Read Yimchungru Naga Mathi 12 Bible Online

Mathi 12 - Yimchungru Naga bible

Mathi 12

¹Ju kim ching Jisunü Amuni thulubo hode yü. Tüsho api jingyanrübonü akhümkhi hode manji rüta tsühpü tankih.

²Tüshe küyimki Pharisirünü ju ngükhea, arünü api ki tha, “Kheahang, Amuni tümü mürhimopü yakzan lanü nü jingyanrübonü rhimochoh!”

³Judüki apinü arü ki tha, “David tüsho api lung berünü khümde alachoki tümü rhimokheanü nüsanü mükhe de?

⁴Apinü Thrünpuh yam ching yüzah tüsho api le api lung berünü yikhap tsüh — amükeamrübo kheak hode arü thsungkheaknü ju rhimopü yakzannü mümülüde alakheah.

⁵Yungsho amükeamrübonü Amuni arüngyam münean tüshe arü amülim mülakhi nüsanü yakzan ching mükhe de?

⁶Arüngyam kheaknü atobe khülang ha ching lah de inü nüsa ki thachoh.

⁷Tüshe nüsanü, ‘Inü laksah-a kingaünkhi yungde mihmuzho lunelah,’ dükhi amütsan mükheahkhülaa, nüsanü amülim mülarü mübahyuk.

⁸Tümütüsho Mihtsürü Tsührü ju Amuni yo Atungpuh ah.”

⁹Küyimki api ju chingnü chamachihkhea, apinü arü yo sinagog ching yüzah.

¹⁰Tüsho ju ching khah thripshe mihtsürü khülang lakheah. Arünü api ki anihbuh müdampü thsüde keokhi, “Amuni thsüngupü yakzan la de?”

¹¹Judüki apinü arü ki alo, “Amuni namfimihnu khülang shingkung ching keamyukbah thokhita mulupü thsüde nüsa bolung she mihtsürü la?

¹²Dale mihtsürü a küdükhüh she namfimihnu kheaknü adün labe a? Jumonü Amuni atsü rhimopü yakzan lah.”

¹³Judüki apinü mihtsürü ki tha, “Nü khah chungang.” Apinü chung, tüsho khülim nangde tsüabah.

¹⁴Tüshe Pharisirünü wukhiuk tüsho Jisu laksahpü rük yimmusu.

¹⁵Tüshe küyimki Jisunü ju mükheahkhea, apinü ju chingnü akhinabah; yimto atonü api dunglim yan, tüsho apinü arü alala thsüngujih.

¹⁶Tüsho api dünkheak püpürü ki müthapü arü ki thiyukhüm jih.

¹⁷Ha Isaia wukihrünü athakhi dünjipü lakheah:

¹⁸“Ha ching inü amokhitkhi I yamlarü, inü amuzhokhi tüsho inü asühkhi lah; inü api kheak I me lashihbah, tüsho apinü trükshihbo ki thiyuro zhiyukbah.

¹⁹Apinü murukachih yungsho müzhi; shenü she kiudunglimrobo ching api düsheak muso.

²⁰Thiyuro akuk müngüyi khiungde, apinü ayihrüpkhi khiukto mükhikshak, tüsho trude alakhi tsünpung müyihmüt;

²¹tüsho mihtsürü alalanü api kheak mulonglam labah.”

²²Judüki amünean me yüzahkhi, müktukrü aduh-a api ki bedarü; tüsho apinü anihbuh thsüngu, junangde mihtsürü müktukrü aduh-a lakhinü thiyu tha tüsho ngü.

²³Boto alalanü müyinsahde tha, “Ha David tsührü ju a shi?”

²⁴Tüshe Pharisirünü ju sobah tha, “Amünean me yakzanshuhbuh Beelzebub hodü lang habuhnü amünean me yankhita bahchoh.”

²⁵Jisunü arü lümkhi mükheah tüsho arü ki tha, “Nihbuh azhihde achamnakkhi kiulongthsü aban thsümünimbah, tüsho nihbuh azhihde achamnakkhi kiuto yungsho yamkhün aban müzhipkhuk.

²⁶Arimrinü Arimri yankhita bahsho, nihbuh azhihde api chamnaka lah. Dale küde thsah api kiulongthsü zhipkhukpü?

²⁷Tüsho Beelzebub hode inü amünean me yankhitchosho, nüsa mihtsürübonü shepü hode arü yankhitcho? Jumonü arübo ju nüsa mütsanmükhirü thsübah.

²⁸Tüshe Thrünpuh me hode inü amünean me yankhita lasho, Thrünpuh kiulongthsü nüsa kheak arüdo.

²⁹Yungsho khürünü sühmüh lakhi mihtsürü ju akhuhde rhüka muzosho, küde thsah api yam ching yüzahbah akukrukbo lupü? Jushu apinü anihbuh yam yankhia lukhukbah.

³⁰Shepü I lung mülanü I azhihde lah, tüsho shepü I lung mübenü hiumüzütshihchoh.

³¹Jumonü inü nüsa ki thachoh, neak tüsho mükhemükim thakhi alala mihtsürü ki neak bahjihbah, tüshe Amüsüh Me azhihde mükhemükimkhi a neak mübahjih.

³²Khürünü Mihtsürü Tsührü azhihde athakhi neak bahjihbah; tüshe shepünü Amüsüh Me azhihde athabanü, ha lün yungsho arübe lün ching she api a neak mübahjih.

³³“Sangdung ju atsü thsüsho aso atsü labah, yungsho sangdung ju amütsü thsüsho aso amütsü labah; tümüde sangdung khülang ju asonü mütsanchoh.

³⁴Nüsa phurutobo, nüsa amütsübonü küde thsah atsü thakhukpü? Tümütüsho tümünü mulong mide lanü ju münnü asukchoh.

³⁵Mihtsürü atsünü api kheak lakhi atsü chingnü atsü akhiukshihchoh, tüsho mihtsürü amütsünü api kheak lakhi amütsü chingnü amütsü akhiukshihchoh.

³⁶Tüshe mihtsürünü mükümkang yu thakhi aban dünkheak mahkhap nimung arünü thiyusheak jihbah de inü nüsa ki thachoh.

³⁷Tümütüsho nü yubo hode nü alim mütsanbah, tüsho nü yubo hode nü abahyukbah.”

³⁸Judüki yakzan thsangyurü tüsho Pharisirü khürünü api ki tha, “Thsangyurü, isanü amütsan khülang nü kilimnü ngünelah.”

³⁹Tüshe apinü arü ki alo, “Amütsü tüsho müzammüram lünnü amütsan yimchoh, tüsho wukihrü Jona amütsan kheak hobah tümü amütsan müjihde alabah.

⁴⁰Nimung mahsam tüsho tsüngre mahsam Jona thüngüh buk ching lakhi nangde, Mihtsürü Tsührü nimung mahsam tüsho tsüngre mahsam alo alunglim labah.

⁴¹Mahkhap nimung Nineve mihtsürübonü ha lün lung zhibah tüsho amülim jihbah, tümütüsho Jonanü thsangyuthsangrakhi hode arü mulong müthri, tüsho kheakü Jona kheaknü atobe khülang ha kheak lah.

⁴²Sheba kiulongthsübenü ha lün lung mahkhap ching zhipbah tüsho amülim jihbah, tümüde alibenü Solomon lümlung anipü alomi akheambo chingnü arü; tüsho atsütsü Solomon kheaknü atobe ha kheak lah.

⁴³“Küyimki amünean me mihtsürü kheaknü awukhiukbanü sühakhimpü akung dangpungbo hode yimde yüchoh, tüsho ju müyimkhitchoh.

⁴⁴Jumonü apinü thachoh, ‘I arükhi I yam lim alode ayübah.’ Tüsho küyimki api arübanü ju akeangkeang, phüta, tüsho tsanglunga ngüchoh.

⁴⁵Judüki apinü yübah api kheaknü alü mihbukmuyuk mebo püpü thüne anihbuh lung bebah ju ching yüzahchoh tüsho lachoh; tüsho mihtsürü kuhi ju atan kheaknü ashube amütsübe kamchoh. Junangde mihbukmuyuk lün kheak she jude alabah.”

⁴⁶Küyimki api boto ki asukachihde alakheanü, abe le akeoniorübo api ki asukachihpü künde wungdo zhipde alakheah.

⁴⁷Judüki khülangnü api ki tha, “Kheahang, nü be le nü keoniorübo nü ki asukachihpü künde wungdo zhiplah.”

⁴⁸Tüshe apinü alo, “I be she a tüsho I keoniorübo ju sherü a?”

⁴⁹Tüsho apinü ajingyanrübo kilim akhah chungbah tha, “I be le I keoniorübo ha kheak lah!

⁵⁰Tümütüsho sherünü yinmi ching I Buh lümkhi rhimochonü I khiung, I chi tüsho I be ah.”