Read Yimchungru Naga Mark 12 Bible Online

Mark 12 - Yimchungru Naga bible

Mark 12

¹Judüki apinü arü ki shihdanglimyu chingnü athapü tankih: “Mihtsürü khülangnü kurungasolu thsübah ju mükamde awündo, anitpung alokhün kiu tüsho aheangsadam thsü. Tüsho apinü thulu-thsürübo ki amüche jihbah lomi ashang ching hantsah yü.

²Yimlu kim ching apinü yamlarü khülang thulu-thsürübo kilim kurungasolu chingnü kurungaso shihcham lupü yüshih.

³Arünü bea lubah lak tüsho khah keangkeang thiyia tsoshih.

⁴Kheaküshe apinü yamlarü püpü yüshih, tüsho arünü api kheak lungbonü aku ching yurijih, tüsho achih kipde mükhemükimbah thiyia tsoshih.

⁵Tüsho kheaküshe apinü püpü yüshih, tüsho arünü api laksah; tüsho püpürü ahihkhüh thiyi, khürü shik tüsho khürü laksah.

⁶Jumonü akheam thsüde apinü muzhokhi atsührü arü kilim yüshihde tha, ‘Arünü I tsührü akin jihbah.’

⁷Tüshe thulu-thsürübonü arü bolung thaachih, ‘Ha yamrüplurüp lubuh ah. Arang, isanü api laksahanü tüsho yamrüplurüp isa yo thsübah.’

⁸Arünü api bea lubah laksah tüsho kurungasolu aleanglim jipa bah.

⁹Jumonü kurungasolu putungrünü tümü thsüba? Apinü arübah thulu-thsürübo laksahbah tüsho kurungasolu ju püpürü kilim jihbah.

¹⁰Nüsanü amüsühyu ha mükhe de: ‘Thüyam thsürübonü abahyukkhi lung ju adungtobe amühit-lung kamdo.

¹¹Ha Atungpuhnü arhimokheah, tüsho isa mükbo ki amüyinsahbe lah’? ”

¹²Tüsho arünü api rampü rük yim, tümütüsho apinü arü azhihde shihdanglimyu thado de arünü mükheah. Tüshe arünü boto trede alakheah; jumonü arünü api bahjihbah tsoabah.

¹³Judüki arünü Pharisirü tüsho Herod borü khürü api yu rük rampü anihbuh kilim yüshih.

¹⁴Küyimki arübo arükhea, arünü api ki tha, “Thsangyurü, nü a thiyuro tüsho nünü mihtsürü kheyuka müla, tüshe thiyuro ching Thrünpuh limro thsangyuchoh de isanü mükheahlah. Isanü Kaesar kilim ruk jihpü yakzan la shi müla?

¹⁵Isanü ajihba shi müjihbea?” Tüshe apinü arü yiuhkhapkhi mükheahde arü ki tha, “Tümüde nüsanü I rükakicho? I kilim adholi 1 lubah arang, tüsho inü ju kheahanü.”

¹⁶Jumonü arünü lude arü tüsho apinü arü ki tha, “Ha she miro tüsho mung a?” Arünü alo, “Kaesar ah.”

¹⁷Judüki Jisunü arü ki tha, “Küju Kaesar yoanü Kaesar kilim jihang, tüsho küju Thrünpuh yoanü Thrünpuh kilim jihang.” Tüsho arünü api kheah-a müyinsah.

¹⁸Judüki arhang kamlokhi müla de athakhi Sadukirü khürü api kilim arü; tüsho arünü api ki keokhi,

¹⁹“Thsangyurü, keoniorü khülang tsührü mülade aniube bahjihbah shesho, aniurünü aniube ju lubah akhiung thsungkheak münü lashihbah de Mosanü isa ki thrütkheah.

²⁰Kheakü keoniorü thüne lakheah. Akhuhbuhnü aniube lu; tüsho münü mülade sheabah.

²¹Mahnepünü alibe ju lu, tüsho api sheabah; apinü she münü muzojih. Tüsho mahsampü she jude alakheah.

²²Junangde thünenü alibe ju lu tüsho münü müla. Akheam ching alibe she sheabah.

²³Jumonü arhang kamlokhi ching, küyimki arü asürübanü alibe ju shepü niube laba? Tümütüsho arü thüne alalanü alibe ju arü niube thsüpü lukheah.”

²⁴Jisunü arü ki alo tüsho tha, “Jumonü nüsanü amüsühyubo yungsho Thrünpuh wu mümükheahkhi hode lakmih-a lah yung de?

²⁵Tümütüsho küyimki arü ashe chingnü arhang kamlobanü, arünü mürhang yungsho yamkhün müthsü, tüshe arübo yinmi ching yunirübo nangde alabah.

²⁶Tüshe asherü arhang kamlopü dünkheak, nüsanü sangrung aniukhi yu, Mosa hüm ching mükhe de, künangde Thrünpuhnü api ki tha, ‘I Abraham Thrünpuh, Isak Thrünpuh, tüsho Jakob Thrünpuh’?

²⁷Api ju asherü Thrünpuh yung, tüshe arhang larü Thrünpuh ah. Jumonü nüsanü tode lakmihdo.”

²⁸Judüki yakzan thsangyurü bolung khülang arü tüsho arü atsangachihkhi so. Jisunü arü ki tsüde alodo de mütsanbah api ki keokhi, “Thiyuzüng alala bolung küpü adungtobe a?”

²⁹Jisunü api ki alo, “Thiyuzüng bolung khide adungtobe ju: ‘Aniang, O Israel, Atungpuh isa Thrünpuh ju lang Atungpuh ah.

³⁰Tüsho nünü Atungpuh nü Thrünpuh nü mulong alalanü, nü me alalanü, nü sulüm alalanü, tüsho nü sühmüh alalanü muzhoang.’ Ha thiyuzüng bolung khide adungtobe ah.

³¹Mahnepü ju ha lah: ‘Nünü nü yamhingrü ki nihbuh nangde muzhoang.’ Thiyuzüng hane kheaknü atobe püpü müla.”

³²Jumonü yakzan thsangyurünü api ki tha, “Tsüde thado, Thsangyurü. Nünü thiyuro asukdo, tümüde Thrünpuh khülang lah, tüsho püpü müla tüshe api lah.

³³Tüsho mulong alalanü, anikhitkhi alalanü, me alalanü, tüsho sühmüh alalanü api muzhopü tüsho yamhingrü ki nihbuh nangde muzhopü ju abümnü taka kingaünkhi tüsho laksah-a kingaünkhi kheaknü alübe ah.”

³⁴Jumonü küyimki apinü tsüde alokhi Jisunü angükhea, apinü anihbuh ki tha, “Nü a Thrünpuh kiulongthsü kheaknü limshude müla.” Tüsho jushu a shenü she api ki keokhipü mümürang.

³⁵Küyimki Jisunü arüngyam ching thsangyude alakheanü, apinü keokhi, “Küde thsah yakzan thsangyurübonü Khrista ju David tsührü ah de thacho?

³⁶Tümütüsho Amüsüh Me hode Davidnü tha: ‘Atungpuhnü I Tungpuh ki tha, “Inü nü riribo nü jing jungpung mükamshihyikia I khah tsülim binang.”’

³⁷Jumonü Davidnü api Atungpuh de ji, dale küde thsah anihbuh tsührü lapü?” Tüsho boto mihtsürübonü api ki asühde ani.

³⁸Judüki apinü thsangyude arü ki tha, “Yakzan thsangyurübo, sherünü amükeam khim yihbah mühide ayüpü, shothsümolo dangpungbo ching asühkhi yu muzhochonü arü dünkheak kümkangang,

³⁹sinagogbo ching atsüdak binkiubo, tüsho atsüdak thünio dangpungbo mükühcho,

⁴⁰shepünü khimoberü yambo thsümünimcho, tüsho rük thsüde ashangshang tamkhüntamnücho. Arü abahyukkhi ato leangkhibah.”

⁴¹Kheakü Jisunü rahpung-yam mikhuh ki bin tüsho mihtsürübonü künangde yukchonü ngü. Tüsho alarü ahihkhühnü hihde yuk.

⁴²Judüki zhochihkhi khimoberü khülang arü tüsho surda 1 dünkhi shonak 2 yukjih.

⁴³Jumonü apinü ajingyanrübo jibah tha, “Atsütsü ha zhochihkhi khimoberünü rahpungyam ching yukrü alala kheaknü alü yukdo de inü nüsa ki thachoh;

⁴⁴tümüde arü alalanü arü suhdahkhi chingnü yukdo, tüshe alibenü a anihbe zhochihkhi chingnü rhangdung mütrüpü lakhi alala yukdo.”