Read Yimchungru Naga Mathi 11 Bible Online

Mathi 11 - Yimchungru Naga bible

Mathi 11

¹Jisunü api jingyanrü thürükheak mahne ki thsangdankham dunglim, apinü Galilee kiutobo ching thsangyupü tüsho thsangyuthsangrapü ju chingnü yü.

²Küyimki Johannü Khrista rhimobo dünkheak rihyam chingnü asokhea, apinü anihbuh jingyanrü khürü yüshih,

³tüsho api ki tha, “Arüpü lakhi ju nü a shi, dashi isanü khürü aleangba?”

⁴Jisunü arü ki alo, “Yüang tüsho nüsanü tümü socho tüsho ngüchonü Johan ki thaang:

⁵Müktukrünü ngüchoh tüsho jingkikrünü tsahchoh; apham kihrü müsühkhitdo tüsho nükhünpeangrünü sochoh; asherü arhang kamloshihdo tüsho zhochihrü ki thiyusheak atsü thsangyudo.

⁶Tüsho shepü I dünkheak müdukiuhlonü müngühmühi.”

⁷Arü chamachihshu, Jisunü Johan dünkheak botobo ki thapü tankih: “Sunglo ching nüsa tümü kheahpü yükhea? Apungnü sangrung yüna niungniungshihkhi a shi?

⁸Nüsa tümü kheahpü yükhea? Khimmih athünak yihkhi mihtsürü khülang a shi? Sherünü khimmih athünak yihchonü kiulongthsürü yambo ching lachoh.

⁹Tüshe nüsa tümü kheahpü yükhea? Wukihrü khülang a shi? Am, inü nüsa ki thachoh, tüsho wukihrü kheaknü alü ah.

¹⁰Tümüde api dünkheak ha thrüta lah: ‘Kheahang, nü limro thsakhamshihpü inü nü müngüh I yunithsürü yüshihchoh.’

¹¹Atsütsü inü nüsa ki thachoh, aliberübonü zübekhi bolung Johan Baptijihbuh kheaknü atobe masürüyi; tüshe shepü yinmi kiulongthsü ching aninibe lanü api kheaknü atobe ah.

¹²Tüsho Johan Baptijihbuh nimungbo chingnü kheakü khiungde yinmi kiulongthsü jangachihchoh, tüsho amüküprünü ju jangkhia luchoh.

¹³Tümüde wukihrübo alala tüsho yakzannü Johan khiungde müchit,

¹⁴tüsho nüsanü arü yusheak leangkhipü mulongsho, arüpü müchita lakhi Elija ju Johan ah.

¹⁵Shepü nükhün kihlanü aniang!

¹⁶“Inü ha lün tümü kheak akeba? Arübo yinzüyindo dangpung ching azürübo arü müyamrübo ki jide abinkhi nangde lah,

¹⁷‘Isanü nüsa thsungkheak khungpi khungdo, tüshe nüsanü mütsün; isanü nüsa ki mitrip khün thsü, tüshe nüsanü mütüzho.’

¹⁸Tümüde Johan mütsühyungde arü, tüshe arünü thachoh, ‘Api kheak amünean me lah.’

¹⁹Mihtsürü Tsührü tsühyungde arü, tüsho arünü thachoh, ‘Kheahang, ha ching bukchihrü tüsho amüshangrü, ruk-threrü tüsho aneakrübo müyamrü khülang lah.’ Tüshe Thrünpuh lümlung ju arhimonü alim mütsanchoh.”

²⁰Judüki apinü khinthiyinbebo ahihbe thsüde arhimokhi kiutobo Jisunü athürühpü tankih, tümütüsho arünü mulong mümüthri.

²¹“Karazin, nü are! Bethsaida, nü are! Nüsa kheak rhimokhi khinthiyinbebo Tair tüsho Sidon ching rhimokhülaa, arünü müngühnü shungliukhim tüsho awah awuhde mulong müthria labah.

²²Tüshe inü nüsa ki thachoh, mahkhap nimung nüsa kheaknü alü Tair tüsho Sidon thsungkheak arümkheam labah.

²³Tüsho nü, Kapernaum, shepü thüning ching shuhkih-a lanü thsümüchi ching thokhibah; tümüde nü kheak rhimokhi wuto rhimobo Sodom ching rhimokhülaa, ju khihni khiungde laa labah.

²⁴Tüshe mahkhap nimung nüsa kheaknü alü Sodom lomi thsungkheak arümkheam labah de inü nüsa ki thachoh.”

²⁵Ju kim ching Jisunü tha, “Inü nü shichoh, Abuh, thüning tüsho alomi Tungpuh, tümütüsho nünü harü lümlung larü tüsho anikhitrü kheaknü müyima zo, tüsho azürü aninibo ki akhiuka huh.

²⁶Am, Abuh ha nü miki atsü lakheah.

²⁷I Buhnü lüpdükhi I kilim jihdo, tüsho Abuh kheak hode shenü she atsührü mümükheah. Yungsho atsührü tüsho atsührünü api amikheak akhiukshihpü mokhitrübo kheak hobah shenü she Abuh mümükheah.

²⁸Nüsa rozhakrü tüsho hahmülang hanrübo alala I kilim arang, tüsho inü nüsa kilim sühakhim jihbah.

²⁹I sangkap lubah nüsa kheak yihkihang tüsho I kheaknü anikhitang, tümüde I tsüyihrü tüsho mulong athünak, tüsho nüsa me sühakhim ngübah.

³⁰Tümütüsho I sangkap amülü tüsho I hah hiphiplah.”