Read Yimchungru Naga Malaki 1 Bible Online

Malaki 1 - Yimchungru Naga bible

Malaki 1

¹Müchityu khülang. Malaki hode ATUNGPUH yu Israel kilim arü.

²Inü nü muzhodo, ATUNGPUHNÜ thachoh. Tüshe nünü thachoh, “ Küde thsah nünü isa muzhokhi?” Esau ju Jakob akhiung yung de? ATUNGPUHNÜ thachoh. Tütüshe inü Jakob muzhodo

³tüshe inü Esau thranean; inü api müzüngbo lomi ju azhik tüsho api yamrüplurüp ju shirungbo thsungkheak loshelo kamshih.

⁴Edomnü, “ Isa niukmüzüta lah tüshe isanü athsümünimkhi thsülobah” de thasho, Wuto ATUNGPUHNÜ thachoh: Arünü mihbukmuyuk lomi de müjiyi khiungde, ATUNGPUHNÜ lünnü abukakhiukkhi mihtsürü inü athokheambah.

⁵Nü mükbonü ha ngübah, tüsho nünü athabah, “ Israel aredungbo hobah she ato ju ATUNGPUH lah!”

⁶Tsührü khülangnü abuh, tüsho yamlarübonü arü putungrü wüntrechoh. Dale I abuh a sho, I ki wüntre jihkhi küching la? I aputungrü a sho, I akin jihkhi küching la? Wuto ATUNGPUHNÜ nüsa ki thachoh, O I mung mükhemürangkhi amükeamrübo. Nüsanü thachoh, “ Küde thsah isanü nü mung mükhemürangkhea?”

⁷Nüsanü amüneankhi tsühyungpü I kingaün sadam kheak zojih. Tüshe nüsanü thachoh, “ Küde thsah isanü ju müneanshihkhea?” ATUNGPUH dükhüm mükhemürangpü kuklah de lüm.

⁸Küyimki nüsanü amüktukkhi shiwüh laksah-a kingaünkhi ching jihbanü, ju amülim yung de? Tüsho küyimki nüsanü akikkhi yungsho tukthsükhi jihbanü, ju amülim yung de? Ju nü yo kovünor ki thsambah jih-a kheahang; apinü nü ki asühba de yungsho nü leangkhiba de? Wuto ATUNGPUHNÜ thachoh.

⁹Tüshe kheakü Thrünpuh amuzho mushuang, junangde apinü isa ki mihmuzho labah. Ha nüsa khahnü rhimoa lachoki, apinü nüsa ki muzhode aleangkhiba de? Wuto ATUNGPUHNÜ thachoh.

¹⁰O, nüsa khürünü arüngyam ripitbo rihkhülaa, junangde nüsanü akeangkeang ching I kingaün sadam kheak mo mütakkih! Inü nüsa kheak asühkhi müla, Wuto ATUNGPUHNÜ thachoh, tüsho inü nüsa khah chingnü kingaün müleangkhi.

¹¹Tümüde ani akhiuknü ayüzah khiungde trükshih bolung I mung ato lah, tüsho dangpung aban ching I mung chingnü rhümthüneabe tüsho atsangkhit kingaün jihchoh; tümüde I mung ju trükshih bolung ato lah, Wuto ATUNGPUHNÜ thachoh.

¹²Tüshe nüsanü ATUNGPUH dükhüm müneana lah tüsho ha tsühyungbe mükhemükimkhi ah de thade nüsanü ju müneanjihchoh.

¹³Nüsanü thachoh, “Ha küdükhüh she akhikhi la,” tüsho nüsanü I ki nupung kokihchoh, Wuto ATUNGPUHNÜ thachoh. Nüsanü ahühkhi yungsho akikkhi yungsho tukthsükhi shiwüh kingaün hande arüchoh! Inü ju nüsa khah chingnü leangkhiba shi? ATUNGPUHNÜ thachoh.

¹⁴Shepü namfimihnu bolung pung la tüsho ju jihpü thiyuchihchimbah ATUNGPUH kilim lapha kihkhi laksah-a kingaünchonü, rük mütsükhi ju muthrumünean thsang; tümüde I ato kiulongthsürü ah, Wuto ATUNGPUHNÜ thachoh, tüsho trükshih bolung I mung wüntre jihchoh.