Read Yimchungru Naga Mathi 8 Bible Online

Mathi 8 - Yimchungru Naga bible

Mathi 8

¹Küyimki api müzüng kheaknü akikhea, yimto atonü api yande yü.

²Judüki aphamrü mihtsürü khülang arü tüsho api miki khukningbah tha, “Atungpuh, nünü mulongsho I müsühkhitjang.”

³Jisunü api khah chunga yüshihbah mihtsürü ju qiude tha, “Inü mulonglah; müsühde kamang.” Tüsho zukleangnü api apham ju nguabah.

⁴Tüsho Jisunü api ki tha, “Aniang, nünü she ki dütha; tüshe nü limro ching yüang, amükeamrü ki nü huhang, tüsho Mosa yukhüm yande arü ki mütsan thsüpü thsambah jihang.”

⁵Küyimki Jisu Kapernaum ching yüzahkhea, Roman torü khülang api ki arübah mushu,

⁶“Atungpuh, I yamlarü maphapkhukde thüyam ching atrebe thsünüde lah.”

⁷Tüsho Jisunü api ki tha, “I arübah tüsho api angubah.”

⁸Atobuhnü alo, “Atungpuh, nü I yam ching azahpü thsüde I müthülün. Tüshe thiyu khülang lang thaang, tüsho I yamlarü angubah.

⁹Tümüde I she I kumung atorü bukkhüp lakhi mihtsürü khülang, tüsho I bukkhüp bonungrübo lah. Inü khülang ki, ‘Yüang,’ de thasho api yüchoh, tüsho khülang ki, ‘Arang,’ de thasho api arüchoh. Inü I yamlarü ki, ‘Ha rhimoang,’ de thasho apinü rhimochoh.”

¹⁰Küyimki Jisunü ha sokhea, api müyinsah tüsho api dunglim yanrübo ki tha, “Inü nüsa ki thiyuro thachoh, ha ruk akin ato lakhi inü Israel ching müngü.

¹¹Tüsho aniakhiuklim le aniyüzahlimnü ahihdo arübah yinmi kiulongthsü ching Abraham, Isak, tüsho Jakob ki binbah de inü nüsa ki thachoh.

¹²Tüshe kiulongthsü ching larübo a amiting ching yankhita bahbah. Ju ching atripkhi tüsho hü mütrütkhi labah.”

¹³Judüki Jisunü atobuh ki tha, “Nü limro ching yüang, tüsho nünü akinkhi nangde nü thsungkheak ju rhimoshang.” Tüsho ju kim chingnü api yamlarü ju nguabah.

¹⁴Küyimki Jisu ju Peter yam ching arükhea, aniube abe phütsaknü tukthsüde ayapkhi apinü ngü.

¹⁵Apinü alibe khah qiu, tüsho anihbe kheaknü phütsak tsoabah. Jushu alibe asürü tüsho arü mozümodoa kip.

¹⁶Küyimki arelim kamkhea, arünü api kilim amünean me yüzahkhi ahihdo bebah arü. Apinü thiyu khülangnü mebo yankhit, tüsho tukthsürü alala thsüngu,

¹⁷junangde Isaia wukihrünü athakhi dünjipü lakheah: “Apinü isa thsünübo lu tüsho isa tukthsübo han.”

¹⁸Küyimki Jisunü api mükamde yimto ato ngükhea, apinü püpü thrip akhinpü thiyukhüm jih.

¹⁹Judüki yakzan thsangyurü khürü arübah api ki tha, “Thsangyurü, nü kürü ching yübanü inü nü yanbah.”

²⁰Tüsho Jisunü api ki alo, “Rimrebo lungkhünbo lah, tüsho wuhnubo asapbo lah, tüshe Mihtsürü Tsührü a ku alampung müla.”

²¹Judüki api jingyanrü püpü arübah tha, “Atungpuh, I akhuhde yübah I buh kiuyuka bahanü.”

²²Tüshe Jisunü api ki alo, “I dunglim yanang, tüsho asherünü arü asherü kiuyuka bahshang.”

²³Küyimki api sangkung ching yüzahkhea, ajingyanrübonü api dunglim yan.

²⁴Tüsho zukleangnü keto ching chinthrüm ato arü, junangde ke abükkhibonü sangkung ju müleamho. Tüshe api a yapshea lakheah.

²⁵Judüki ajingyanrübonü api ki arü tüsho yihmusude tha, “Atungpuh, isa khümkhitang! Isa dükheakchoh!”

²⁶Tüshe apinü arü ki tha, “O nüsa akin anikhüh larübo, nüsa tümü thsükhi trecho? Judüki apinü wusubah apungbo le keto thürüh tüsho akhimahekhi ato kamabah.”

²⁷Tüsho mihtsürübonü müyinsahde tha, “Apung tüsho ketonü she anipü thsüde ha tümü mihtsürü a!”

²⁸Küyimki api püpü thrip Gadara lomi lim arükhea, amünean me yüzahkhi mihtsürü mahne kiuyukbo chingnü api kilim arü. Ju limro shenü muhokhukpü thsüde ane ju khide amütsü lakheah.

²⁹Anenü zhide tha, “Thrünpuh tsührü, nünü isa kheak tümü rhimonela? Akhukhi kim mukhiungyide isa thsümüchipü nü ha ching arükhea shi?”

³⁰Arü kheaknü anükhüh limshude yübah kheaknu boto motsühmoyungde alakheah.

³¹Amünean mebonü Jisu ki mushu, “Nünü isa yankhitsho, kheaknu boto ching isa yüzahshang.”

³²Apinü arü ki tha, “Yüang!” Jumonü arünü akhiukbah kheaknu boto ching yüzah, tüsho kheaknu boto alala lungrhün ching nanachihde keto lim yüki tüsho ke ching thüraksah.

³³Kheaknu neakrübonü alihde yübah kiuto ching yüzah tüsho amünean me yüzahkhi mihtsürübo kheak dünjikhi she bede alala thaa huh.

³⁴Judüki kiuto ching lüpdükhinü Jisu shorupü wukhiuk. Tüsho küyimki arünü api ngükhea, arü lomi chamde atsopü api ki mushu.