Read Yimchungru Naga Mathi 5 Bible Online

Mathi 5 - Yimchungru Naga bible

Mathi 5

¹Jisunü yimto ato ngü tüsho awung kheak yükihbah bin. Api jingyanrübo anihbuh mükamde arü,

²tüsho apinü arü thsangyupü tankih:

³“Me ching zholümde alarübo asühpü, tümüde yinmi kiulongthsü arü yo.

⁴Mitriprübo asühpü, tümüde arübo mulong shukheambah.

⁵Tsüyihrübo asühpü, tümüde arünü alomi yamrüplurüp lubah.

⁶Thiyuro-lungki thsungkheak khümkethürirü asühpü, tümüde arü bukthsübah.

⁷Mihmüthsümrü asühpü, tümüde arü ki mihmüthsüm huhbah.

⁸Mulong müsühde alarübo asühpü, tümüde arünü Thrünpuh ngübah.

⁹Mungtsü thsürübo asühpü, tümüde arü ki Thrünpuh tsührübo de ajibah.

¹⁰Thiyuro-lungki dünkheaknü thsümüchirübo asühpü, tümüde yinmi kiulongthsü arü yo.

¹¹“I dünkheaknü arünü nüsa mükhemükimde thsümüchichoki tüsho arükchihnü nüsa azhihde amütsü alala thachoki nüsa asühpü.

¹²Asühachihang tüsho asühang, tümütüsho yinmi ching nüsa thsambah ato lah, tümüde nüsa müngüh larü wukihrübo arünü hanangde thsümüchikheah.

¹³“Nüsa alomi thimi ah; tüshe thimi ju amüsüpbe dükheakabahsho, ju küde thsah amüsüpshihba? Ju tümü thsungkheak she atsü müla, ju abahbah tüsho mihtsürübonü ajungbah.

¹⁴Nüsa alomi ayinatrüm. Awung kheak lakhi kiuto amüyimpü mukuk.

¹⁵Yungsho shenü she tsün takkihbah muluknü hüpdoa muzochoh; tüshe adubopung kheak zochoh, tüsho junü thüyam ching larü alala kilim yinshihchoh.

¹⁶Mihtsürübo miki nüsa ayin tahshang, junangde arünü nüsa rhimo atsü ngübah tüsho yinmi ching nüsa Abuh müretahbah.

¹⁷“I ju yakzan tüsho wukihrübo dükheakshihpü arükheah de dülüm. Adükheakshihpü yung tüshe adünjishihpü I arükheah.

¹⁸Inü nüsa ki thiyuro thachoh, thüning tüsho alomi la khiungde, yakzan ching lakhi thiyuji aninibe yungsho athrütkhi aninibe ju müdünjiyikia müdükheak.

¹⁹Shepünü harü thiyukhüm bolung aninibe thsümünimcho, tüsho jude athsüpü püpürü ki thsangyuchonü yinmi kiulongthsü ching aninibe de ajibah, tüshe shepünü rhimocho tüsho harü yukhümbo thsangyuchonü yinmi kiulongthsü ching atobe de ajibah.

²⁰Tümüde nüsa thiyurolungkinü Pharisirü tüsho yakzan thsangyurü müzhihosho tsükjide yinmi kiulongthsü ching müyüzah de inü nüsa ki thachoh.

²¹“Mihtsürübo ki adüso ha thakhi nüsanü sodo, ‘Dülaksah, tüsho khürünü laksahsho mahkhap ching bedarübah.’

²²Tüshe shepünü nihbuh keoniorü ki bukakhiukbanü mahkhap ching bedarübah. Shepünü nihbuh keoniorü ki makharü de athabanü kiuthsü-binkiu miki bedarübah, tüshe shepünü aduhrü de athabanü thsümüchi motru ching atrebe labah.

²³Jumonü nünü kingaün sadam ki thsambah lude arübah, ju ching nü keoniorünü nü azhihkhi tümükhüh lümkhitsho,

²⁴nü thsambah ju kingaün sadam ki zoang, tüsho yübah nü keoniorü ki mungtsübah alode arang tüsho nü thsambah jihang.

²⁵“Api lung limro lachoki nü azhihrü kheak nahde arihang, jude yungsho nü azhihrünü nü ju mahkhaprü kilim jihbah, mahkhaprünü atorü kilim jihbah, tüsho nü rihyam ching yukbah.

²⁶Inü nüsa ki thiyuro thachoh, nünü akheamkhibe shonak khiungde müjihyikia nü ju chingnü makhiuk.

²⁷“Nüsanü ha thakhi sodo, ‘Müzammüram düyihbeak.’

²⁸Tüshe khürünü aliberü kheak mürühde kheahsho api mulong chingnü anihbe kheak müzammüramdo de inü nüsa ki thachoh.

²⁹Nü mük tsülimnü nü neak yihbeakshihsho, ju khünkhita bahang. Nü pang alala thsümüchipung ching jipyukpü dün a nü jingkhah khürü dükheakkhi atsübe ah.

³⁰Tüsho nü khah tsülimnü nü neak yihbeakshihsho, ju lipkhia bahang. Nü pang alala thsümüchipung ching jipyukpü dün a nü jingkhah khürü dükheakkhi atsübe ah.

³¹“Hade thade la, ‘Khürünü nihbuh niuberü bahsho achamachihkhi jingyan-hüm anihbe kilim jihbeah.’

³²Tüshe inü nüsa ki thapü ju khürünü yamkhün ching thiyuro mülakhi kheak hode nihbuh niuberü bahsho alibe ju müzammüramrü kamshihchoh, tüsho shepünü abahkhi liberü lubanü müzammüram yihbeakchoh.

³³“Kheaküshe adüso mihtsürübo ki thakhi nüsanü sodo, ‘Nünü thiyuchihchimkhi düthsümünim, tüshe nünü Atungpuh ki thiyuchihchimkhi ju rhimoang.’

³⁴Tüshe inü nüsa ki thachoh, yinmi tamde thiyuchihchim düthsü, tümüde ju Thrünpuh kiulongthsü-binkiu ah;

³⁵yungsho alomi dütam, tümüde ju api jing dubopung; yungsho Jirusalem dütam, tümüde ju ato kiulongthsürü kiuto ah.

³⁶Tüsho nü ku tamde thiyuchihchim düthsü, tümüde nünü kuyü büm khülang she amüye yungsho amürak thsüthsü müthrünkhuk.

³⁷Tüshe nünü am tüsho am dang, tüsho yung tüsho yung dang; tümükhüh ha hobah lasho ju amütsübe limnü arüchoh.

³⁸“Hade athakhi nüsanü sodo, ‘Mük müthri mük, tüsho hü müthri hü.’

³⁹Tüshe amütsü mihtsürü ki dathrihlo de inü nüsa ki thachoh. Khürünü nü müchip tsülim damsho, api kilim khülim she leangjang.

⁴⁰Khürünü nü mahkhappung ching bede yübah nü pangkhümpü alungbe lunesho, apinü nü pangkhümpüniuniu she lushang.

⁴¹Khürünü nü ki mail 1 tsahpü nimkihsho, api lung mail 2 tsahang.

⁴²Khürünü nü ki tümükhüh kheangsho api kilim jihang; khürünü nü ki tümükhüh nipnesho, api ki nipjang.

⁴³“Hade athakhi nüsanü sodo, ‘Nü yamhingrü muzhoang tüshe nü riri thraneanang.’

⁴⁴Tüshe inü nüsa ki thachoh: Nü riribo muzhoang tüsho nü thsümüchirü thsungkheak tamkhüntamnüjang,

⁴⁵junangde nüsa ju yinmi ching nüsa Abuh tsührübo thsübah. Apinü amütsü tüsho atsü kheak ani akhiuk-shihchoh, tüsho thiyuro-lungkirü le thiyuro-mülungkirü kheak tsüng arüshihchoh.

⁴⁶Nüsa muzhorü ki nüsanü muzhosho, nüsa tümü thsambah ngüba? Ruk-threrübonü jude rhimochoh yung de?

⁴⁷Nüsanü nüsa keoniorübo ki lang asukachihsho, püpürü kheaknü alü nüsanü tümü rhimocho? Amükinrübonü she ju rhimochoh yung de?

⁴⁸Jumonü yinmi ching nüsa Abuh khiukdahkhi nangde nüsa khiukdahde laang.