Read Yimchungru Naga Luk 10 Bible Online

Luk 10 - Yimchungru Naga bible

Luk 10

¹Harü dunglim Atungpuhnü püpürü 72 mokhit, tüsho mahne mahnenü api yüpü lakhibo ching amüngühnü yüshih.

²Judüki apinü arü ki tha, “Yimlupü tode lah, tüshe rhimorü nüklah; jumonü yimlupü ching rhimorü thiyishihpü yimlu putungpuh ki tamkhüntamnüang.

³Nüsa limro yüang; kheahang, inü nüsa rimre bolung namfimihnunubo nangde yüshihchoh.

⁴Shoyukpung, qiuqiu yungsho jingkhümpü tümü dühan; tüsho limro ching she ki she salüm düjih.

⁵Tüshe nüsa thüyam kürü ching yüzahbanü, akhuhde thaang, ‘Ha yam ching mungtsü lashang.’

⁶Tüsho ju ching mungtsü mihtsürü lasho, nüsa mungtsü ju ching labah; jude yungsho ju nüsa kilim rholobah.

⁷Tüsho arünü ajihkhi tsühyungde ju yam ching binang, tümüde rhimorü a nihbuh mihkhah dün ngüpü thülünlah. Thüyam khülang chingnü püpü ching düyü.

⁸Kiuto kürü ching nüsa yüzahbah arünü nüsa leangkhibanü nüsa miki zojihkhibo tsühang.

⁹Ju ching tukthsüde alarü thsüngujang, tüsho arü ki thaang, ‘Thrünpuh kiulongthsü nüsa thüninde arüdo.’

¹⁰Tüshe kiuto kürü ching yüzahbah arünü nüsa müleangkhibanü kiudunglimrobo ching wukhiukang tüsho thaang,

¹¹‘Nüsa kiuto asungthulung isa kheak yükihkhi nüsa azhihde phütkhia bahchoh. Tütüshe ha mükheang, Thrünpuh kiulongthsü nüsa thüninde arüdo.’

¹²Tüshe ju nimung ju kiuto kheaknü Sodom thsungkheak alü arümkheam labah de inü nüsa ki thachoh.

¹³“Korazin, nü are! Bethsaida, nü are! Tümütüsho nü kheak khinthiyinbebo rhimokhi ruk Tair tüsho Sidon ching rhimokhülaa shungliukhim tüsho awahbo ching binbah adüsonü mulong müthria labah.

¹⁴Tüshe mahkhap ching nü kheaknü Tair tüsho Sidon thsungkheak alü arümkheam labah.

¹⁵Tüsho Kapernaum, nü a thüning lim shuhkihba de? Yung, nü asükbo lim yüzahbah.

¹⁶“Shepünü nüsa ki anibanü I ki anichoh, shepünü nüsa bahyukbanü I bahyukchoh, tüsho shepünü I bahyukbanü I thiyibuh bahyukchoh.”

¹⁷Judüki 72nü asühde alodarüde tha, “Atungpuh, nü mung chingnü amünean mebonü she isa ki anido.”

¹⁸Tüsho apinü arü ki tha, “Thüning chingnü Arimri chinchobe nangde akikhi inü ngüdo.

¹⁹Kheahang, phurutobo le lungthsühribo tüsho thiriri wu alala kurungkheak thrümpü inü nüsa kilim thiyukhüm-sühmüh jihchoh, tüsho tümünü she nüsa mütrünthsü.

²⁰Judüalalashe mebonü nüsa ki anikhi dünkheaknü dasühachih, tüshe yinmi ching nüsa mungbo thrütkhi dünkheaknü asühachihang.”

²¹Ju kim ching Jisunü Me ching asüh, tüsho tha, “Yinmi tüsho alomi Tungpuh, Abuh, nünü harü lümlung tüsho mükheahmudurü kheak ram tüsho khungarübo ki akhiuka huhkhi dünkheak inü nü shijihchoh. Am, Abuh, haju nü mük ki atsü lakheah.

²²I Buhnü lüpdükhi I kilim jihdo, tüsho Abuh kheak hode shenü atsührü mümükheah, tüsho atsührü le api amikheak akhiukshihpü mokhitrü kheak hode shenü Abuh mümükheah.”

²³Tüsho apinü ajingyanrübo kilim rholo tüsho mükhingde tha, “Nüsanü tümükhüh ngükhi mükbo müngühmühi;

²⁴tümüde wukihrü tüsho kiulongthsürü ahihdonü nüsanü angükhi ngüpü kün, tüshe ju müngü, tüsho nüsanü asokhi sopü kün, tüshe ju muso.”

²⁵Tüsho kheahang, mahkhaprü khülangnü zhipbah api rükakide tha, “Thsangyurü, akheam müla rhangdung yamrüplurüp lupü inü tümü rhimobea? ”

²⁶Apinü anihbuh ki tha, “Yakzan ching tümü thrüta la? Nünü ju khekhi tümü a?”

²⁷Jumonü apinü alo, “‘Nünü nü mulong athrünkhinü, nü me athrünkhinü, tüsho nü sulüm athrünkhinü Atungpuh nü Thrünpuh muzhoang,’ tüsho ‘nü yamhingrü ki nihbuh nangde muzhoang.’ ”

²⁸Tüsho apinü anihbuh ki tha, “Nünü dükde alodo; ha rhimoang tüsho alabah.”

²⁹Tüshe apinü anihbuh mütsanmükhia lunede Jisu ki tha, “Tüsho I yamhingrü ju she a?”

³⁰Jisunü alojihde tha: “Mihtsürü khülang Jirusalem chingnü Jirikho lim yüki, tüsho jangkhijangrarünü zündobah akhimmihbo khukkhia lubah api kingthünak, tüsho ashepü thsüde zojihbah tsoabah.

³¹Kheakü kükidonanü amükeamrü khülang ju limro ching aki. Tüsho küyimki apinü anihbuh ngükheanü püpü thripnü hoabah.

³²Junangde Levirü khülang she ju ki arübah kheah, tüsho püpü thripnü hoabah.

³³Tüshe Samariarü khülang hantsahde api yapde alapung arü. Tüsho apinü anihbuh ngüchoki muzhode lüm,

³⁴tüsho api ki yübah müdangke le yukhu bukkihjihbah mübo rümjih; tüsho api yo donki kheak binshihbah hanrübinpung bedarü tüsho api küm.

³⁵Ashidopü api chamachihchoki, apinü shotoyinchi nak 2 yihkhita hanrü-binpung putungpuh kilim jihde tha, ‘Api kümang, tüsho tümüpürü nünü alü bahbanü I alode arüchoki shaklobah.’

³⁶Jumonü harü mahsam bolung jangkhijangrarünü zündobuh ki yamhingrü lakheah de nünü shepü lümla?”

³⁷Tüsho apinü tha, “Api ki muzho huhbuh ah.” Jisunü api ki tha, “Yüang tüsho ju ruk rhimoang.”

³⁸Kheakü arü kiulong khülang ching yüzah; tüsho Martha de ajikhi aliberü khülangnü anihbe yam ching api beyuk.

³⁹Tüsho Mari de ajikhi anünürünü she Jisu jing ki bin tüsho api yu ani.

⁴⁰Tüshe rhimo hihkhinü anihbe mulong kipathsükshih tüsho alibenü api ki tha, “Atungpuh, I niurünü I langzü rhimoshihpü zojihkhi nünü lümamükheahjihba de? I rungpü alibe ki thajang.”

⁴¹Tüsho Jisunü alibe ki alo, “Martha, Martha, rhimo hihkhi dünkheaknü nü mulong kipathsükdo tüsho küpkhukdo;

⁴²tüshe khülang lang yihnüpü lah. Marinü alungkibe mokhitdo, tüsho ju alibe kheaknü lude mutso.”