Read Yimchungru Naga Mark 16 Bible Online

Mark 16 - Yimchungru Naga bible

Mark 16

¹Küyimki Amuni hokhea, Mari Magdalen, Jakob abe Mari tüsho Salome arünü Jisu pang kheak mujupü rhümthüneabe lubah arü.

²Amu-khip akhuhbe nimung, yapsu mükikde, ani akhiukchoki arünü kiuyuk ching arü.

³Tüsho arünü arü bolung thaachih, “Shepünü isa thsungkheak kiuyuk khimdopü kheaknü lung thülah-a bahba?”

⁴Tüshe küyimki arünü abinkih-a kheahkhea, lung ju thülah-a bah-a lakheah — tümüde ju khide ato lakheah.

⁵Kiuyuk ching yüzahchoki, athrününgtsüng mihtsürü khülang shulünkhim amüye yihbah tsülim binde arünü ngü; tüsho arübo arhunganim.

⁶Tüshe apinü arü ki tha, “Darhunganim. Nüsanü Nazarethrü Jisu, shepü ayümkihkheanü yimchoh. Api arhang kamlodo! Api ha ching müla. Arünü api yapshihkhi dangpung ching kheahang.

⁷Tüshe yüang tüsho api jingyanrübo, Peter pürü ki api nüsa müngüh Galilee ching yüchoh de thaang; apinü nüsa ki thakhi nangde ju ching nüsanü api ngübah.”

⁸Tüsho arünü wukhiukbah kiuyuk kinü alihde tso, tümüde arü ajan tüsho müyinsah. Tüsho atrekhi hode arünü she ki she tümü mütha.

⁹Küyimki api amu-khip akhuhbe nimung mükikde asürükhea, apinü amünean me thüne yankhitkhi Mari Magdalen ki akhiuka huh.

¹⁰Alibenü yü tüsho api lung lade arükhi, tüzhode tüsho tripde alarü ki thaa huh.

¹¹Tüsho api arhang lah tüsho alibenü api ngüdo de arünü asochoki akin müla.

¹²Ju dunglim, lomi ching tsahde alachoki püpü phü chingnü ane mahne ki akhiuk.

¹³Tüsho anenü yübah aninga larü ki tha, tüshe arünü ane ki she akin müla.

¹⁴Ju dunglim arü dükhüm ki binde alachoki apinü thürükheak khülang ki akhiuk; tüsho apinü arü mükinkhi le mulong müküpkhi dünkheak thürüh, tümütüsho api arhang kamlo dunglim sherünü api ngükheanü arünü akin müla.

¹⁵Tüsho apinü arü ki tha, “Alomiküp alala ching yüang tüsho mihtsürübo alala ki thiyusheak-atsü thsangyuthsangraang.

¹⁶Shepünü kinde baptibanü akhümkhitbah; tüshe shepünü mükinnü abahyukbah.

¹⁷Tüsho sherünü akinbanü amütsan harü labah: I mung chingnü arünü amünean mebo yankhitbah; arünü püpürü yuthabo thabah;

¹⁸arünü phuruto thrüa lulu she, tüsho ashebe müzüm yungyung she arü müthsümüchih; arünü tukthsürü kheak arü khahnü aqiubah tüsho arü angubah.”

¹⁹Atungpuhnü arü ki asukachih dunglim, api yinmi ching yükih, tüsho Thrünpuh khah tsülim bin,

²⁰Arünü yü tüsho Atungpuhnü arü lung rhimode tüsho khinthiyinbebo bede arü yu mütsanmükhi jihde lüpdükhi ching thsangyuthsangra.