Read Yimchungru Naga Mathi 19 Bible Online

Mathi 19 - Yimchungru Naga bible

Mathi 19

¹Küyimki Jisunü harü thakhamkhea, apinü Galilee chingnü chamachih tüsho Jordan hobah Judea lomi ching arü.

²Yimto atonü api dunglim yan, tüsho apinü ju ching arü thsüngujih.

³Pharisirü she api ki arübah rükakide keo, “Mihtsürü khülangnü amütsan khürü dünkheaknü nihbuh niuberü bahpü yakzan la de?”

⁴Apinü arü ki alo, “Atankih ching shepünü arü thrünkheanü, ‘athrürü tüsho aliberü thrünkheah,’ de nüsanü mükhe de?

⁵tüsho tha, ‘Ha dünkheaknü athrürünü abuh tüsho abe chamkhibah tüsho aniube lung thsürua labah, tüsho mahne ju shihphü khülang kambah.’

⁶Junangde kheaküa ane mahne yung tüshe shihphü khülang ah. Jumonü Thrünpuhnü tümü thsürushihdünü mihtsürünü düchamachih shi.”

⁷Arünü api ki tha, “Dale tümüde abahpü jingyanbe jihpü tüsho alibe tsoshihpü Mosanü thiyukhüm jihkhea?”

⁸Apinü arü ki alo, “Nüsa mulong müküpkhi hode Mosanü nüsa ki nüsa niuberü bahpü mülükheah, tüshe atankih chingnü a jude müla.

⁹Tüsho inü nüsa ki thachoh, yüliyürakhi kheak hode shepünü nihbuh niuberü bahbah püpürü luchonü müzammüram yihbeakchoh; tüsho bah-a lakhi liberü shepünü luchonü müzammüram yihbeakchoh.”

¹⁰Api jingyanrübonü api ki tha, “Athrürü tüsho api niube dükeak jude lasho, yamkhün müthsükhi atsübe ah.”

¹¹Tüshe apinü alo, “Thrünpuhnü jih-a larü kheak hode alala kheak ha yu mayepü kuklah.

¹²Tümütüsho khürü a berü buk chingnü dukha zübechoh, tüsho khürü a mihtsürünü athsakhamkhi lah, tüsho khürü a yinmi kiulongthsü dünkheaknü nihbuh küdah thsüde athsakhamkhi lah. Shepünü ha leangkhipü kuklanü leangkhiang.”

¹³Judüki arü kheak api khah nimbah tamkhüntamnüshihpü azürü aninibo api ki bedarü, tüshe jingyanrübonü arü thürüh.

¹⁴Tüshe Jisunü tha, “Azürü aninibo I kilim arüshang, tüsho arü düyanlo; tümüde yinmi kiulongthsü harü yo ah.”

¹⁵Apinü akhahnü arü kheak nim tüsho ju chingnü chamachih.

¹⁶Mihtsürü khülang Jisu ki arübah keokhi, “Thsangyurü, akheam müla rhangdung ngüpü inü tümü atsü rhimobea?”

¹⁷Jisunü alo, “Tümüde nünü I ki atsü dünkheak keokhicho? Atsü khülang lang lah. Nünü rhangdung lapung ching yüzahnesho, thiyukhümbo zoang.”

¹⁸Apinü anihbuh ki tha, “Küpü a?” Tüsho Jisunü alo, “Nünü dülaksah, nünü müzammüram düthsü, nünü dahüh, nünü arükchih thiyumütsan düthsü,

¹⁹nü buh tüsho nü be wüntreang, tüsho nünü nü yamhingrü ki nihbuh nangde muzhoang.”

²⁰Athrününgtsüngbuhnü api ki tha, “Harü alala I athunuchokinü rhimodo; kheaküshe I tümünü maban le?”

²¹Jisunü api ki alo, “Nünü banthsangde kamnesho, yüang, nü yamalobo yinbah zhochihrü kilim jihang, tüsho yinmi ching nü rahpung labah; tüsho arang, I dunglim yanang.”

²²Küyimki athrününgtsüngbuhnü ha sokhea, mulong rozhakde api tsoabah; tümüde api lakhit ato lakheah.

²³Tüsho Jisunü api jingyanrübo ki tha, “Atsütsü inü nüsa ki thachoh, alarü mihtsürü khülangnü yinmi kiulongthsü ching yüzahpü chaklah.

²⁴Kheaküshe inü nüsa ki thachoh, alarü mihtsürü khülangnü Thrünpuh kiulongthsü ching yüzahpü kheaknü a kemelnü dübean-ku chingnü chinkhitde ahokhi athülihbe ah.”

²⁵Küyimki jingyanrübonü ha sokhea, arünü khide müyinsah tüsho tha, “Dale tüsho shepü khümkhitba?”

²⁶Tüshe Jisunü arü kheak kheahbah tha, “Mihtsürü thsungkheak ha amukukbe, tüshe Thrünpuh thsungkheak a alala akukbe lah.”

²⁷Judüki Peternü alo, “Kheahang, isanü lüpdükhi bahbah nü dunglim yando. Dale tüsho isa thsungkheak tümü labea?”

²⁸Jisunü arü ki tha, “Atsütsü inü nüsa ki thachoh, küyimki Mihtsürü Tsührü nihbuh müretahkhi kiulongthsü-binkiu kheak binbanü, nüsa sherü I dunglim yankheanü alomiküp aso ching kiulongthsübinkiu thürükheak mahne kheak Israel trük thürükheak mahne mahkhapde abinbah.

²⁹Tüsho shepünü I mung dünkheaknü thüyambo, khiungmungrü, chiniurü, abuh, abe, tsührübo yungsho alobo bahjihdünü chi kinü alü ngübah tüsho akheam müla rhangdung yamrüplurüp lubah.

³⁰Tüshe akhuhrü ahihkhüh ashurü kambah, tüsho ashurü ahihkhüh akhuhrü kambah.