Read Yimchungru Naga Mathi 14 Bible Online

Mathi 14 - Yimchungru Naga bible

Mathi 14

¹Ju kim ching Galilee yakzanshuhrü Herodnü Jisu dünkheak so,

²tüsho apinü ayamlarübo ki tha, “Ha Johan Baptijihbuh ah; api ashekhi chingnü arhang kamlode arüa lah, jumonü ju wunü apinü khinthiyinbebo rhimochoh.”

³Tümütüsho müngühlim aniurü Philip niube Herodia dünkheaknü Herodnü Johan rama rhükbah rihyam ching yuk.

⁴Tümüde Johannü api ki tha, “Nünü anihbe lupü yakzan müla.”

⁵Herodnü Johan laksahpü künde alakheah, tüshe apinü mihtsürübo tre, tümütüsho arünü api ju wukihrü khede alakheah.

⁶Tüshe Herod zübe nimung thünio ching Herodia tsührübenü arü miki tsün tüsho Herod asühshih.

⁷Jumonü alibenü tümü kheangbanü anihbe kilim jihpü apinü thiyuchihchim thsü.

⁸Abenü ajuhkhi yande alibenü tha, “Johan Baptijihbuh ku phuru chingnü I kilim jihang.”

⁹Kiulongthsüpuh lümthsünü; tüshe thiyuchihchimkhi tüsho api lung dükhüm ki binrü lakhinü, apinü ju alibe kilim jihpü thiyukhüm jih.

¹⁰Jumonü apinü yüshihbah rihyam chingnü Johan ku lipkhishih.

¹¹Api ku ju phuru chingnü lude arübah anünübe kilim jih, tüsho alibenü ju abe kilim ludarü.

¹²Judüki api jingyanrübonü arübah apang lude yü tüsho kiuyukabah, tüsho yübah Jisu ki thaa huh.

¹³Küyimki ju dünjikhi Jisunü asokheanü, sangkung chingnü alangzü azhik dangpung ching yü. Ju sobah kiuto chingnü yimto ato api dunglim jingnü yü.

¹⁴Jisunü wukhiukbah yimto ato ngüchoki, apinü arü muzhode lüm tüsho arü tukthsü thsüngujih.

¹⁵Arelim jingyanrübo arübah api k i tha, “Ha azhikpung ah, tüsho ashuabahchoh. Kiulongbo ching yübah arü thsungkheak tsühyungbe thulopü thsüde mihtsürübo wulungshang.”

¹⁶Jisunü alo, “Arübo wulungshihpü yihnüpü müla. Nüsanü arü kilim atsühpü tümükhüh jihang.”

¹⁷Tüsho arünü api ki tha, “Isa khah ching yikhap 5 tüsho thüngüh 2 lang lah.”

¹⁸Apinü tha, “Jurü I kilim lubah arang.”

¹⁹Judüki apinü yimto ato ju rimkiu kheak binpü thiyukhüm jih. Apinü yikhap 5 tüsho thüngüh 2 ju lu, tüsho yinmi lim kheahde makshe jih, tüsho yihnakbah jingyanrübo kilim jih; tüsho jingyanrübonü mihtsürübo kilim ahiuh.

²⁰Jumonü arü alalanü tsühbah bukthsü tüsho arünü aningkhi muluk 12 mide hanmukhung.

²¹Tüsho tsühyungrübo ju aliberü tüsho azürübo mükhede athrürü 5000 lakheah.

²²Apinü mihtsürübo müzütshihshu, Jisunü nahde api jingyanrübo sangkung ching yüzahbah amüngüh ke thripkhüh yüshih.

²³Küyimki apinü arü müzütshihkhea, apinü tamkhüntamnüpü müzüng ching wutu. Tüsho küyimki arelim kamkhea, api alangzü lakheah.

²⁴Tüshe sangkung ju kero phulung ke abükkhinü heande alakheah, tümüde apungnü thsunglode yün.

²⁵Ayinkhipü tsangchoki Jisunü kemi kheaknü tsahde api jingyanrübo kilim arü.

²⁶Küyimki api kemi kheak tsahkhi ajingyanrübonü angükheanü arünü müyinsahde tha, “Ha me khülang ah!” Tüsho arünü trede zhi.

²⁷Tüshe Jisunü nahde arü ki tha, “Mulong toang! Ha I ah. Dütre.”

²⁸Tüsho Peternü api ki tha, “Atungpuh, ju nü a sho I nü kilim kemi kheaknü arüpü thiyukhüm jihang.”

²⁹Jumonü apinü tha, “Arang.” Tüsho küyimki Peter ju sangkung chingnü akikhea, apinü kemi kheaknü tsahde Jisu kilim yü.

³⁰Tüshe küyimki apinü apung müküpkhi ngükhea, api trede alakheah; tüsho keamyukde alakhi apinü zhi, “Atungpuh, I khümkhitang!”

³¹Jisunü nahde khah chunga yüshihbah api tholo, tüsho api ki tha, “O nü akin ninikhi, tümüde nü dukiuhlokhea?”

³²Tüsho küyimki ane sangkung ching yüzahkhea, apung tukloabah.

³³Judüki sangkung ching larübo arü tüsho api kingaünde tha, “Tsükjide nü a Thrünpuh tsührü ah.”

³⁴Küyimki arü hode ayükhea, arünü Gennesaret lomi ching arü.

³⁵Ju dangpung ching lakhi mihtsürübonü Jisu mütsanbah arünü ju mühi lomi alala ching thiyusheak yüshih tüsho tukthsürü alala api kilim bedarü,

³⁶tüsho arünü api khim müngam kheak lang she aqiupü api ki mushu. Tüsho ju qiurü alala nguabah.