Read Yimchungru Naga Zekaria 8 Bible Online

Zekaria 8 - Yimchungru Naga bible

Zekaria 8

¹Wuto ATUNGPUH yu I ki arü:

²Wuto ATUNGPUHNÜ ha thachoh: Inü Zion kheak mükthsülah, tüsho anihbe thsungkheak inü tode mulong zhipzhiplah.

³ATUNGPUHNÜ ha thachoh: I Zion lim yübah, tüsho Jirusalem phulung ching labah; Jirusalem ju thiyuro kiuto tüsho Wuto ATUNGPUH müzüng ju amüsüh müzüng de ajibah.

⁴Wuto ATUNGPUHNÜ ha thachoh: Ashinbuhrü le ashinberünü ashinkhi hode nihbuh khah ching tso shuhbah kheaküshe Jirusalem kiudunglimrobo ching binbah.

⁵Tüsho kiudunglimrobo ching athrürü tüsho aliberübonü mide ahoribah.

⁶Wuto ATUNGPUHNÜ ha thachoh: Harü nimungbo ching aningkhi mihtsürübo ki amukukbe thsüa lalashe, Wuto ATUNGPUHNÜ thachoh, I ki she amukukbe laba shi?

⁷Wuto ATUNGPUHNÜ ha thachoh: Inü I mihtsürübo aniakhiuklim tüsho aniyüzahlim lomibo chingnü akhümkhitbah;

⁸tüsho inü arübo Jirusalem ching lashihpü bede arübah. Athülünkhi tüsho thiyuro-lungki ching arübo I mihtsürü thsübah tüsho I arü Thrünpuh thsübah.

⁹Wuto ATUNGPUHNÜ ha thachoh: Mulong toang! I yo arüngyam thsülopü thsungkheak khimtan thsüchoki wukihrübonü asukkhi yubo nüsanü kheakü sode lah.

¹⁰Tümüde akhuhlim a mihtsürü yungsho shiwüh mihkhah tümü mülakheah, tüsho sheshe nihbuh riri chingnü khümkhita mülakheah. Inü mihtsürübo khülangnü khülang azhihde lashih.

¹¹Tüshe kheaküa inü ha mihtsürü aningkhi ki adüso nimungbo nangde mürhimo, Wuto ATUNGPUHNÜ thachoh.

¹²Tümütüsho judüki mungtsü yangkhi labah; kurungasonü aso asobah, alonü amukhuhshihbah, tüsho thüningbonü ayinke jihbah; tüsho inü ha mihtsürü aningkhi ki harü alala yamrüplurüp lushihbah.

¹³Nüsa trükshih bolung muthrumüneankhi lakhi nangde, O Juda tüsho Israel yamkhün, junangde inü nüsa khümkhitbah tüsho nüsa müngühmühi labah. Dütre, tüshe nüsa khahbo mürangde laang.

¹⁴Tümüde Wuto ATUNGPUHNÜ ha thachoh: Nüsa jipürünü I bukakhiukshihchoki, inü mülümalode nüsa kheak thsümütsü hande arükhi nangde, Wuto ATUNGPUHNÜ thachoh,

¹⁵junangde kheaküshe inü harü nimungbo ching Jirusalem tüsho Juda yamkhün ki atsü rhimopü lümkhi lah; dütre.

¹⁶Harü ha nüsanü arhimobebo lah: Mihtsürü abannü nihbuh yamhingrü ki thiyuro asukang; nüsa chipiripitbo ching thiyuro mahkhap jihang tüsho mungtsü thsüang,

¹⁷khülangnü khülang azhihde nüsa mulongbo ching amütsü düthsü, tüsho akeangyu thiyuchihchim dümuzho; tümüde harü alala inü athraneankhi lah, ATUNGPUHNÜ thachoh.

¹⁸Wuto ATUNGPUH yu I ki arü:

¹⁹Wuto ATUNGPUHNÜ ha thachoh: Khinu phüyi ching khümkeakkhi, phüngü ching khümkeakkhi, thüne ching khümkeakkhi, tüsho thürüpü ching khümkeakkhi ju asühachih tüsho asühara akheahmünchibo, tüsho Juda yamkhün thsungkheak asühkhi thüniobo labah: jumonü thiyuro tüsho mungtsü muzhoang.

²⁰Wuto ATUNGPUHNÜ ha thachoh: Kiuto ahihdo chingnü mihtsürübo kheaküshe arübah;

²¹kiuto khülang ching larünü püpü ching yüde athabah, “Arang, isanü yübah ATUNGPUHNÜ amulungkhi mushuanü, tüsho Wuto ATUNGPUH yimanü; I a yüchoh.”

²²Mihtsürü ahihdo tüsho sühmüh lakhi trükshihbonü Jirusalem ching Wuto ATUNGPUH yimde tüsho ATUNGPUHNÜ amulungkhi mushupü arübah.

²³Wuto ATUNGPUHNÜ ha thachoh: Judüki nimungbo ching trükshih yutha aban chingnü mihtsürü 10nü Jihudarü 1 kheak ramlobah, api khimmih kheak zamlobah athabah, “ Isa nü lung yüanü, tümüde Thrünpuh nü lung lah de isanü sodo.”