Read Yimchungru Naga Mark 9 Bible Online

Mark 9 - Yimchungru Naga bible

Mark 9

¹Tüsho apinü arü ki tha, “Atsütsü inü nüsa ki thachoh, nüsa ha ching zhiprü khürü a wu chingnü Thrünpuh kiulongthsü arükhi müngüyikia müshede alabah.”

²Nimung thuruk dunglim Jisunü Peter, Jakob, tüsho Johan bebah müzüng achang kheak wutubah arü zangrü la; tüsho arü miki api jak müthriabah.

³Api khimmih ju zhingzhing, khide müyede, phürüm nangde, alomi ching shenü she jurü ruk mümüyeshihkhukpü thsüde kam.

⁴Tüsho Mosa bede Elija arü miki akhiuk, tüsho anenü Jisu ki asukachihde alakheah.

⁵Judüki Peternü alo tüsho Jisu ki tha, “Thsangyurü, isa ha ching lapü tsülah; tüsho isanü khimyam mahsam: khülang nü thsungkheak, khülang Mosa thsungkheak, tüsho khülang Elija thsungkheak thsanü.”

⁶Tümütüsho apinü tümü thabanü mümükheah, tümüde arü khide trede alakheah.

⁷Tüsho amo khülang arübah arü hingdo; tüsho amo chingnü düsheak khülang arü, “Ha inü amuzhokhi tsührü. Api ki aniang!”

⁸Küyimki arünü nahde mükamde akheahkhea, arü lung Jisu kheak hode sheshe müngülode kam.

⁹Arü müzüng chingnü akide alachoki, Mihtsürü Tsührü ashe chingnü arhang mükamloyikia arünü tümü ngükheanü she ki she müthapü Jisunü arü ki thiyukhümbo jih.

¹⁰Arünü api yukhümbo ani, tüshe arü bolung atsangachihpü tankih, “Ashe chingnü arhang kamlopü amütsan tümü a?”

¹¹Tüsho arünü api ki keokhi, “Elija akhuhde arübah de tümü thsükhi athrütrübonü thacho?”

¹²Judüki apinü arü ki alo, “Elija akhuhde arüchoh tüsho alala tsanglungbah. Dale tümü thsükhi Mihtsürü Tsührü khide thsünüpü tüsho abahyukpü thrüta la?

¹³Tüshe Elija arüabahdo de inü nüsa ki thachoh, tüsho api dünkheak thrüta lakhi nangde arünü api kheak arü lümkhibo rhimodo.”

¹⁴Tüsho küyimki api jingyanrübo kilim arükhea, yimto ato khülang arü mükamde, tüsho yakzan thsangyurübonü arü kheak atsangachihde ngü.

¹⁵Zukleangnü küyimki arünü api ngükhea, mihtsürü alalanü khide müyinnim, tüsho alihde yübah api ki salüm jih.

¹⁶Tüsho apinü yakzan thsangyurübo ki keo, “Nüsanü arü kheak tümü atsangachihcho?”

¹⁷Judüki yimto bolung khülangnü alo, “Thsangyurü, I tsührü khülang aduh me lakhi nü kilim bede arüdo.

¹⁸Küyimki api rambanü, api alo kheak keamchoh, mün ching rhukrhukchoh, ahü mütrütchoh, tüsho züngkudungchoh. Jumonü api yankhita bahpü inü nü jingyanrübo ki tha, tüshe arünü müyankhitkhuk.”

¹⁹Apinü arü ki alo, “O akin mülakhi lün, külokhüh I nüsa lung laba? Külokhüh inü nüsa lung arümba? I kilim bede arang.”

²⁰Judüki arünü api kilim azübuh ju bedarü. Tüsho küyimki me junü Jisu ngükhea, zukleangnü azübuh züngkudungshih. Api alo kheak keam tüsho mün ching rhukrhukde lungphülap.

²¹Jisunü azürü abuh ki keo, “Hanangde külokhüh lakhea?” Apinü alo, “Azüchokinü ah.”

²²“Api sheshihpü ahihkhüh ki mo tüsho ke ching nimyukdo. Tüshe nünü tümükhüh thsükhuksho, isa kheak amuzho laang tüsho isa rungang.”

²³Jisunü api ki tha, “Nünü kinsho! Shepünü kinchonü api thsungkheak alala akukpü lah.”

²⁴Judüchokinü azürü abuhnü zhi tüsho chike akhiukde tha, “Atungpuh, inü kinlah; I akin musuhdahkhi rungang!”

²⁵Küyimki Jisunü boto alihde arüde angükhea, apinü amünean me ki thürühde tha, “Nü nükhünpeangkhi tüsho aduh me, inü nü ki thiyukhüm jihchoh, api kheaknü akhiukang tüsho api kheak düyüzahlo.”

²⁶Judüki me junü arungbah zünga adanshih, tüsho api kheaknü akhiuk. Tüsho api ashekhi nangde kam, jumonü ahihkhühnü tha, “Api shea lah.”

²⁷Tüshe Jisunü akhah kheaknü thomusua lu, tüsho api asürü zhip.

²⁸Tüsho küyimki api thüyam ching arükhea, ajingyanrübonü api ki mükhingde keo, “Tümü thsükhi isanü api müyankhitkhukkhea?”

²⁹Jumonü apinü arü ki tha, “Hadürü a tamkhüntamnü tüsho khümkeaknü lang yankhitkhukchoh.”

³⁰Judüki arübo chamachihbah Galilee hode yü, tüsho apinü ju shenü she mümükheahshihnede alakheah.

³¹Tümüde apinü ajingyanrübo ki thsangyu tüsho arü ki tha, “Mihtsürü Tsührü ju mihtsürübo khah ching yukjihbah, tüsho arünü api laksahbah, tüsho api laksah dunglim, asam nipü arhang kamlobah.”

³²Tüshe arünü ha thakhi manikhit, tüsho api ki keopü trede alakheah.

³³Arünü Kapernaum ching arü; tüsho küyimki api thüyam ching lakhea, apinü arü ki keo, “Limro ching nüsa tümü atsangachihde alakhea?”

³⁴Tüshe arünü zhikde la; tümüde limro ching arünü shepü atobe a de khülangnü khülang ki atsangachih.

³⁵Tüsho apinü binbah thürükheak mahne ju ji, tüsho arü ki tha, “Khürünü akhuh kamnesho, apinü alala kheaknü ashubuh tüsho alala yamlarü thsübeah.”

³⁶Judüki apinü azürü nunu khülang bea lu tüsho arü bolung zhipshih. Tüsho küyimki apinü adubuh kheak shuh-a lukhea, apinü arü ki tha,

³⁷“Shepünü harü azürü anini bolung khülang I mung chingnü aleangkhibanü, I leangkhichoh; tüsho shepünü I leangkhichonü, I yung, tüshe I thiyibuh leangkhichoh.”

³⁸Johannü alo, “Thsangyurü, isa dunglim müyamrü khürünü nü mung ching amünean me yankhitkhi isanü ngüdo, tüsho api tukloshihpü isanü yankhido.”

³⁹Tüshe Jisunü tha, “Api düyanlo, tümüde shepünü I mung ching khinthiyinbe rhimochonü, ashulim nahde I dünkheak amütsü müthakhukde alabah.

⁴⁰Tümütüsho shepünü isa mazhihnü isa kilim tsanglah.

⁴¹Nüsa Khrista yo thsümonü shepünü nüsa kilim ke pung khülang jih-a yungshihbanü, atsütsü inü nüsa ki thachoh, küdüküdü she api thsambah müdükheak.

⁴²“Tüshe shepünü I kheak kinrü harü anini bolung khülang jing mükheshihbanü, api hung ching hizübe-lung khülang chingkihbah keto asük ching yüzahkhi atsübe labah.

⁴³Tüsho nü khahnü neak yihbeakshihsho, ju lipkhia bahang. Nü khah mahne kihbah amümütbe motru, athsümüchipung ching yüzahpü dün a, mabande rhangdung lapung ching yüzahkhi atsübe —

⁴⁴ju ching arü muso müshe tüsho mo mümütchoh.

⁴⁵Tüsho nü jingnü neak yihbeakshihsho, ju lipkhia bahang. Nü jing mahne kihbah amümütbe motru, athsümüchipung ching yüzahpü dün a, mabande rhangdung lapung ching yüzahkhi atsübe —

⁴⁶ju ching arü muso müshe tüsho mo mümütchoh.

⁴⁷Tüsho nü müknü neak yihbeakshihsho, ju khünkhita bahang. Mük mahne kihbah athsümüchi motru ching jipyukpü dün a, mük khülang kihbah Thrünpuh kiulongthsü ching yüzahkhi atsübe —

⁴⁸ju ching arü muso müshe tüsho mo mümütchoh.

⁴⁹“Laksah-a kingaünkhi ju thiminü atsangkhitkhi nangde mihbüm aban monü atsangkhitbah.

⁵⁰Thimi ju tsülah, tüshe ju amüsüpkhi dükheakabahsho, nünü küde thsah akeloshihba? Nüsa kheak thimi lashang, tüsho khülangnü khülang ki mungtsü laang.”