Read Yimchungru Naga Malaki 3 Bible Online

Malaki 3 - Yimchungru Naga bible

Malaki 3

¹Kheahang, inü I müngüh limro thsakhamshihpü I yunithsürü arüshihchoh, tüsho nüsanü yimde alakhi ATUNGPUH nahde api arüngyam ching arübah. Nüsanü asühde alakhi tangzüngkhi yunithsürü atsütsü arüchoh, Wuto ATUNGPUHNÜ thachoh.

²Tüshe api arükhi nimung shenü arümkhukba, tüsho api akhiukchoki shenü azhipkhukba? Api ju atsangkhitbe mo tüsho dükhüh-throbe nangde lah;

³api ju atsangkhitbe tüsho shotoyinchi tsangkhitbe nangde abinbah tüsho apinü suna le shotoyinchi tsangkhitkhi nangde Levi tsühsoniusobo tsangkhitbah, junangde arünü thiyuro-lungki ching ATUNGPUH kilim kingaünbo hande arübah.

⁴Judüki Juda tüsho Jirusalem kingaün ju awün nimungbo tüsho khakhih kambo ching nangde ATUNGPUH ki asühpü labah.

⁵Judüki mahkhappü thsungkheak I nüsa ki thüninde arübah; inü wurükhuhrü azhihde, müzammüramrü, akeangyu thiyuchihchimrü, mülomüthsürü mihkhah, khimoberü tüsho mürerü junorü, khiungkerü nimmuwuh-a bahrü tüsho I mütrerü azhihde thiyumütsan jihpü atukathribah, Wuto ATUNGPUHNÜ thachoh.

⁶Tümüde I ATUNGPUH mümüthrichoh; jumonü, O Jakob tsührübo, nüsa müdükheak.

⁷Nüsa jipürü nimungbo chingnü nüsanü I yakzanbo chingnü anguh tüsho jurü muzo. I kilim rholoang, tüsho inü nüsa kilim rholobah, Wuto ATUNGPUHNÜ thachoh. Tüshe nüsanü thachoh, “ Küde thsah isanü arholopü?”

⁸Khürünü Thrünpuh rükakiba de? Tütüshe nüsanü I rükakichoh! Tüshe nüsanü thachoh, “ Künangde isanü nü rükakicho?” Nüsa thürü shihcham tüsho kingaün jihkhibo ching!

⁹Nüsa muthrumüneannü muthrumüneana lah, tümüde nüsa trükshih athrünkhinü I rükakichoh!

¹⁰Thürü shihcham alala zowupung ching hande arang, junangde I yam ching tsühyungbe labah, tüsho hanü I rükakiang, Wuto ATUNGPUHNÜ thachoh; inü nüsa thsungkheak thüning ripitbo khimshuhbah müngühmühi mikhiukde bukkhishihnahnü kheahang.

¹¹Inü nüsa thsungkheak tangkhobo thürühbah, junangde nüsa lo chingnü amukhuhkhi müthsümünim; tüsho nüsa lu ching kurungaso aniungyüh müla, Wuto ATUNGPUHNÜ thachoh.

¹²Judüki trükshih alalanü nüsa müngühmühi de ajibah, tümüde nüsa ju asühkhi lomi khülang labah, Wuto ATUNGPUHNÜ thachoh.

¹³Nüsanü I azhihde thiyu amüküp asukdo, ATUNGPUHNÜ thachoh. Tütüshe nüsanü thachoh, “ Küde thsah isanü nü azhihde asukkhea?”

¹⁴Nüsanü thado, “Thrünpuh tankihpü akeangkeang ah. Api yukhüm zokhinü yungsho Wuto ATUNGPUH müngüh mitriprü nangde ayükhinü isa tümü alü thsücho?

¹⁵Kheakü isanü kükheangküyangrü ju müngühmühi de jichoh; mihbukmuyukrü ju lalim tsükhi lang yung, tüshe küyimki arünü Thrünpuh rükakibanü arü tsokhitchoh.”

¹⁶Judüki ATUNGPUH wüntrerünü khülangnü khülang ki asukachih. ATUNGPUHNÜ ju ani tüsho so tüsho ATUNGPUH wüntrerü tüsho api mung ching lümrü lümkhitpü hüm api miki thrüta lakheah.

¹⁷Arü I yo thsübah, Wuto ATUNGPUHNÜ thachoh, inü arhimopü nimung tsüde akhukhi I yamalo thsübah, tüsho bebuhrünü arü khinkih thsürü arü tsührübo müthsümkhi nangde inü arü müthsümbah.

¹⁸Judüki nüsanü kheaküshe thiyuro-lungkirü tüsho mihbukmuyuk dükeak, Thrünpuh tankihrü tüsho api mütankihrü dükeak büthsükhi ngübah.