho ha adünjibah.