Read Yimchungru Naga Mathi 18 Bible Online

Mathi 18 - Yimchungru Naga bible

Mathi 18

¹Ju kim ching jingyanrübonü arübah Jisu ki tha, “Yinmi kiulongthsü ching shepü atobe a?”

²Jisunü azürü nunu khülang api kilim jibah arü bolung zhipshih,

³tüsho tha, “Atsütsü inü nüsa ki thachoh, nüsa mulong müthribah azürü nunubo nangde mükamsho, küde thsüthsü she nüsanü yinmi kiulongthsü ching müyüzahkhuk.

⁴Jumonü shepünü ha azürü nunu nangde nihbuh azhihayihde kamchonü yinmi kiulongthsü ching atobe ah.

⁵Tüsho shepünü I mung chingnü ha azürü nunu khülang leangkhichonü I leangkhichoh.

⁶“Tüshe shepünü I kheak kinrü harü azürü nunu bolung khülang neak yihbeakshihbanü, api hung ching hizübe-lung khülang chingkihbah keto asük ching yüzahkhi atsübe labah.

⁷Mihtsürü neak yihbeakshihbe lakhi dünkheaknü alomiküp are! Hadürü adünjibah, tüshe shepü hode ha akhiukshihbanü are!

⁸“Nü khah yungsho nü jingnü neak yihbeakshihsho, ju lipkhia bahang. Khah mahne tüsho jing mahne kihbah akheam müla motru ching jipyukpü dün a nü thsungkheaknü khah khülang yungsho jing khülang mabande rhangdung lapung ching yüzahkhi atsübe ah.

⁹Tüsho nü müknü nü neak yihbeakshihsho, nü kheaknü ju khünkhita bahang. Mük mahne kihbah thsümüchi motru ching jipyukpü dün a nü thsungkheaknü mük khülang kihbah rhangdung lapung ching yüzahkhi atsübe ah.

¹⁰“Harü anini bolung khülang she mükhemükim müthsüpü kümkangang, tümüde inü nüsa ki thachoh, yinmi ching arü yunirübonü yinmi ching labuh I Buh miro kamruhroro kheahde lah.

¹¹(Tümütüsho Mihtsürü Tsührü ju adükheakkhi khümkhitpü arü.)

¹²Nüsanü tümü lümcho? Mihtsürü khülang namfimihnu 100 labah arü bolung 1 dükheaksho, apinü 99 ju zojihbah adükheakkhi 1 yimde müzüngbo lim müyücho de?

¹³Inü nüsa ki atsütsü thachoh, apinü ju ngüsho müdükheakkhi 99 kheaknü ju namfimihnu kurungkheak alü asühachihchoh.

¹⁴Junangde harü anini bolung khülang she adükheakpü thsüde yinmi ching labuh nüsa Abuhnü mümulong.

¹⁵“Nü keoniorünü nü azhihde neak yihbeaksho, yüang tüsho nüke dükeak api mülimkhi api ki thaang. Apinü nü yu anisho nünü nü keoniorü khümkhitdo.

¹⁶Tüshe apinü manisho, nü lung püpürü khülang yungsho mahne beang, junangde mahne yungsho mahsam thiyumütsan hode lüpdükhi mütsanmükhibah.

¹⁷Apinü arü yu manisho, borü ki thaang; tüsho apinü borü yu she manisho nüsanü api ju amükinrü yungsho ruk-threrü nangde khejang.

¹⁸“Inü nüsa ki atsütsü thachoh, nüsanü tümüpürü alomi kheak rhükbanü yinmi ching rhükbah, tüsho nüsanü tümüpürü alomi kheak trünbanü yinmi ching trünbah.

¹⁹“Kheaküshe inü nüsa ki thachoh, arünü tümükhüh keokhikhi dünkheak alomi kheak nüke mahne arihsho, yinmi ching labuh I Buhnü arü thsungkheak rhimojihbah.

²⁰Tümütüsho küching I mung chingnü mahne yungsho mahsam mukhunga lanü, arü bolung I lah.”

²¹Judüki Peter arü tüsho api ki tha, “Atungpuh, I keoniorünü I azhihde neak yihbeaksho inü api neak küdükhüh ki bahjihba? Thüne ki khiungde a shi?”

²²Jisunü alo, “Thüne ki khiungde de inü nü ki müthanü, tüshe nerünü thüne ki khiungde.

²³“Jumonü yinmi kiulongthsü ju kiulongthsürü khürünü api yamlarübo lung mütsanmükühkhi kiphahlah.

²⁴Tüsho küyimki apinü mütsanmükühpü tankihkhea, api ki talent 10,000 shozüng lakhi khürü bedarü.

²⁵Tüshe apinü müshakkhukkhinü, anihbuh putungrünü shozüng shakpü thsüde api lung aniube le atsührübo tüsho api lakhi alala yinpü thiyukhüm jih.

²⁶Jumonü yamlarünü api miki mükhümde tha, ‘Aputungrü, I ki arümkheamjang, tüsho inü nü alala shakbah.’

²⁷Judüki yamlarü putungrünü muzhode lümbah shozüng bahjih tüsho api dükhe.

²⁸“Tüshe yamlabuh junü wukhiuk tüsho api adholi 100 shozüng lakhi rukhüh yamlarü bolung shoru; apinü zünga lubah athrukeang kheak thünitde tha, ‘Nünü I züngkhi shakang!’

²⁹Jumonü rukhüh yamlabuhnü ajing ki mükhümbah mushude tha, ‘I ki arümkheamjang tüsho inü nü alala shakbah.’

³⁰Apinü mani tüshe yübah shozüng müshakyi khiungde rihyam ching zo.

³¹Jumonü rukhüh yamlarübonü ju rhimokhi ngüchoki khide mulong rozhak, tüsho yübah adünjikhi alala arü putungrü ki thaa huh.

³²Judüki api putungrünü anihbuh jibah tha, ‘Nü mihbukmuyuk yamlarü! Nünü I ki mushumonü nü shozüng alala bahjihkheah.

³³Inü nü ki muzhokhi nangde, nünü she rukhüh yamlarü ki amuzho mülabea de?’

³⁴Api putungrünü bukakhiuk, tüsho api shozüng alala müshakyi khiungde athsümüchirü kilim jih.

³⁵Junangde nüsanü nüsa mulong chingnü nüsa keoniorü neak mübahjihsho, yinmi ching labuh I Buhnü nüsa mihbüm aban ki rhimobah.”