Read Yimchungru Naga Mark 14 Bible Online

Mark 14 - Yimchungru Naga bible

Mark 14

¹Nimung mahne dunglim phungho-thünio tüsho phaüm muyukkhi yikhap thünio lakheah. Tüsho amükeam putungrübo le yakzan thsangyurübonü rük thsüde api rambah asheshihpü yim.

²Tüshe arünü tha, “Thünio kim ching a mürhimo, jude yungsho mihtsürübo arhunganimbah.”

³Tüsho Bethani ching aphamrü Simon yam ching lachoki, aliberü khülangnü lung-langpung chingnü amo-achak rhümthünea müdangke lubah arü, tüsho api dükhüm ki binde alachoki aku kheak dungkihjih.

⁴Tüshe khürünü arü bolung bukakhiukde tha, “Tümüde ha rhümthünea müdangke phinphurukkhea?

⁵Tümütüsho ha shotoyinchi 300 akumung dün yinbah zhochihrü kilim jihpü lado.” Tüsho arünü anihbe thsokihde müneah.

⁶Tüshe Jisunü tha, “Alibe langzü zojang. Tümüde nüsanü alibe küpkhuk jihcho? Alibenü I thsungkheak rhimo atsü rhimodo.

⁷Tümütüsho nüsa lung zhochihrü a kamruhroro labah, tüsho küyimki nüsanü alümbanü arü ki atsü rhimopü kuklah; tüshe I a nüsa lung kamruhroro lapü yung.

⁸Alibenü tümü kuklanü anihbenü rhimodo. Alibenü I mi bahpü thsungkheak müdangkenü I pang mujupü amüngühnü arüdo.

⁹Atsütsü inü nüsa ki thachoh, alomiküp kürü ching ha thiyusheak-atsü thsangyuthsangrabanü, ha liberünü arhimokhi she anihbe lümkhitde athabah.”

¹⁰Judüki thürükheak mahne bolung khülang, Juda Iskariotnü arü ki api yinatsühpü amükeam putungrübo kilim yü.

¹¹Jumonü küyimki arünü ju sokheanü arübo asüh, tüsho api kilim sho jihpü alokhi. Jumonü apinü anihbuh rama jihpü kim atsü yim.

¹²Kheakü phaüm muyukkhi akhuhbe nimung, arünü phunghothünio namfimihnunu laksahchoki, ajingyanrübonü api ki tha, “Nü phungho-thünio yimtsühpü thsüde nünü isa kükheak yübah thsakhamshihnela?”

¹³Jumonü apinü jingyanrü mahne thiyia yüshihde tha, “Kiuto ching yüzahang, tüsho mihtsürü khülang ke phüh hanbah ashorubah; api yande yüang.

¹⁴Tüsho api küching yüzahbanü, thüyam putungrü ki thaang, ‘Thsangyurünü thachoh, “Inü I jingyanrübo lung phunghothünio yimtsühpü thsüde hanrü khiungshak küching la?”’

¹⁵Judüki apinü nüke ki alungbe khiungshak binpungbo thsakhamkhi huhbah; ju ching isa thsungkheak thsakhamang.”

¹⁶Api jingyanrübonü wukhiuk tüsho kiuto ching arü, tüsho apinü ane ki thakhi nangde ju ngü; tüsho arünü phungho-thünio thsakham.

¹⁷Arelim thürükheak mahne lung api arü.

¹⁸Arü binbah yimtsühde alachoki, Jisunü tha, “Atsütsü inü nüsa ki thachoh, I lung yimtsühkhi nüsa khülangnü I yinatsühbah.”

¹⁹Arünü mulong rozhakpü tankih, tüsho arü abannü api ki tha, “Ju I a shi?” Tüsho püpürünü tha, “Ju I a shi?”

²⁰Judüki apinü arü ki alo, “Ha I lung phuru ching khah amayukkhi thürükheak mahne bolung khülang ah.

²¹Mihtsürü Tsührü a api dünkheak thrütkhi nangde yüchoh, tüshe mihtsürü shepünü Mihtsürü Tsührü yinatsühchonü ayokhe! Ju mihtsürü thsungkheak müzübejungkhi atsübe lado.”

²²Arü yimtsühde alachoki, Jisunü yikhap lubah makshe jih tüsho yihnakbah arü kilim jihde tha, “Ha lua tsühang; ha I pang ah.”

²³Jushu apinü pung lu, tüsho küyimki apinü makshe jihbah arü kilim jihkheanü arü alalanü ju chingnü yung.

²⁴Tüsho apinü arü ki tha, “Ha ahihkhüh dünkheak thiyih bukkhi tangzüng aso I thiyih ah.

²⁵Atsütsü inü nüsa ki thachoh, inü Thrünpuh kiulongthsü ching aso muyungyi khiungde kheaküa inü ha muyunglo.”

²⁶Tüsho küyimki arünü khün thsükheanü Oliv Müzüng ching yü.

²⁷Judüki Jisunü arü ki tha, “Nüsa alalanü I bahbah alihde atsobah, tümüde ha thrüta lah: ‘Inü namfimihnu neakrü shikbah, tüsho namfimihnubo hiumüzütbah.’

²⁸Tüshe I arhang kamlo dunglim, I nüsa müngüh Galilee ching yübah.”

²⁹Tüshe Peternü api ki alo, “Alala tsotso she inü a jude müthsü.”

³⁰Tüsho Jisunü api ki tha, “Atsütsü khihni inü nü ki thachoh, khihre thununü mahne ki mukhungyide, nünü I mahsam ki malokhide alabah.”

³¹Tüsho Peternü müküpde alo, “I nü lung shebah, inü nü malokhidüa müla!” Tüsho arü alalanü junangde tha.

³²Judüki arünü Gethsemane de ajikhi dangpung ching arü; tüsho apinü ajingyanrübo ki tha, “I tamkhüntamnüchoki ha kheak bincholang.”

³³Tüsho apinü anihbuh lung Peter, Jakob, tüsho Johan bea lu tüsho küpkhukpü tüsho sükde lümthsünüpü tankih.

³⁴Judüki apinü arü ki tha, “I ashepü thsüde khide mulong rozhaklah. Ha kheak bincholang tüsho kurhangang.”

³⁵Apinü anükhüh limshude yübah alo kheak khukning, tüsho kuka lasho ha kim api kheaknü akhinshang de tamkhüntamnü.

³⁶Tüsho apinü tha, “Abuh, Abuh, nü thsungkheaknü alala akukbe lah. I kheaknü ha pung luakhinjang; judüalalashe, I lümkhi yung, tüshe nü lümkhi ah.”

³⁷Jushu api arü tüsho arübo yapa ngü, tüsho Peter ki tha, “Simon, nü yapla de? Nüsanü kimkhü 1 she mukurhangkhuk de?

³⁸Nüsa rükaki ching müyüzahpü thsüde kurhangang tüsho tamkhüntamnüang. Menü a künlah, tüshe shih ching sühmüzah.”

³⁹Kheaküshe apinü yübah tamkhüntamnü.

⁴⁰Tüsho küyimki api alode arükhea, apinü arübo kheaküshe yapa ngü, tümüde arü mük mürheakkhuk; tüsho arünü api ki tümü alobanü mümükheah.

⁴¹Judüki apinü mahsam kipü arü tüsho arübo ki tha, “Nüsa kheakü khiungde yapla de tüsho sühakhimla de? Ha suhdo! Kim arüdo; kheahang, Mihtsürü Tsührü aneakrübo khah ching jihdo.

⁴²Asürang, isanü yüanü. Kheahang, I yinatsührü ha kheak arüchoh.”

⁴³Tüsho zukleangnü, api thiyu thade alachoki, thürükheak mahne bolung Judanü boto ato lung nukshangbo le shinukbo shuhbah amükeam putungrü tüsho yakzan thsangyurübo le azothsürübo kilimnü arü.

⁴⁴Kheakü api yinatsühbuhnü arü kilim amütsan khülang jihde tha, “Shepü inü müthsüpbanü api ah; api ramang tüsho aheangde bebah tsoang.”

⁴⁵Tüsho api arü müleangnü, apinü nahde wutubah api ki tha, “Thsangyurü, Thsangyurü!” tüsho api müthsüp.

⁴⁶Judüki arünü api tholo tüsho ram.

⁴⁷Tüsho ju kheak zhiprü khülangnü api nukshang dukkhitbah achangbe amükeambuh yamlarü nuku thsüpkhijih.

⁴⁸Judüki Jisunü arü ki tha, “Nüsabo jangkhijangrarü khülang azhihkhi nangde nukshangbo le shinukbo shuhbah I rampü arükhea de?

⁴⁹I nüsa lung arüngyam ching thsangyude alakheah, tüsho nüsanü I müram. Tüshe amüsühyubo ju adünjibe ah.”

⁵⁰Judüki jingyanrübo alalanü api bahbah hiumüzütde tso.

⁵¹Athrününgtsüng mihtsürü khülang khimthünak lang yihbah Jisu dunglim yande alakheah. Arünü api rampü mürang,

⁵²tüshe apinü akhim ju dunglim bahbah bünkeang alihde tso.

⁵³Arünü Jisu ju achangbe amükeambuh ki bede yü; tüsho ju ching amükeam putungrübo, azothsürü, tüsho yakzan thsangyurü alala lakheah.

⁵⁴Tüshe Peternü limshu chingnü api dunglim yande achangbe amükeambuh yam limkhuh khiungde yü. Tüsho api ju aheangrü bolung mo thüyüpde bin.

⁵⁵Tüsho amükeam putungrübo le kiuthsübinkiu alalanü Jisu azhihde api sheshihpü yim, tüshe tümü müyimkhit.

⁵⁶Tümüde ahihkhühnü api azhihde thiyumütsanbo jih, tüshe arü thiyumütsanbonü maye.

⁵⁷Tüsho khürünü zhipbah api azhihde thiyumütsan jihde tha,

⁵⁸“Isanü apinü athakhi sodo, ‘Khahnü athsükhi ha arüngyam inü athsümünimbah, tüsho khahnü amüthsükhi püpü nimung mahsam dükeaknü athsübah.’”

⁵⁹Tüshe arü thiyumütsan jihkhinü she maye.

⁶⁰Tüsho achangbe amükeambuhnü mikhuh ching zhipbah Jisu ki keokhi, “Nünü tümü maloba de? Mihtsürübonü nü azhihde thiyumütsan jihkhi ha tümü a?”

⁶¹Tüshe apinü malan tüsho tümü malo. Kheaküshe achangbe amükeambuhnü api ki keokhi, “Nü a Müngühmühibuh Tsührü, Khrista a de?”

⁶²Tüsho Jisunü alo, “I ah. Tüsho nünü Mihtsürü Tsührü Wuto khah tsülim binde tüsho thüning kheak amo ching arükhi ngübah.”

⁶³Judüki achangbe amükeambuhnü api khimbo thorüp tüsho tha, “Isanü thiyumütsan püpü tümü yihnüpü la?

⁶⁴Mükhemürangde athakhi nüsanü sodo! Nüsanü tümü lümcho?” Tüsho arü alalanü api ashepü thülünlah de bahyuk.

⁶⁵Judüki khürünü api kheak mukhiukkihpü, amük rümpü, api kingpü, adampü tüsho api ki “müchitang” de athapü tankih. Tüsho aheangrübonü thoa lubah lak.

⁶⁶Kheakü Peter ju khikzhakpung abolim binde alachoki, achangbe amükeambuh yamlaberü khülang arü.

⁶⁷Tüsho küyimki alibenü Peter mo thüyüpkhi ngükhea, anihbenü api kheak kheahbah tha, “Nü she Nazarethrü Jisu lung lakheah.”

⁶⁸Tüshe apinü reanglode tha, “Nünü tümü thachonü inü mümükheah yungsho manikhit.” Apinü mükü ching wukhiuk tüsho thununü khung.

⁶⁹Tüsho yamlarü anünübenü kheaküshe api ki tha, tüsho ju ki zhiprü ki thapü tankih, “Ha arü bolung khülang ah.”

⁷⁰Tüshe apinü ju she reanglo. Tüsho anükhüh dunglim ju ki zhiprünü Peter ki thalo, “Tsükjide nü a arü bolung khülang ah; tümüde nü Galileerü ah tüsho nü yu thakhinü ju huhchoh.”

⁷¹Tüshe apinü athruajipü tüsho thiyuchihchimpü tankih, “Nünü athakhi mihtsürü inü mümükheah!”

⁷²Mahne kipü thununü khung. Tüsho Jisunü api ki thakhi yu lümkhit, “Thununü mahne ki mukhungyide nünü I mahsam ki malokhide alabah.” Tüsho küyimki ha dünkheak lümkhea, apinü trip.