Read Yimchungru Naga Mark 10 Bible Online

Mark 10 - Yimchungru Naga bible

Mark 10

¹Judüki apinü ju chingnü tsahmusu tüsho Jordan thripkhühnü Judea lomi ching arü. Mihtsürübo api ki mukhungde arü, tüsho püpüki nangde apinü arü thsangyu.

²Pharisirübo arü tüsho api rükakide keo, “Mihtsürü khülangnü nihbuh niuberü bahpü yakzan la de?”

³Apinü arü ki alo tüsho tha, “Mosanü nüsa ki tümü yukhüm jihkhea?”

⁴Arünü tha, “Mosanü mihtsürü ki abahkhi jingyanbe thrüta jihbah alibe tsoshihpü mülüjih.”

⁵Tüsho Jisunü arü ki alo tüsho tha, “Nüsa mulong müküpkhinü apinü nüsa khilim ha yakzan thrütkheah.

⁶Tüshe athrün atan chingnü Thrünpuhnü athrürü tüsho aliberü thrün.

⁷Ha dünkheaknü athrürü khülangnü abuh tüsho abe zojihbah tüsho api niuberü lung arihbah,

⁸tüsho ane shihphü khülang kambah; jumonü kheaküa ane mahne yung tüshe shihphü khülang ah.

⁹Jumonü Thrünpuhnü tümü thsürushihdünü, mihtsürünü düchamachih shi.”

¹⁰Tüsho ajingyanrübonü thüyam ching judürü api ki keokhi.

¹¹Jumonü apinü arü ki tha, “Shepünü nihbuh niuberü bahcho tüsho püpürü luchonü anihbe azhihde müzammüram yihbeakchoh.

¹²Tüsho aliberü khülangnü nihbe niubuhrü bahbah püpürü ki rhangsho, alibenü müzammüram yihbeakchoh.”

¹³Judüki arünü api kilim apinü aqiushihpü bedarü; tüshe jingyanrübonü arü bedarürü thürüh.

¹⁴Tüshe küyimki Jisunü ju ngükhea, api khide masühde kam tüsho arü ki tha, “Azürü aninibo I kilim arüshang, tüsho arü düyanlo; tümütüsho Thrünpuh kiulongthsü harü yo ah.

¹⁵Atsütsü inü nüsa ki thachoh, shepünü azürü anini nangde Thrünpuh kiulongthsü müleangkhibanü ju ching küyimkishe müyüzah.”

¹⁶Apinü arübo kapa lubah arü kheak khah nim, tüsho arübo müngühjih.

¹⁷Jisu api limro ching yüde lachoki, mihtsürü khülang alihde arübah amiki khukning, tüsho keokhi, “Thsangyurü atsü, akheam müla rhangdung yamrüplurüp lupü inü tümü rhimobea?”

¹⁸Jisunü api ki alo, “Tümü thsükhi nünü I ki atsü de jicho? Thrünpuh kheak hode sheshe atsü müla.

¹⁹Nünü thiyuzüngbo mükheahlah: Müzammüram düyihbeak, dülaksah, dahüh, arükchih thiyumütsan düthsü, dümülapyuk, nü buh tüsho nü be wüntreang.”

²⁰Tüsho apinü alo, “Thsangyurü, harü alala I azüchokinü inü rhimodo.”

²¹Judüki Jisunü api kheahbah muzho, tüsho tha. “Nü khülangnü maban: Nü limro ching yübah nü lakhi alala yinang tüsho zhochihrü kilim jihang, tüsho yinmi ching nü rahpung labah; tüsho arang, I yanang.”

²²Tüshe ha yu hode api mi mitingde kam, tüsho mulong rozhakde tsoabah, tümüde api lakhit ato lakheah.

²³Judüki Jisunü mükamde kheahbah jingyanrübo ki tha, “Alarünü Thrünpuh kiulongthsü ching yüzahpü küdükhüh she achak a!”

²⁴Tüsho jingyanrübonü api yu dünkheak müyinsah. Tüshe Jisunü arü ki thalo, “Azürübo, lakhit kheak kinrünü Thrünpuh kiulongthsü ching yüzahpü küdükhüh achak a!

²⁵Alarü mihtsürü khülangnü Thrünpuh kiulongthsü ching yüzahpü kheaknü a kemelnü dübean-ku ching hokhi athülihbe ah.”

²⁶Tüsho arünü khide müyinsahde arü bolung thaachih, “Judüasho, shepü khümkhitba?”

²⁷Tüshe Jisunü arü kheahde tha, “Mihtsürübo thsungkheaknü ha amukukbe, tüshe Thrünpuh thsungkheak a jude yung; tümüde Thrünpuh thsungkheak a alala akukbe lah.”

²⁸Judüki Peternü api ki thapü tankih, “Kheahang, isanü alala bahdo tüsho nü yando.”

²⁹Jumonü Jisunü alojihde tha, “Atsütsü inü nüsa ki thachoh, I tüsho thiyusheakatsü dünkheaknü thüyam yungsho khiungmungrü yungsho chiniurü yungsho abuh yungsho abe, yungsho niuberü yungsho tsührübo yungsho alobo bahjihrü she müla,

³⁰arübo thüyam, khiungmungrü, chiniurü, berü, tsührübo, tüsho alobo thsümüchi lade, ha lün tüsho arüpü lakhi, akheam müla rhangdung ching chinü alü thsükhi müleangkhi.

³¹Tüshe akhuhrü ahihkhüh ashurü kambah, tüsho ashurü ahihkhüh akhuhrü kambah.”

³²Kheakü arübo Jirusalem wutude limro ching lakheah, tüsho arü müngüh Jisu yüde la; tüsho arünü müyinsah. Tüsho arünü yande ayüchoki trede la. Judüki apinü thürükheak mahne ju anihbuh kheak dünjipü arü ki thapü bemuwuhlo:

³³“Kheahang, isa Jirusalem lim wutuchoh, tüsho Mihtsürü Tsührü ju amükeam putungrübo le yakzan thsangyurü kilim thsungyuka jihbah, arünü api bahyuka sheshihbah tüsho khiungkerü kilim jihbah;

³⁴arünü api mükhemükimbah, api kheak rhapde mukhiukkihbah, tüsho api laksahbah. Tüsho mahsam nipü api arhang kamlobah.”

³⁵Judüki Zebedee tsührübo Jakob tüsho Johan bünenü api ki arübah tha, “Thsangyurü, ikenü tümüpürü keokhibanü nünü ike thsungkheak rhimoshihnelah.”

³⁶Tüsho apinü ane ki keokhi, “Nüke thsungkheak inü tümü rhimoshihnela?”

³⁷Anenü api ki alo, “Nü müretah kiulongthsübinkiu ching ike khülang nü khah tsülim tüsho khülang ju huzulim binpü mülüjang.”

³⁸Tüshe Jisunü ane ki tha, “Nükenü tümü kheangchonü ju nükenü mümükheah. Inü ayungkhi pung nükenü ayungkhukba de, tüsho I baptikhi yande nükenü baptikhukba de?”

³⁹Tüsho anenü api ki alo, “Ikenü kuklah.” Tüsho Jisunü ane ki tha, “Nükenü inü ayungkhi pung yungpü tüsho I baptikhi yande baptipü kuklah;

⁴⁰tüshe I khah tsülim tüsho huzulim binpü a inü amülübe yung, tüshe sherü thsungkheak thsakhama lanü jurü thsungkheak ah.”

⁴¹Tüsho küyimki jingyanrü thürünü ju sokhea, arünü Jakob le Johan büne kheak khide masühpü tankih.

⁴²Tüshe Jisunü arübo anihbuh kilim jibah tha, “Khiungkerü yakzanshuhrübonü arü kurungkheak atungrü thsüchoh tüsho arü torübonü arü kurungkheak thiyukhüm-sühmüh ahorichoh de nüsanü mükheahlah.

⁴³Tütüshe nüsa bolung a jude müthsü; tüshe nüsa bolung shepünü ato kamnelanü nüsa yamlarü thsübeah.

⁴⁴Tüsho nüsa shepünü akhuh kamnelanü alala azhorü labah.

⁴⁵Tümütüsho Mihtsürü Tsührü she tankihshihpü arükhi yung, tüshe tankihpü tüsho ahihkhüh rhokhitpü api rhangdung jihpü arükheah.”

⁴⁶Jushu arünü Jirikho lim arü. Tüsho apinü ajingyanrübo le yimto ato lungnü Jirikho chingnü wukhiukde alachoki, Tima tsührü kakheangrü, müktukrü Bartima limro ching binde alakheah.

⁴⁷Tüsho küyimki apinü ju Nazarethrü Jisu ah de asokhea, apinü azhipü tankih, tüsho tha, “David tsührü Jisu, I ki muzhoang!”

⁴⁸Judüki ahihkhühnü api ki malanpü müzünde tha; tüshe apinü alünü zhikhit, “David tsührü, I ki muzhoang!”

⁴⁹Jumonü Jisunü zhikde zhip tüsho api jiang de tha. Judüki arünü müktukkhi mihtsürü ju jibah api ki tha, “Asühang. Asürang, apinü nü jichoh.”

⁵⁰Tüsho apinü akhimmih jipa bahbah asürü tüsho Jisu kilim arü.

⁵¹Tüsho Jisunü api ki tha, “Inü nü thsungkheak tümü rhimoshihnela?” Müktukkhi mihtsürünü api ki alo, “Thsangyurü, inü ngünelah.”

⁵²Judüki Jisunü api ki tha, “Nü limro ching yüang; nü akinnü nü thsüngudo.” Tüsho judüchokinü apinü ngü; tüsho Jisu yande limro ching yü.