Read Yimchungru Naga Mark 3 Bible Online

Mark 3 - Yimchungru Naga bible

Mark 3

¹Apinü sinagog ching yüzahlo, tüsho ju ching khah thripshe thsükhi mihtsürü khülang lakheah.

²Tüsho arünü api amülim jihpü thsüde apinü Amuni anihbuh thsünguba shi yungnü api kheahmüripde alakheah.

³Judüki apinü khah thripshe thsükhi mihtsürü ki tha, “Mikhuhlim arang.”

⁴Tüsho apinü arü ki tha, “Amuni atsü rhimobe yakzan la shi amütsü rhimobea, yungsho rhangdung khümkhitbea shi dashi alaksahbea?” Tüshe arünü malande la.

⁵Jumonü küyimki apinü arü mulong müküpkhinü mulong mütsüde arü kheak bukakhiukde mükamde akheahkhea, apinü mihtsürü ki ju tha, “Nü khah chungang.” Apinü chung, tüsho api khah ju püpü thrip nangde tsüabah.

⁶Judüki Pharisirübonü wukhiuk tüsho Herod jingyanrübo bebah küde thsübah api laksahbanü api azhihde rük yim.

⁷Tüshe Jisunü api lung jingyanrübo bebah keto lim yü, tüsho Galilee chingnü yimto ato khülangnü api dunglim yan.

⁸Küyimki arünü apinü arhimokhi sokheanü, Judea, Jirusalem, Idumea, Jordan hobah kewungbo tüsho Tair le Sidon chingnü mihtsürübo api kilim arü.

⁹Tüsho yimto ato lakhi hode api muyurishihpü sangkung anikhüh khülang api khilim thsakhama zopü apinü ajingyanrübo ki tha.

¹⁰Tümütüsho apinü ahihkhüh thsüngu, junangde tukthsü larübonü api qiupü mikhuhlim nimde arü.

¹¹Tüsho amünean mebonü api ngüchoki, api miki mükhüm tüsho zhide tha, “Nü a Thrünpuh tsührü ah.”

¹²Tüshe api sheanü dümükheahshih de arü ki müküpde thiyukhüm jih.

¹³Tüsho apinü müzüng kheak yükihbah apinü amulongrübo anihbuh kilim ji. Tüsho arünü api kilim arü.

¹⁴Judüki apinü amüsüh-thsangyurübo de jide arü thürükheak mahne mokhit, junangde arübo api lung labah tüsho arübo thsangyuthsangrapü thiyia yüshihpü,

¹⁵tüsho tukthsü thsüngupü tüsho amünean mebo yankhitpü thiyukhüm-sühmüh lapü lakheah:

¹⁶apinü Peter de ajikhi Simon;

¹⁷Zebedee tsührü Jakob tüsho aniurü Johan (apinü arü ki Tsüngmuk tsührübo dükhi amütsan Boanerges de ji);

¹⁸Andria, Philip, Bartholoma, Mathi, Thoma, Alphia tsührü Jakob, Thadia, Kananrü Simon

¹⁹tüsho api yinatsühbuh Juda Iskariot.

²⁰Judüki Jisunü thüyam ching yüzah, tüsho kheaküshe yimto atonü mükamlode arü, junangde api le ajingyanrübo yimtsühpü she mütsüde alakheah.

²¹Tüshe küyimki api betsührübonü ha dünkheak sokhea, arünü api tholopü wukhiuk, tümüde arünü tha, “Api yingyinga lah.”

²²Tüsho Jirusalem chingnü akikhi athrütrübonü tha, “Api Beelzebub lah, tüsho amünean mebo yakzanshuhbuhnü amünean mebo yankhitchoh.”

²³Jumonü apinü arübo anihbuh kilim ji tüsho shihdanglimyu chingnü arü ki tha: “Arimrinü küde thsah Arimri yankhitpü?

²⁴Kiulongthsü khülangnü ju azhihde chamnaksho, ju kiulongthsü müzhipkhuk.

²⁵Yamkhün khülangnü ju azhihde chamnaksho, ju yamkhün müzhipkhuk.

²⁶Tüsho Arimrinü nihbuh azhihde wususho tüsho chamnaksho, apinü müzhipkhuk, tüshe api akheam arüa lah.

²⁷Sühmüh lakhi mihtsürü ju akhuhde rhükjungbah thüyam yankhia mulusho, shenü she sühmüh lakhi mihtsürü yam ching yüzahbah api kukruk mulukhuk.

²⁸“Atsütsü inü nüsa ki thachoh, mihtsürü tsührübo kilim neak alala tüsho arünü tümüpürü mükhemürangyu thabanü abahjihbah;

²⁹tüshe shepünü Amüsüh Me azhihde mükhemürangyu thabanü küyimkishe neak mübahjih; tümütüsho apinü akheam mülakhi neak yihbeakdo.” —

³⁰Tümütüsho arünü tha, “Api amünean me lah.”

³¹Judüki abe le akeoniorü arü wungdo zhipbah api jipü khürü yüshih.

³²Yimto ato api mükamde bina lakheah; tüsho arünü api ki tha, “Kheahang, nü be le nü keoniorübo wungdo ching nü yimchoh.”

³³Tüshe apinü arü ki alo, “I be tüsho I keoniorü ju she a?”

³⁴Tüsho apinü anihbuh mükamdoa binrübo kheak mühide kheah tüsho tha, “Ha ching I be tüsho I keoniorübo lah!

³⁵Tümütüsho shepünü Thrünpuh lümkhi rhimochonü I khiung, I chi tüsho I be ah.”