Read Yimchungru Naga Zekaria 9 Bible Online

Zekaria 9 - Yimchungru Naga bible

Zekaria 9

¹Ha ATUNGPUH yusheak: A TU N GPU H yu ju Hadrak lomi azhihde lah tüsho Damaska kheak keambah. Tümüde Israel trükbo lang yungde Siria kiuying she ATUNGPUH yo ah;

²ju kheak arekhi Hamath she, Tair tüsho Sidon, arü khide lümlung lalashe api yo ah.

³Tairnü chipi thsüdo, tüsho asungthulung nangde shotoyinchi tüsho kiudunglimrobo müneanmuru nangde suna wumujungdo.

⁴Tüshe kheakü, ATUNGPUHNÜ lakhit-kukrukbo lubah tüsho lakhit ju keto ching jipyukbah, tüsho ju monü aniuabahbah.

⁵Ashkelonnü ju ngübah tüsho atrebah; Gaza she, thsünü ching kolahbah; Ekron she ah, tümütüsho ha mulonglamkhi kungabahdo. Gaza chingnü kiulongthsüpuh dükheakbah; Ashkelon mülade akambah;

⁶Athsürukhi-trük mihtsürü Ashdod ching labah, tüsho inü Filistia kükheangkhi akheam thsüshihbah.

⁷Inü amün chingnü thiyih tüsho ahübo dükeak chingnü athraneanbebo hande atsobah; ha kheaküshe isa Thrünpuh thsungkheak aningkhi larü thsübah; ha Juda ching guk khülang ruk labah, tüsho Ekron ju Jebusrü ruk labah.

⁸Judüki I ju aheangrü nangde I yam ching labah, junangde shenü yüla arüla de müthsü; junorü shenü she arü kurungkheak malihho, tümüde kheakü I müknü ngüdo.

⁹Tode asühachihang, O Zion mihtsürübo! Achangnü zhiang, O Jirusalem mihtsürübo! Kheahang, nüsa kiulongthsüpuh nüsa kilim, thiyuro-lungki tüsho akhümkhit lade, azhihayih tüsho donki kheak, khorapung nunu kheak, donki nunu kheak binbah arüchoh.

¹⁰Apinü Ephraim chingnü khora-lolungbe tüsho Jirusalem chingnü thirithsü khora dükheakshihbah; tüsho keochihbe sanglühbo thsümünimbah, tüsho apinü trükshihbo ki mungtsü yukhüm jihbah; api yakzan shuhkhi ketonü keto khiungde alabah, tüsho Euphra Ayung chingnü alomi akheambo khiungde alabah.

¹¹Nüsa thsungkheaknü I thiyih tangzüng nüsa kheak lakhinü, inü nüsa aramrübo ke mülakhi shingkung chingnü zuzu thsüde adükhebah.

¹²Nüsa chipi lim rholoang, O mulonglamkhi aramrübo; khihni nüsa alü thsüde laloshihpü inü khipkhitchoh.

¹³Tümüde inü I sanglüh nangde Juda hündo; inü Ephraim ju hühzobo kamshihdo. Inü nü tsührübo wusushihbah, O Zion, O Greek, nü tsührübo azhihde thirithsü nukshang nangde ashuhbah.

¹⁴Judüki arü kurungkheak ATUNGPUH akhiukbah, tüsho api hühzo chinchobe nangde ayübah; Atungpuh THRÜNPUHNÜ hulipungpung khungbah tüsho düjinglim chinthrüm ching mikhuhlim yübah.

¹⁵Wuto ATUNGPUHNÜ arü kümdobah, tüsho arünü lunghitrü muyuabahbah tüsho ajungbah; arünü arü thiyih ju yukhu nangde yungde, tüsho phurusük nangde mide akambah, kingaün sadam mühitbo nangde apangkhitbah.

¹⁶Ju nimung ATUNGPUH arü Thrünpuhnü arü khümkhitbah, tümüde arü ju api mihtsürü namfimihnu boto lah; tümüde kuthran yo mürezhingzhing nangde arünü api lomi kheak yinshihbah.

¹⁷Tümüde api tsakamkhi tüsho akhamkhi küdükhüh la! Hinü athrününgtsüng tüsho yukhunü anünürü shih kihde akambah.