Read Yimchungru Naga Mathi 2 Bible Online

Mathi 2 - Yimchungru Naga bible

Mathi 2

¹Kiulongthsüpuh Herod kim ching, Judea ching lakhi Bethlehem ching Jisu zübe dunglim, aniakhiuklimnü mükheahmudurübo Jirusalem ching arü

²tüsho keokhi, “Jihudarü kiulongthsüpuh zübekhi ju küching la? Isanü api chining aniakhiuklim ngüdo tüsho api kingaünpü arükheah.”

³Küyimki kiulongthsüpuh Herodnü harübo sokhea, api tüsho api lung Jirusalem ching alala müyinsah.

⁴Tüsho küyimki apinü mihtsürübo amükeam putungrübo tüsho yakzan thsangyurübo bemukhungkhea, Khrista ju küching zübepü lanü apinü arü ki keokhi.

⁵Jumonü arünü api ki alo, “Judea ching lakhi Bethlehem ching ah, tümütüsho wukihrübonü ha thrüta lah:

⁶‘Tüshe nü, Juda lomi ching lakhi Bethlehem, Juda yakzanshuhrü bolung aninibe yung; tümüde nü kheaknü I mihtsürü Israel neakpü yakzanshuhrü khülang arübah.’ ”

⁷Judüki Herodnü mükheahmudurübo ju ramde ji tüsho arü kheaknü dükde chining akhiukkhi kim mütsana lu.

⁸Apinü arü ki hade thabah Bethlehem lim yüshih, “Yübah ju düshihde yimang, tüsho küyimki nüsanü api yimkhitbanü I kilim bede arang, junangde inü she api kingaünbah.”

⁹Arünü kiulongthsüpuh yu sobah chamachihde yü; tüsho kheahang, arünü aniakhiuklim ngükhi chining ju azürü lakhi kumung yübah müzhipyi khiungde arü müngüh yü.

¹⁰Küyimki arünü chining ju angükhea, arünü khide tode asühachih.

¹¹Tüsho küyimki arü thüyam ching yüzahkhea, arünü azürü ju abe Mari lung ngü, tüsho mükhümbah api kingaün. Tüsho arünü thsambah düm trünbah api kilim suna, jinjinlak, tüsho rhümthüneabe thsambahbo jih.

¹²Milim ching Herod kilim alode düyü de athakhi hode, arünü püpü limronü arü lomi lim alode yü.

¹³Küyimki arü chamachihkhea, Atungpuh yunirü khülang milim ching Josep ki akhiukbah tha, “Asürang, azürü le abe büne bebah Ijip lim tsoang. Inü nü ki müthayi khiungde ju ching laang, tümüde Herodnü azübuh laksahpü yimbah.”

¹⁴Küyimki api asürükhea, apinü azübuh le abe büne azhing ching bea lubah Ijip lim tso,

¹⁵tüsho Herod müsheyi khiungde ju ching la, junangde Atungpuhnü wukihrü hode, “Ijip chingnü inü I tsührü jikhit,” de athakhi dünjipü lakheah.

¹⁶Küyimki mükheahmudurübonü api mülapyukdo de Herodnü amükheahkhea, api khide bukakhiuk; tüsho apinü mükheahmudurübo kheaknü anikhitkhi kim ayannü Bethlehem tüsho ju mühi athrürü nunu kam mahnenü abukkhüp alala laksahpü thiyukhüm jih.

¹⁷Judüki Jeremia wukihrünü athakhi dünji:

¹⁸“Rama ching mitripkhi tüsho tode tüzhokhi düsheak so, Rachelnü atsührübo thsungkheak tripchoh tüsho mulong shukheampü thsunglochoh, tümütüsho arübo kheaküa müla.”

¹⁹Tüshe küyimki Herod sheabahkhea, Ijip ching Atungpuh yunirü milim ching Josep ki akhiuk

²⁰tüsho tha, “Asürang, azürü le abe büne bebah Israel lomi lim yüang, tümütüsho sherünü azürü rhangdung yimkheanü sheabahdo.”

²¹Judüki apinü wusubah azürü le abe büne bea lu tüsho Israel lomi lim yü.

²²Tüshe küyimki apinü abuh müthri Arkelausnü Judea kurungkheak kiulongthsüchoh de asokhea, apinü ju ching yüpü tre. Tüsho Thrünpuhnü milim ching thamonü apinü Galilee lomi lim alode yü.

²³Tüsho apinü yübah Nazareth kiuto ching la, junangde wukihrübonü, “Api Nazarethrü de ajibah,” de athakhi dünjipü lakheah.