Read Yimchungru Naga Mathi 20 Bible Online

Mathi 20 - Yimchungru Naga bible

Mathi 20

¹“Tümütüsho yinmi kiulongthsü ju yapsu mükikde wukhiukbah api yo kurungasolu thsungkheak rhimopü rhimorü mulokhi thüyam putungrü kiphahlah.

²Küyimki apinü rhimorübo ki nimung mihkhah dün adholi 1 jihpü mulongbanü arübo api yo kurungasolu ching yüshihchoh.

³Apinü 9 king ngüm yü tüsho püpürü yinzüyindopung ching sühdukde azhipkhi ngü,

⁴tüsho arü ki tha, ‘Nüsa she kurungasolu ching yüang, tüsho tümü dünbanü inü nüsa kilim jihbah.’ Tüsho arünü yü.

⁵Kheaküshe apinü 12 tüsho 3 king ngüm she jude thsü.

⁶Tüsho apinü 5 king ngüm yü tüsho püpürü sühdukde azhipkhi ngü, tüsho apinü arü ki tha, ‘Tümü thsüde nüsa nimung amuyung ha kheak sühdukde azhipkhea?’

⁷Arünü api ki alo, ‘Tümütüsho shenü isa mümulo.’ Apinü arü ki tha, ‘Nüsa she kurungasolu ching yüang.’

⁸Jumonü küyimki arelim kamkhea, kurungasolu putungpuhnü api kimthsübuh ki tha, ‘Rhimorübo jiang, tüsho ashurünü akhuhrü khiungde arü mihkhah dün jihang.’

⁹Tüsho sherü 5 king ching rhimo tankihkheanü mihbüm aban adholi 1 jih.

¹⁰Tüshe küyimki akhuhrü arükheanü, arünü alü ngüpü mükkin thsü. Tüshe arü she abande adholi 1 jih.

¹¹Küyimki arünü ju leangkhikheanü alo putungpuh azhihde atsang,

¹²‘Ashu mihtsürübonü kimkhü 1 lang rhimo, tüsho isa nimung amuyung aninü phude arhimorü lung arübo rukhüh kamshihdo.’

¹³Tüshe apinü arü khülang ki alo, ‘Müyambuh, inü nü ki amülim mürhimo; adholi 1 thsungkheak nünü I ki alokhikhi yung de?

¹⁴Nü yo tümü lanü luang, tüsho tsoang; nü ki jihkhi nangde ashu mihtsürü ki she ajihpü inü mulonglah.

¹⁵Inü I kukruk kheak I lümkhi rhimopü I alim yung de? Yungsho I salamo nüsanü lungkhangla de?’

¹⁶Junangde ashurü ju akhuhrü kambah, tüsho akhuhrü ju ashurü kambah.”

¹⁷Judüki Jisunü Jirusalem lim wutuchoki jingyanrü thürükheak mahne ju limro mungyean behuhbah arü ki tha,

¹⁸“Kheahang, isa Jirusalem lim wutuchoh, tüsho Mihtsürü Tsührü ju amükeam putungrü le yakzan thsangyurübo kilim thsungyuka jihbah; tüsho arünü api sheshihpü bahyukbah,

¹⁹tüsho mükhemükimshihpü, arhapshihpü tüsho ayümkihshihpü khiungkerü kilim jihbah.”

²⁰Judüki Zebedee tsührübo abe, atsührübo bebah api ki arübah khukning tüsho api kilimnü tümükhüh kheang.

²¹Tüsho apinü alibe ki tha, “Nü tümü lunela?” Alibenü api ki alo, “I tsührü mahne ha nü kiulongthsü ching khülang nü khah tsülim tüsho püpü nü khah huzulim binpü mülüjang.”

²²Tüshe Jisunü arü ki tha, “Nüsanü tümü keokhichonü nüsanü mümükheah. Inü ayungpü lakhi pung nüsanü ayungkhukba shi?” Arünü api ki alo, “Isanü akukbah.”

²³Apinü arü ki tha, “Nüsanü I pung chingnü ayungbah, tüshe I khah tsülim yungsho huzulim binpü a inü amülübe yung, tüshe harü ju I Buhnü athsakhamjihrü thsungkheak lah.”

²⁴Küyimki jingyanrü thürünü ha dünkheak sokhea, keoniorü mahne kheak arünü bukakhiuk.

²⁵Jisunü arü rukhüh jimukhung tüsho tha, “Khiungkerü yakzanshuhrübonü arü kurungkheak atungrü thsülah tüsho arü torübonü arü kurungkheak thiyukhümsühmüh ahorichoh de nüsanü mükheahlah.

²⁶Tütüshe nüsa bolung a jude müthsü; tüshe nüsa bolung shepünü atobe kampü künlanü api ju nüsa yamlarü thsüshang.

²⁷Tüsho shepünü nüsa bolung akhuhbuh thsünelanü, api nüsa yo azhorü kamshang —

²⁸Mihtsürü Tsührü she tankihshihpü yung tüshe tankihpü tüsho ahihdo rhokhitpü api rhangdung jihpü arükheah!”

²⁹Tüsho arü Jirikho chingnü wukhiukchoki yimto atonü api dunglim yan.

³⁰Tüsho kheahang, limro yean binkhi müktukrü mahnenü Jisu tsahhochoh de sobah zhide tha, “O Atungpuh, David tsührü, ike muzhoang!”

³¹Judüki botonü ane thürüh tüsho malanpü tha; tüshe anenü alü thsüde zhi, “O Atungpuh, David tsührü, ike muzhoang!”

³²Jumonü Jisunü zhikde zhip tüsho ane jibah tha, “Nüke thsungkheak inü tümü rhimoshihnela?”

³³Anenü api ki alo, “Atungpuh, ike mükbo khimshuhshihnelah.”

³⁴Jumonü Jisunü muzho tüsho ane mükbo qiu. Judüchokinü anenü ngü, tüsho api dunglim yan.