Read Yimchungru Naga Mathi 26 Bible Online

Mathi 26 - Yimchungru Naga bible

Mathi 26

¹Küyimki Jisunü harü alala thakhamkhea, apinü ajingyanrübo ki tha,

²“Nüsanü mükheahlah, nimung mahne dunglim phungho-thünio labah, tüsho Mihtsürü Tsührü sangkim ching yümkihpü jihbah.”

³Judüki amükeam putungrübo, athrütrübo tüsho mihtsürübo kurung azothsürübo Kaifa de ajikhi achangbe amükeamrü yam ching mukhung,

⁴tüsho arünü rük thsüde Jisu rama lubah alaksahpü lümkhi thsü.

⁵Tüshe arünü tha, “Thünio kim ching a düh, jude yungsho mihtsürü bolung arhunganimbah.”

⁶Tüsho küyimki Jisu ju Bethani ching aphamrü Simon yam ching lakhea,

⁷aliberü khülang lung-langpung chingnü amo-achak rhümthünea müdangke lubah arü, tüsho api dükhüm ki binde alachoki aku kheak dungkihjih.

⁸Tüshe küyimki api jingyanrübonü ju ngükhea, arünü bukakhiukde tha, “Tümü thsükhi ha phinphurukcho?

⁹Tümütüsho ha rhümthünea müdangke ahihdo mo yinbah zhochihrü kilim jihbeah.”

¹⁰Tüshe küyimki Jisunü ju mükheahkhea, apinü arü ki tha, “Tümü thsükhi nüsanü alibe küpkhuk jihcho? Tümütüsho anihbenü I thsungkheak rhimo atsü rhimodo.

¹¹Tümütüsho nüsa lung zhochihrü kamruhroro labah, tüshe I a kamruhroro müla.

¹²Tümüde I pang kheak ha rhümthünea müdangke bukkihkhinü, alibenü I mi bahpü thsungkheak rhimodo.

¹³Atsütsü inü nüsa ki thachoh, alomiküp kürü ching ha thiyusheak-atsü thsangyuthsangrabanü, ha liberünü tümü rhimokheanü anihbe mümihpü thsüde athabah.”

¹⁴Judüki thürükheak mahne bolung khülang, Juda Iskariotnü amükeam putungrübo ki yü

¹⁵tüsho tha, “Inü api nüsa kilim jihsho nüsanü I kilim tümü jihpü mulongla?” Tüsho arünü api kilim shotoyinchi 30 khekhita jih.

¹⁶Jumonü apinü ju kim ching api yinatsühpü kim atsü yim.

¹⁷Kheakü phaüm muyukkhi thünio akhuhbe nimung jingyanrübonü arübah Jisu ki tha, “Nü thsungkheaknü phungho-thünio tsühpü isanü küching thsakhamshihnela?”

¹⁸Tüsho apinü tha, “Kiuto ching mihtsürü khürü ki yübah thaang, ‘Thsangyurünü thachoh, “I kim thüninde lah; I jingyanrübo tüsho inü nü yam ching phungho-thünio labah.”’”

¹⁹Jumonü Jisunü khuhlangahuhkhi nangde jingyanrübonü rhimo; tüsho arünü phungho-thünio thsakham.

²⁰Küyimki arelim kamkhea, apinü thürükheak mahne lung bin.

²¹Arü yimtsühde alachoki, apinü tha, “Atsütsü inü nüsa ki thachoh, nüsa bolung khülangnü I yinatsühbah.”

²²Arünü khide mulong rozhak, tüsho arü abannü api ki thapü tankih, “Atungpuh, ju I a shi?”

²³Judüki apinü alo, “Shepü I lung phuru ching akhah amayukchonü junü I yinatsühbah.

²⁴Mihtsürü Tsührü a api dünkheak thrüta lakhi nangde yüchoh, tüshe shepünü Mihtsürü Tsührü yinatsühchonü ju mihtsürü are! Ju mihtsürü a api thsungkheaknü müzübejungkhi atsübe lado.”

²⁵Judüki api yinatsühpü lakhi Judanü tha, “Thsangyurü, ju I a shi?” Apinü anihbuh ki tha, “Nünü thado.”

²⁶Arü yimtsühde alachoki, Jisunü yikhap lubah müngühjih tüsho yihnak, tüsho jingyanrübo ki jihde tha, “Luang tüsho tsühang; ha I pang ah.”

²⁷Jushu apinü pung ju lu, tüsho makshe jihbah arü ki jihde tha, “Nüsa alala ha chingnü yungang.

²⁸Tümüde ha aso tangzüngkhi, ahihkhüh neak bahjihpü bukkhi I thiyih ah.

²⁹Tüshe inü nüsa ki thachoh, inü nüsa lung I Buh kiulongthsü ching kurungaso ke aso muyungyi khiungde kurungaso ke muyung.”

³⁰Tüsho küyimki arünü khün thsükheanü Oliv Müzüng lim yü.

³¹Judüki Jisunü arü ki tha, “Khihre nüsa alala I dünkheaknü atsomüzütbah, tümüde ha thrüta lah: ‘Inü namfimihnu neakbuh shikbah, tüsho namfimihnu boto tsomüzütbah.’

³²Tüshe I alode asürü dunglim, I nüsa müngüh Galilee ching yübah.”

³³Peternü api ki alo, “Nü dünkheaknü alala tsomüzützüt she, inü a küyimkishe mutso.”

³⁴Jisunü api ki tha, “Atsütsü inü nü ki thachoh, khihre thunu mukhungyide, nünü mahsam ki I malokhide alabah.”

³⁵Peternü alo, “I nü lung ashepü thsüthsü she, inü nü malokhide müla!” Tüsho junangde jingyanrü alalanü tha.

³⁶Judüki Jisunü arü lung Gethsemane de ajikhi dangpung ching arü, tüsho jingyanrübo ki tha, “I ju ching yübah tamkhüntamnüchoki ha kheak bincholang.”

³⁷Apinü anihbuh lung Peter tüsho Zebedee tsührü mahne bea lu tüsho mulong rozhakde sükde lümthsünüpü tankih.

³⁸Apinü arü ki tha, “I me ashepü thsüde mulong rozhaklah. Nüsa ha kheak I kheahde aleangang.

³⁹Apinü anükhüh limshude yübah amiro mükhüm tüsho tamkhüntamnüde tha, ‘O Abuh, kuksho ha pung I kheaknü luakhinjang; judüalalashe I lümkhi yung, tüshe nü lümkhi ah.’

⁴⁰Judüki apinü jingyanrübo kilim arü tüsho arü yapshea ngü, tüsho Peter ki tha, ‘Nüsanü I lung kimkhü 1 she kurhangde mülakhuk de?

⁴¹Junangde nüsa rükaki ching müyüzahpü thsüde kurhangang tüsho tamkhüntamnüang. Menü a künlah tüshe shih ching reangmüzah.’

⁴²Apinü mahne kipü yülo tüsho tamkhüntamnüde tha, ‘O Abuh, inü muyungde ha pung luakhinbah mutsokhuksho, nü lümkhi thsang.’

⁴³Küyimki api alode arükhea, kheaküshe arübo yapshea apinü ngü, tümütüsho arünü arü mük mürheakkhuk.

⁴⁴Jumonü apinü arü zojihbah alode yü, tüsho thiyubo ju ruk lang mahsam kipü tamkhüntamnü.

⁴⁵Judüki apinü ajingyanrübo kilim arübah tha, ‘Nüsa kheakü khiungde sühakhimde yapla de? Kheahang, kim thünina lah, tüsho Mihtsürü Tsührü aneakrübo khah ching jihdo.

⁴⁶Asürang, isa yüanü. Kheahang, I yinatsührü ha kheak lah.’ ”

⁴⁷Api thade alachoki, thürükheak mahne bolung khülang, Juda, anihbuh lung amükeam putungrübo tüsho mihtsürü yo azothsürübonü athiyikhi nukshangbo le shinuk shuhrü boto ato bebah arü.

⁴⁸Kheakü api yinatsühbuhnü arü ki amütsan jihde tha, “Shepü kheak inü müthsüpbanü, api ah; api ramang.”

⁴⁹Judüki apinü niokheamde Jisu kilim yü tüsho tha, “Salüm, Thsangyurü!” tüsho api müthsüp.

⁵⁰Tüsho Jisunü api ki tha, “Müyambuh, nü tümü thsüpü arükhea?” Judüki arünü arübah Jisu rama lu.

⁵¹Zukleangnü Jisu lung bekhi khülangnü nukshang dukkhitbah achangbe amükeambuh yamlarü nuku thsüpkhijih.

⁵²Jisunü api ki tha, “Nü nukshang ayukpung ching yukloang, tümütüsho nukshang ahorirü alala nukshangnü ashebah.

⁵³Kheakü I kilim yunirü boto thürükheak mahne kheaknü she alü arüshihpü inü I Buh ki mütamkhüntamnükhuk de nüsanü lümcho de?

⁵⁴Dale tüsho judüpü thsüde amüsühyu küde thsah adünjiba?”

⁵⁵Ju kim ching Jisunü boto ki tha, “Nüsanü jangkhijangrarü khülang azhihkhi nangde nukshangbo le shinukbo shuhbah I rampü arükhea de? Nimung aban arüngyam ching thsangyude I nüsa lung bindo, tüsho nüsanü I müram.

⁵⁶Tüshe ha alala wukihrübonü thrüta zokhi dünjipü lakheah.” Judüki jingyanrübo alalanü api bahbah tso.

⁵⁷Tüsho Jisu ramrübonü api ju achangbe amükeambuh Kaifa kilim, athrütrü le azothsürübo mukhungpung bebah yü.

⁵⁸Tüshe Peternü limshu chingnü yande achangbe amükeambuh yam ki yü. Tüsho apinü yüzahbah tümü dünjibanü kheahde aheangrü lung bin.

⁵⁹Kheakü amükeam putungrübo, azothsürübo, tüsho kiuthsü-binkiu alalanü api sheshihpü Jisu azhihde arükchih thiyumütsan yim,

⁶⁰tüshe tümü müyimkhit. Arükchih thiyumütsan ahihkhüh arürü she, arünü müyimkhit. Tüshe akheam ching thiyumütsan mahne arü

⁶¹tüsho tha, “Inü Thrünpuh arüngyam thsümünimbah nimung mahsam chingnü athsülokhukbah de ha buhnü thado.”

⁶²Achangbe amükeambuhnü wusu tüsho api ki tha, “Nünü maloba de? Harü mihtsürübonü nü azhihde thiyumütsan thsükhibo ha tümü a?”

⁶³Tüshe Jisunü zhikde la. Tüsho achangbe amükeambuhnü api ki tha, “Nü Thrünpuh tsührü Khrista a shi yungnü isa ki thaang de inü arhang Thrünpuh tamde nü ki thachoh.”

⁶⁴Jisunü api ki alo, “Nünü thado. Tüshe inü nüsa ki thachoh, ha dunglim Mihtsürü Tsührü ju Wuto khah tsülim binbah yinmi amo ching arükhi nüsanü angübah.”

⁶⁵Judüki achangbe amükeambuhnü akhim thorüpde tha, “Apinü mükhemürang thado! Isanü thiyumütsan alü yihnüpü müla! Nüsanü kheakü apinü mükhemürangkhi sodo!

⁶⁶Nüsanü tümü lümcho?” Arünü alo, “Api ashepü thülünlah.”

⁶⁷Judüki arünü api amiro kheak mukhiukkih tüsho lak; tüsho püpürünü arü khah zhimpungbah api shik,

⁶⁸tüsho tha, “Isa ki müchitang, Khrista! Nü shikcho ju she a?”

⁶⁹Kheakü Peter ju wungdo limkhuh binde alakheah. Tüsho yamlarü aliberü khülangnü arübah api ki tha, “Nü she Galileerü Jisu lung lakheah.”

⁷⁰Tüshe apinü arü alala miki arochihde tha, “Nünü tümü thachonü inü mümükheah.”

⁷¹Tüsho küyimki ripit-limro lim yükhea, aliberü püpünü api ngübah ju kheak larü ki tha, “Ha buh she Nazarethrü Jisu lung lakheah.”

⁷²Tüshe kheaküshe apinü thiyuchihchimde arochih, “Inü mihtsürü ju mümükheah!”

⁷³Tüsho anükhüh labah ju ki zhiprünü arübah Peter ki tha, “Tsükjide nü she arü bolung belah, tümütüsho nü yunü nü mütsanchoh.”

⁷⁴Judüki apinü athruajide tüsho thiyuchihchimde athapü tankih, “Inü mihtsürü ju mümükheah!” Tüsho judüakede thununü khung.

⁷⁵Tüsho Jisunü api ki thakhi yu Peternü lümkhit, “Thunu mukhungyide nünü mahsam ki I malokhide alabah.”