Read Yimchungru Naga Malaki 2 Bible Online

Malaki 2 - Yimchungru Naga bible

Malaki 2

¹Tüsho kheakü, O amükeamrübo, ha yukhüm nüsa thsungkheak lah.

²Nüsanü manisho, nüsanü I mung müretahshihpü mulong ching muzhosho, Wuto ATUNGPUHNÜ thachoh, inü nüsa kheak muthrumünean arüshihbah tüsho inü nüsa müngühmühibo muthrumüneanbah; atsütsü inü arübo muthrumüneana bahdo, tümütüsho nüsanü ju mulong ching muzo.

³Inü nüsa tsührübo thürühbah, tüsho nüsa mirobo kheak nüsanü kingaünkhibo khih hiukihjihbah, tüsho nüsa ju inü I mikinü yankhita bahbah.

⁴Jumonü I tangzüngkhi Levi kheak mutuklode alapü ha yukhüm nüsa kilim arüshihdo de mükheahang, Wuto ATUNGPUHNÜ thachoh.

⁵Api ki I tangzüng lakhi ju rhangdung tüsho mungtsü tangzüng lakheah; ha wüntre jihshihpü lakheah, tüsho apinü I ki wüntre tüsho I mung trekhi ching zhip.

⁶Thiyuro yakzan api mün ching lakheah, tüsho api münküp kheak amülim tümü müngü. Apinü azhihayih tüsho alungki ching I lung tsah, tüsho apinü ahihkhüh amülim chingnü rholoshih.

⁷Tümüde amükeamrü münküpbonü mükheahmudu aheangbah, tüsho mihtsürübonü api mün chingnü yakzan yimbeah, tümüde api Wuto ATUNGPUH yunithsürü ah.

⁸Tüshe nüsanü limro chingnü tsomuwuhdo; nüsanü nüsa yakzan hode ahihdo jing mükheshihdo; nüsanü Levi tangzüng thsümünimdo, Wuto ATUNGPUHNÜ thachoh,

⁹jumonü inü nüsa mihtsürü alala miki khenoshih tüsho abobe kamshih, tümütüsho nüsanü I limrobo müyan tüshe nüsa yakzan ching jakkheahdo.

¹⁰Isa alala abuh khülang lah yung de? Thrünpuh khülangnü isa thrünkhi yung de? Dale tümüde isanü isa jipürü tangzüng müneande khülangnü khülang ki akin mülaachih le?

¹¹Judanü akin mülade lado, tüsho Israel le Jirusalem ching athraneanbe yihbeakdo; tümüde Judanü ATUNGPUH arüngyam apinü amuzhokhi müneanjih, tüsho sangthsü thrünpuh kingaünberü yihlu.

¹²Khürünü ha Jakob khimyambo ching rhimosho, yungsho Wuto ATUNGPUH kilim kingaün hande arürü she ATUNGPUHNÜ dükheakshang.

¹³Tüsho nüsanü ha she rhimochoh: Nüsanü tripde tüsho ashede chikebonü ATUNGPUH kingaün sadam lüpdochoh, tümütüsho apinü kheaküa nüsa khah kheaknü kingaün mükheahne yungsho nüsa khah kheaknü lunede müleangkhi.

¹⁴Nüsanü keokhichoh, “Tümü thsükhi apinü muhdücho?” Tümütüsho ATUNGPUHNÜ le nü athunuchoki yamkhünbe dükeak thiyumütsan rhimochoh, tümütüsho anihbe ju nü atrurü, nü rhang lakhi tangzüng yamkhünbe thsüthsü she nünü alibe kheak nünü alokhikhi thsümünimdo.

¹⁵Thrünpuh khülangnü anihbe thrünkhi yung de? Shih tüsho me chido api yo ah. Tüsho Thrünpuhnü tümü lunela? Apinü Thrünpuh mükheahkhi tsührü yimchoh. Jumonü nüsa me ching kümkangang, tüsho nü athunuchoki yamkhünbe kheak nünü alokhikhi düthsümünim.

¹⁶Tümüde niuberü bahkhi inü thraneanlah, ATUNGPUH Israel Thrünpuhnü thachoh, tüsho athsümünimnü nihbuh khimmih lüpdokhi thraneanlah, Wuto ATUNGPUHNÜ thachoh. Jumonü nüsanü kümkangang tüsho akin mülade dürhimo.

¹⁷Nüsanü nüsa yubonü A TU N GPU H khishihdo. Tütüshe nüsanü, “ Küde thsah isanü api khishihkhi? Isanü amütsü rhimokhi alala ATUNGPUH miki atsü lah, tüsho apinü jurü ching asühchoh. Yungsho thiyuro Thrünpuh küching la?” de thachoh.