Read Yimchungru Naga Mathi 16 Bible Online

Mathi 16 - Yimchungru Naga bible

Mathi 16

¹Judüki Pharisirü le Sadukirübo arü tüsho yinmi chingnü amütsan khülang arü ki huhang de api rükde keo.

²Apinü arü ki alode tha, “Küyimki arelim kambanü nüsanü thachoh, ‘Ha nimung atsü labah, tümüde thüning mürümdo lah’;

³tüsho yapsu thachoh, ‘Tsüng arüpü lah, tümüde thüning mürümdo tüsho lukkhüplah.’ Yiuhkhaprübo! Nüsanü thüning kheahbah nimung müchitkhuklah tüshe amütsan kimbo a müthakhuk.

⁴Mihbukmuyuk tüsho müzammüram lünnü amütsan yimchoh, tüsho wukihrü Jona amütsan kheak hode amütsan tümü müjihde alabah.” Tüsho apinü arü zojihbah tsoabah.

⁵Küyimki api jingyanrübo ke thripkhüh dükihkhea, arünü yikhap lupü mih-a lakheah.

⁶Judüki Jisunü arü ki tha, “Pharisirü tüsho Sadukirü phaüm dünkheak atünadoang.”

⁷Tüsho arünü arü bolung asukachihde tha, “Ha isanü yikhap mulumonü ah.”

⁸Tüshe küyimki Jisunü ju mükheahkhea, apinü arü ki tha, “O nüsa akin ninirübo, nüsanü yikhap lude marümonü tümüde nüsa bolung atsangachihcho?

⁹Nüsanü 5000 thsungkheak yikhap 5 tüsho nüsanü muluk küdükhüh hanmukhungkheanü manikhit de yungsho mülümkhit de?

¹⁰Yungsho 4000 thsungkheak yikhap 7 tüsho nüsanü muluk atoto küdükhüh hanmukhungkhea?

¹¹Inü yikhap dünkheak thachoh yung de tümü thsükhi nüsanü manikhitkhea? Tüshe Pharisirü tüsho Sadukirü phaüm dünkheak nüsa atünadoang.”

¹²Judüki yikhap ching yukbe phaüm atünadopü yungde Pharisirü tüsho Sadukirünü thsangyukhi azhihde apinü arü ki thachoh de arünü anikhit.

¹³Küyimki Jisu ju Kaesarea Filipi lomi ching arükhea, apinü ajingyanrübo ki keokhi, “Mihtsürübonü Mihtsürü Tsührü ju shepü ah de thacho?”

¹⁴Jumonü arünü tha, “Khürünü Johan Baptijihbuh, khürünü Elija, tüsho püpürü Jeremia yungsho wukihrü bolung khülang ah de thachoh.”

¹⁵Apinü arü ki tha, “Tüshe I ju shea ah de nüsanü thacho?”

¹⁶Simon Peternü alo, “Nü a arhang Thrünpuh tsührü Khrista ah.”

¹⁷Jisunü api ki tha, “Jona tsührü Simon, nü müngühmühi, tümüde ha mihtsürünü yung tüshe yinmi ching I Buhnü nü ki akhiuka huhkheah.

¹⁸Tüsho nü Peter ah de inü nü ki thachoh, ha lung kheak inü I borü thrünkihbah, tüsho thsümüchipung chipiripitbonü ju mazhihkhuk.

¹⁹Inü nü kilim yinmi kiulongthsü mükhipbebo jihbah, tüsho tümüpürü nünü alomi kheak rhükbanü yinmi ching rhükbah, tüsho tümüpürü nünü alomi kheak trünbanü yinmi ching trünbah.”

²⁰Judüki apinü ajingyanrübo ki api ju Jisu Khrista ah de she ki she dütha de tha.

²¹Ju kim chingnü Jisunü api jingyanrübo ki api Jirusalem ching yübah tüsho azothsürübo, amükeam putungrübo tüsho yakzan thsangyurü khah ching hihde athsünübah tüsho api alaksahbah tüsho mahsam nipü arhang kamlobah de ahuhpü tankih.

²²Judüki Peternü api bemuwuh tüsho anihbuh thürühpü tankih, “Jude yung, Atungpuh; ha nü kheak müdünji!”

²³Tüshe apinü rholobah Peter ki tha, “I dunglim yüang, Arimri! Nü a I ki jingmükhelung ah; nü lüm ching lakhibo ju Thrünpuh kilimnü yung, tüshe mihtsürü kilimnü lah.”

²⁴Judüki Jisunü api jingyanrübo ki tha, “Khürünü I dunglim arünesho api küdah thsüde danyukang tüsho nihbuh sangkim shuhbah I yanang.

²⁵Tümüde shepünü nihbuh rhangdung khümkhitnebanü ju adükheakbah, tüsho shepü I dünkheaknü nihbuh rhangdung dükheakbanü ju angübah.

²⁶Mihtsürü khülangnü alomiküp athrünkhi kuka lubah anihbuh me dükheaksho api tümü alü thsüba? Yungsho mihtsürü khülangnü nihbuh me müthri tümü jihba?

²⁷Tümütüsho Mihtsürü Tsührü ju Abuh müretahkhi ching api yunirübo lung arübah, tüsho apinü mihbüm aban nihbuh rhimobo ayannü thsambah jihbah.

²⁸Tsükjide inü nüsa ki thachoh, Mihtsürü Tsührü api kiulongthsü ching marüyi khiungde ha ching zhiprü khürü a müshede alabah.”