Read Yimchungru Naga Mathi 24 Bible Online

Mathi 24 - Yimchungru Naga bible

Mathi 24

¹Judüki Jisunü wukhiukbah arüngyam chingnü chamachih, tüsho api jingyanrübonü anihbuh ki arüngyam huhpü arü.

²Tüsho Jisunü arü ki tha, “Nüsanü harü alala müngü de? Atsütsü inü nüsa ki thachoh: ha dangpung ching lung khülang she maningde keamabahbah.”

³Kheakü api Oliv Müzüngbo kheak binde alachoki jingyanrübonü api kilim mükhingde arübah tha, “Harü küyimki dünjibanü isa ki thaang? Tüsho nü arükhi le lün akheam amütsan tümü laba?”

⁴Jisunü arü ki alo, “Shenü she nüsa mümülapyukshihpü kurhangang.

⁵Tümüde ahihkhühnü I mung chingnü, ‘I Khrista’ de thade arübah tüsho ahihkhüh mülapyukbah.

⁶Nüsanü thirithsübo tüsho thirithsü düsheakbo sobah, tüshe nüsanü darhunganim; tümüde harü alala adünjibah, tüshe akheam marüyi.

⁷Tümütüsho trükshihnü trükshih, tüsho kiulongthsünü kiulongthsü azhihde wusubah. Tüsho dangpung aban ching khümzung, arüm, tüsho muliuyuk labah.

⁸Harü alala zübe-thsünü tankihkhi labah.

⁹“Judüki arünü nüsa thsümüchipü jihbah tüsho alaksahbah, tüsho I mung dünkheaknü trükshih alalanü nüsa thraneanbah.

¹⁰Tüsho judüki ahihkhühnü akin ching tuklobah, khülangnü khülang thsungyukachihbah tüsho thraneanachihbah.

¹¹Arükchih wukihrü ahihkhüh akhiukbah tüsho ahihkhüh mülapyukbah.

¹²Tümütüsho mihbukmuyuk alü kamkhinü ahihkhüh amuzho rüngde akambah,

¹³tüshe shepünü akheam khiungde arümbanü akhümkhitbah.

¹⁴Tüsho ha kiulongthsü thiyusheak-atsü alomiküp alala ching thiyumütsan thsüde trükshih alala ki thsangyuthsangrabah, tüsho jushu akheam arübah.

¹⁵“Jumonü küyimki nüsanü, Daniel wukihrü hode athakhi athsümünimshihbe athraneanbe amüsüh dangpung ching zhipde angübanü — akherünü anikhitshang —

¹⁶judüki Judea ching larü müzüngbo ching tsoshang.

¹⁷Shepü thüyammün kheak lanü api yam chingnü tümükhüh lupü düyüki.

¹⁸Tüsho shepü thulu ching lanü nihbuh khimmih lupü alode düyü.

¹⁹Tüshe jurü nimungbo ching mübünkeangde alarübo tüsho khungarü niuh duhde alarübo ayokhe!

²⁰Tüsho nüsa tsopü ju tsüngkam yungsho Amuni müthsüpü tamkhüntamnüang.

²¹Tümüde judüki alomiküp tankihbah ha kim khiungde mülakhi yungsho küyimkishe mülalopü lakhi thsümütsüato labah.

²²Jurü nimungbo mükhikkheamkhülaa, sheshe rhangdung mülade alabah, tüshe amokhitrübo thsülimnü jurü nimungbo khikkheamjihbah.

²³Khürünü nüsa ki ‘Kheahang, ha kheak Khrista lah!’ yungsho ‘Ju ching api lah!’ de thasho ju dükin.

²⁴Tümütüsho arükchih Khristabo tüsho arükchih wukihrübo akhiukbah tüsho kuksho amokhitrü she bede mülapyukpü amütsan atobe tüsho amüyinsahbebo rhimobah.

²⁵Kheahang inü nüsa ki amüngühnü thado.

²⁶Jumonü arünü nüsa ki, ‘Kheahang, api loshelo ching lah!’ de thasho duwukhiuk; yungsho ‘Kheahang, api alungbe khiungshakbo ching lah!’ de thasho ju dükin.

²⁷Tümüde aniakhiuklimnü chinchobe arübah aniyüzahlim phürapa yüshihkhi nangde Mihtsürü Tsührü arükhi labah.

²⁸Tümütüsho kürü ching ashemibo abanü, ju ching müleangbo shomukhungbah.

²⁹“Jurü nimungbo ching thsümütsü-ato dunglim yanalünde ani mitingde akambah, tüsho khinunü ayin müjihde akambah; thüning chingnü chiningbo keamkhibah, tüsho thüning sühmühbo niukbah.

³⁰Judüki Mihtsürü Tsührü amütsan thüning ching akhiukbah, tüsho alomi trük alalanü atripbah, tüsho arünü Mihtsürü Tsührü thüning kheak amo ching wu tüsho müretah ato ching arükhi ngübah.

³¹Apinü api yunirübo hulipungpung düsheak atonü mütde ayüshihbah, tüsho arünü api yo amokhitrübo alomi akheamnü khülim khiungde thrip phüyi chingnü abemukhungbah.

³²“Kheakü khubasodung chingnü amütsan ha anikhitang: Küyimki adübit chinde ayü akhiukbanü, muzhu thünindo de nüsanü mükheahchoh.

³³Junangde küyimki nüsanü harü alala ngübanü, api khimdopü ki thüninde lah de mükheahang.

³⁴Atsütsü inü nüsa ki thachoh, harü alala müdünjiyikia ha lün hode mutso.

³⁵Thüning tüsho alomi hode atsobah, tüshe I yubo a küyimkishe hode mutso.

³⁶“Tüshe ju nimung tüsho kim ju Abuh kheak hode, yinmi yunirübo yungsho atsührü yungsho shenü she mümükheah.

³⁷Noa nimungbo ching nangde, Mihtsürü Tsührü arükhi labah.

³⁸Tümütüsho keking müngüh nimungbo ching arünü Noanü sangkung ching yüzahkhi nimung khiungde tsühyungde tüsho yamkhün thsüde alakheah;

³⁹tüsho keking arübah arü alala hande mutsoyi khiungde mümükheah, junangde Mihtsürü Tsührü arükhi labah.

⁴⁰Mihtsürü mahne thulu ching labah; khülang bea lubah tüsho khülang bahjihbah.

⁴¹Aliberü mahne thsam ching hi chude alabah; khülang bea lubah tüsho khülang bahjihbah.

⁴²Jumonü kurhangde lang, tümütüsho nüsa Atungpuh arüpü kim nüsanü mümükheah.

⁴³Tüshe ha mükheahang, thüyam putungrünü ahührü arüpü kim mükheahkhülaa, apinü aheangde alabah tüsho api yam müchakashungshihpü lakheah.

⁴⁴Jumonü nüsa she atündoang, tümüde nüsanü amülümkhi kim khülang ching Mihtsürü Tsührü arübah.

⁴⁵“Judüasho nihbuh putungrünü arü kilim kim dükdü ching tsühyungbe jihshihpü api yamlarübo kurungkheak zojihkhi akin-lakhi tüsho lümlung lakhi yamlarü ju she a?

⁴⁶Nihbuh putungrü arüchoki, ju rhimode alakhi ngürü yamlarü asühpü.

⁴⁷Atsütsü inü nüsa ki thachoh, apinü anihbuh kukrukbo alala kurungkheak api zojihbah.

⁴⁸Tüshe ju yamlarü mihbukmuyuk lasho tüsho nihbuh küdahnü, ‘I putungrü arüpü ruhde lah’ de thasho,

⁴⁹tüsho rukhüh yamlarübo lakpü tankihsho tüsho amüshangrü lung tsühyungsho,

⁵⁰yamlarü putungrü ju apinü amülümkhi nimung tüsho mümükheahkhi kim khülang ching arübah,

⁵¹api adütre kamde akhapnakbah tüsho yiuhkhaprü lung chamyukjihbah. Ju ching atripkhi tüsho hü mütrütkhi labah.