Read Yimchungru Naga Mathi 25 Bible Online

Mathi 25 - Yimchungru Naga bible

Mathi 25

¹“Judüki yinmi kiulongthsü ju atsangkhit anünürü 10 arü tsünpung shuhbah yamkhün-kamrü mihleang yükhi kiphahde alabah.

²Kheakü arü 5 lümlung larü, tüsho 5 lümlung mülarü lakheah.

³Lümlung mülarübonü moke alü mühande arü tsünpung lu,

⁴tüshe lümlung larübonü arü tsünpungbo lungnü arü langpung ching moke han.

⁵Tüshe küyimki yamkhün-kamrü ruhde alakhea, arü alala ane tüsho yapshede yü.

⁶Tsüngphulung ching azhikhi khülang so: Kheahang, yamkhün-kamrü arüchoh; api leangpü wukhiukang!

⁷Judüki atsangkhit anünürü alala asürü tüsho arü tsünpung atünado.

⁸Tüsho lümlung mülarübonü lümlung larübo ki tha, ‘Isa kilim nüsa moke anüknük jihang, tümüde isa tsünpung mütmuroh.’

⁹Tüshe lümlung larübonü alo, ‘Muh, isa le nüsa chido thsungkheak musuhdah; judüpü dün a ayinrü kilim yübah nüsa thsungkheak thuloang.’

¹⁰Tüsho küyimki athulopü yükhea, yamkhün-kamrü arü, tüsho thsakhama larübo ju api leangpü arhangrü thünio ching yüzah; tüsho khimdopü rihabah.

¹¹Ju dunglim atsangkhit anünürü püpürü ju she arübah tha, ‘Atungpuh, Atungpuh, isa kilim khimshuhjang!’

¹²Tüshe apinü tha, ‘Atsütsü inü nüsa ki thachoh, inü nüsa mümükheah.’

¹³Jumonü kurhangang, tümüde Mihtsürü Tsührü arüpü nimung yungsho kim nüsanü mümükheah.

¹⁴“Tümütüsho yinmi kiulongthsü ju mihtsürü khülangnü ayamlarübo jibahle api kukrukbo zojihbah limshu lomi ching hantsah yükhi kiphahlah.

¹⁵Tüsho apinü mihbüm aban akukkhi thülün khülang kilim suna shonak 5000 jih, püpü kilim 2000 jih, tüsho püpü khülang kilim 1000 jih; tüsho apinü hantsah yü.

¹⁶Judüki suna shonak 5000 leangkhibuhnü yübah jurünü shothsübu, tüsho püpü alü 5000 kamshih.

¹⁷Tüsho 2000 leangkhibuhnü she 2000 alü kamshih.

¹⁸Tüshe shepünü 1000 leangkhikheanü alo kiubah api putungrü sho rama zo.

¹⁹“Kim ashang dunglim jurü yamlarübo putungrü arü tüsho arübo lung khezükhedode mütsanmüküh.

²⁰Jumonü shepünü suna shonak 5000 leangkhikheanü püpü suna shonak 5000 lude arübah tha, ‘Atungpuh, nünü I kilim suna shonak 5000 jih; kheangang, inü ju ching suna shonak püpü 5000 alü thsüjihdo.’

²¹Api putungrünü anihbuh ki tha, ‘Tsüde rhimodo, thiyuro yamlarü atsü; nünü kukruk anükhüh kurungkheak thiyuro lado, inü kukruk ahihkhüh kurungkheak nü yakzanshuhrü kamshihbah. Nü putungrü asühpung ching yüzahang.’

²²“Shepünü suna shonak 2000 leangkhikheanü arübah tha, ‘Atungpuh, nünü I kilim suna shonak 2000 jih; kheahang, inü ju ching suna shonak püpü 2000 alü thsüjihdo.’

²³Api putungrünü anihbuh ki tha, ‘Tsüde rhimodo, thiyuro yamlarü atsü; nünü kukruk anükhüh kurungkheak thiyuro lado, inü kukruk ahihkhüh kurungkheak nü yakzanshuhrü kamshihbah. Nü putungrü asühpung ching yüzahang.’

²⁴“Judüki suna shonak 1000 leangkhibuhnü arübah tha, ‘Atungpuh, nü amüküp mihtsürü ah de inü mükheahlah; küching nünü mümükheankhea, ju ching nünü yimluchoh, tüsho küching nünü müjih muhiukhea, ju ching nünü hanmukhungchoh.

²⁵Jumonü I trede alakheah, tüsho yübah nü yo suna shonak alo ching ramkheah. Kheahang, nü yo ha lah.’

²⁶“Tüshe api putungrünü anihbuh ki tha, ‘Nü mihbukmuyuk tüsho yomuhyothsün yamlarü, inü mümükheankhi ching inü yimluchoh tüsho müjih muhiupung ching hanmukhungchoh de nünü mükheahlah.

²⁷Jumonü nünü I sho ju shoyam ching zobeah tüsho I arüchoki sholü bede inü aleangkhipü lado.

²⁸Jumonü api kheaknü suna shonak luang, tüsho ju shonak 10,000 labuh kilim jihang.

²⁹Tümüde shepü lanü, alü jihlobah, tüsho api muzhomopungde alabah; tüshe shepü mülanü, api lakhi she lude atsobah.

³⁰Tüsho alü-müthsükhi yamlarü ju wungdo amiting ching jipa bahang, ju ching atripkhi tüsho hü mütrütkhi labah.’

³¹“Küyimki Mihtsürü Tsührü, api lung amüsüh yunirübo alala bebah müretahkhi ching arübanü, nihbuh müretah kiulongthsü-binkiu kheak api binbah.

³²Trükshih alala api miki mukhungbah, tüsho namfimihnu neakrünü nihbuh namfimihnubo chingnü mihnubo büthsükhi nangde apinü arü khülang chingnü khülang büthsübah.

³³Apinü namfimihnubo api khah tsülim, tüsho mihnubo huzulim zobah.

³⁴Judüki kiulongthsüpuhnü tsülim larü ki thabah, ‘Arang, nüsa I Buhnü müngühjihrübo, alomiküp thrüntanchokinü nüsa thsungkheak thsakhamkhi kiulongthsü yamrüplurüp luang:

³⁵tümüde I khümde alakheah tüsho nüsanü I kilim jim kip; I kethüride alakheah tüsho nüsanü I kilim ayungbe duh; I hanrü lakheah tüsho nüsanü I beyuk;

³⁶I bünkeang lakheah tüsho nüsanü I phuyujih; I tukthsüde lakheah tüsho nüsanü I mütrü; I rihyam ching lakheah tüsho nüsanü I rhuakheah.’

³⁷“Judüki thiyuro-lungkirünü api ki alode athabah, ‘Atungpuh, küyimki isanü nü khümde angükhea tüsho nü yimkipkhea, yungsho kethürikhea tüsho ayungbe nü duhkhea?

³⁸Küyimki isanü nü hanrü thsüde angükhea tüsho beyukkhea, yungsho bünkeang labah nü phuyujihkhea?

³⁹Yungsho küyimki nü tukthsükhea, yungsho rihyam ching lakhi ngübah isanü nü rhuakheahkhea?’

⁴⁰“Kiulongthsüpuhnü arü ki alobah, ‘Atsütsü inü nüsa ki thachoh, nüsanü tümüpürü I keoniorü bolung aninibe thsungkheak rhimokheanü, nüsanü I thsungkheak rhimodo.’

⁴¹“Judüki apinü huzulim larü ki thabah, ‘Nüsa arimri tüsho api yunirübo khilim thsakhamkhi akheam müla motru ching muthrumüneana bahrübo, I kinü tsoang:

⁴²tümüde I khümde alakheah tüshe nüsanü I kilim jim mükip; I kethüride alakheah tüshe nüsanü I kilim ayungbe muduh;

⁴³I hanrü lakheah tüshe nüsanü mübeyuk, bünkeang lakheah tüshe nüsanü I muphuyujih, tukthsüde tüsho rihyam ching lakheah tüshe nüsanü rhuamükheah.’

⁴⁴“Judüki arünü she api ki alobah, ‘Atungpuh, küyimki isanü nü khümde yungsho kethüride yungsho hanrü thsüde yungsho bünkeang yungsho tukthsüde yungsho rihyam ching lade ngübah nü mürungkhea?’

⁴⁵Apinü arü ki alode athabah, ‘Atsütsü inü nüsa ki thachoh, nüsanü tümüpürü I keoniorü bolung aninibe thsungkheak mürhimokheanü, nüsanü I thsungkheak mürhimo.’

⁴⁶Judüki harü akheam müla thsümüchi ching yüshihbah, tüshe thiyuro-lungkirü a akheam müla rhangdung ching yübah.”