Read Yimchungru Naga Mark 4 Bible Online

Mark 4 - Yimchungru Naga bible

Mark 4

¹Kheaküshe apinü keto yeannü thsangyupü tankih. Tüsho yimto ato api ki mukhung, jumonü apinü sangkung ching yüzah tüsho keto kheak ju ching bin; tüsho yimto athrünkhi keto lim abinde alo kheak lakheah.

²Judüki apinü shihdanglimyu chingnü ahihkhüh arü ki thsangyude tha:

³“Aniang! Thuluthsürü khülang nihbuh müjih hiupü yü.

⁴Tüsho apinü müjih hiuchoki khürü limmungyean hiuyuk; tüsho wuhnubo arübah; ju tsühabah.

⁵Khürü alo abüde alapung lungmi kheak hiukih; tüsho alo sükde mülakhinü nahde mukhuhde asürü.

⁶Tüshe küyimki ani akhiukkhea, ju phu, tüsho aying mülakhi hode yiuhabah.

⁷Tüsho müjih khürü ayangrungbo ching hiuyuk; ayangrungbo asürübah ju khüpdoabah, tüsho hi tümü maso.

⁸Tüsho püpü ju alo atsü kheak hiuyuk tüsho hi mukhuhde asürübah khürünü samrü bande, khürünü rukrü bande, tüsho khürünü chi bande alü asojih.”

⁹Apinü arü ki tha, “Nüsa asopü nükhün kihlasho aniang!”

¹⁰Tüshe küyimki api alangzü lakhea, thürükheak mahne lung api mükamde alarübonü shihdanglimyubo dünkheak api ki keokhi.

¹¹Tüsho apinü arü ki alo, “Nüsa kilim a Thrünpuh kiulongthsü aramyu mükheahpü jih-a lah; tüshe aleangkheak larü kilim a alala shihdanglimyubo chingnü ah,

¹²junangde ‘arünü kheahkheah she mükheahkhit, arünü anini she muso tüsho manikhit; jude yungkhülaa arünü arholobah tüsho neak bahjihbah!’ ”

¹³Tüsho apinü arü ki tha, “Nüsanü shihdanglimyu ha manikhit de? Judüasho nüsanü küde thsah shihdanglimyubo alala anikhitpü?

¹⁴Müjih-hiurünü thiyu ju hiuchoh.

¹⁵Tüsho limro mungyean thiyu hiua larübo ju harü ah; küyimki arünü anibanü judüakede arimri arübah arü mulongbo ching hiua lakhi yu lude tsochoh.

¹⁶Lungmi kheak müjih hiua larübo she küyimki arünü thiyu sobanü nahdü lang asühde leangkhichoh;

¹⁷tüsho arü kheak aying mülakhinü anükhüh kheak lang lachoh. Ju dunglim küyimki thiyu hode thsümütsü-ato yungsho thsümüchi akhiukbanü, nahdü lang arü ayokhichoh.

¹⁸Kheakü khürü ayangrungbo ching hiukhibo lah; arünü thiyu anichoh,

¹⁹tüsho ha lomi mulong sansan, lakhitbo muzhokhi, tüsho püpü yihnelunekhinü thiyu ju khüpsahshihchoh, tüsho ju aso masokhi kamchoh.

²⁰Tüshe alo atsü kheak hiukhi ju, arünü thiyu sobah leangkhichoh, tüsho khürünü samrü bande, khürünü rukrü bande, tüsho khürünü chi bande asochoh.”

²¹Tüsho apinü arü ki tha, “Tsün khülang ju muluk khüp yungsho yapkiu khüp zopü lude arücho de? Ju adubopung kheak zopü yung de?

²²Tümütüsho amikheak makhiukpü thsüde tümü müyima müla, yungsho tümüpürü yihdoa lanü alahkhitbah.

²³Nüsa nükhün kihlasho aniang!”

²⁴Tüsho apinü arü ki tha, “Nüsanü tümü sochonü mulong jihang, Nüsanü adünkhi yande, nüsa kilim adüna jihbah; tüsho nüsa sherünü anichonü, alü she ajihbah.

²⁵Tümütüsho shepü lanü, api kilim alü jihbah; tüshe shepü mülanü, api lakhi she anihbuh kheaknü lude atsobah.”

²⁶Tüsho apinü tha, “Thrünpuh kiulongthsü ju mihtsürü khülangnü alo kheak müjih hiukhi kiphahlah.

²⁷Apinü azhing ching yapchoh tüsho animung asürüchoh tüsho müjih ju mukhuhbah tochoh, tüshe ju küdeanü apinü mümükheah.

²⁸Alonü aküdah thsüde hi akhiukshihbah asochoh — akhuhde adung, jushu amüchekhi, tüsho aye akhiukchoh.

²⁹Tüshe küyimki hi münbanü, apinü hirhüpbenü arhüppü tankihchoh, tümütüsho yimlupü kim khiungdo.”

³⁰Tüsho apinü tha, “Isanü Thrünpuh kiulongthsü ju tümünü akeba, yungsho ju thanakpü shihdanglimyu tümü laba?

³¹Ha nünü müjih aninibe alo ching hiukhi woninji khülang kiphahlah;

³²tüshe küyimki ju hiubanü, asürüchoh tüsho sangrung alala kheaknü atobe kamchoh, tüsho akhahbo dübeakde yüchoh, junangde thüning wuhnubonü ju khüp asap shuchoh.”

³³Ha ruk shihdanglimyu ahihdo hode arünü anikhitkhi thülün Jisunü arü ki thiyu tha.

³⁴Tüshe shihdanglimyu mübedüa apinü arü ki mütha. Tüsho küyimki arü mükhingde lakhea, apinü ajingyanrübo ki alala thanaka huh.

³⁵Ju nimung, arelim apinü arü ki tha, “Isanü püpü thrip hode yüanü.”

³⁶Arünü yimto ju zojihbah Jisu binde alakhi sangkung ching yüzah tüsho api ju arü lung bebah yü. Tüshe api lung sangkung püpü she alakheah.

³⁷Tüsho chinthrüm ato khülang arübah sangkung ching ke abükyukde yüzah, junangde ju mide alakheah.

³⁸Tüshe api a yamkiung lim aku mükhambah yapa lakheah. Arünü api yihmusu tüsho tha, “Thsangyurü, isa dükheakpü nünü tümü mülüm de?”

³⁹Judüki api asürü tüsho apung ki thürüh, tüsho keto ki tha, “Keamloang, zhikde laang!” Apung ju kheamabah tüsho akhimahe ato lakheah.

⁴⁰Tüshe apinü arü ki tha, “Tümüde nüsa khide trecho le? Kheakü khiungde nüsa akin müla de?”

⁴¹Arünü khide tre tüsho khülangnü khülang ki thaachih, “Apung le ketonü she api yu anipü thsüde ha tümü mihtsürü a?”