Read Yimchungru Naga Zekaria 7 Bible Online

Zekaria 7 - Yimchungru Naga bible

Zekaria 7

¹Kiulongthsüpuh Darius kam phüyipü ching, Kislev khinu tuku nimung phüyi nipü ATUNGPUH yu Zekaria kilim arü.

²Kheakü Bethel mihtsürübonü ATUNGPUH ki mushushihpü Sharezer le Regemmelek tüsho arü mihtsürübo yüshih,

³tüsho Wuto ATUNGPUH yam amükeamrü tüsho wukihrübo ki keokhipü, “ Inü kam ahihdo thsükhi nangde khinu phüngü ching tüzhode khümkeak thsüba shi?”

⁴Judüki ATUNGPUH yu I ki arü:

⁵Lomi mihtsürü alala tüsho amükeamrübo ki thaang: Nüsanü ha kam nerü khinu phüngü tüsho thüne ching khümkeak thsükhi tüsho tüzhokhi ju I thsungkheak lakhea de?

⁶Tüsho küyimki nüsanü atsühkhea tüsho ayungkheanü, nüsa thsungkheak tsühyungkhi yung de?

⁷Jirusalem mühide kiutobo bede lalim tsüde alachoki, tüsho Negeb le Shephela ching laabahshu harü ATUNGPUH yubo ha adüso wukihrübonü azhiyukkhi yung de?

⁸ATUNGPUH yu Zekaria ki arü:

⁹Wuto ATUNGPUH ha thachoh: Thiyuro mahkhap rhimoang, khülangnü khülang ki amuzho tüsho mihmüthsüm huhang;

¹⁰khimoberü, mürerü, khiungkerü, yungsho zhochihrü düjuno; tüsho khülangnü khülang azhihde nüsa mulong ching amütsü lümkhi düthsü.

¹¹Tüshe arünü anipü thsunglo, tüsho chungthülangdo arü düthsün anguh tüsho manipü arü nükhün yihdo.

¹²Adüso wukihrübo hode Wuto ATUNGPUH menü arüshihkhi yakzan tüsho thiyubo manipü arü mulong müküpde kam. Jumonü bukakhiukkhi ato Wuto ATUNGPUH kilimnü arüshih.

¹³Inü arü jichoki, arünü manikhi nangde, küyimki arünü ajikheanü inü manijih, Wuto ATUNGPUHNÜ thachoh,

¹⁴tüsho inü arübo arünü mümükheahkhi trükshih alala bolung chinthrümnü hiumüzütshih. Hanangde arünü abahjihkhi lomi ju zhika lakheah, junangde shenü yüla arüla müthsü, tüsho alomi atsü ju zhika lakheah.