Read Yimchungru Naga Luk 11 Bible Online

Luk 11 - Yimchungru Naga bible

Luk 11

¹Api dangpung khülang ching tamkhüntamnüde labah arün thsüshu, jingyanrü bolung khülangnü arübah tha, “Atungpuh, Johannü api jingyanrübo ki thsangyukhi nangde isa ki tamkhüntamnüpü thsangyuang.”

²Jumonü apinü arü ki tha, “Küyimki nüsanü tamkhüntamnübanü, hade thaang: ‘Yinmi ching isa Abuh, nü mung amüsüh thsang. Nü kiulongthsü arang; Yinmi ching künangde la alomi ching she junangde nü mulong thsang.

³Nimung aban tsühyungbe isa kilim kü.

⁴Isa azhihde neak yihbeakrü ki isanü neak bahjihkhi nangde isa neakbo bahjang. Tüsho rükakinü isa dübeshih, tüshe amütsübe chingnü isa bekhitang.’ ”

⁵Tüsho apinü arü ki tha, “Nüsa shepünü müyamrü labah tsüngphulung ching yüba tüsho api ki thaba, ‘Müyambuh, I kilim yikhap 3 nipjang;

⁶tümüde I müyamrü khülang I kilim hantsah yüpü arüa lah, tüsho api miki tsühyungbe zojihpü tümü müla’;

⁷tüsho apinü alunglimnü alode athabah, ‘I küpkhuk düjih; kheaküa khimdopü rihdo, tüsho I tsührübo I lung yapkiu ching lah; inü asürübah nü kilim müjihkhuk’?

⁸Api müyamrü thsüthsü she api kilim jihpü masürü, tütüshe apinü mutukzhakde akeokhinü asürübah tüsho anihbuh yihnüpü lakhi thülün jihbah.

⁹Tüsho inü nüsa ki thachoh, kheangang tüsho ju nüsa kilim jihbah; yimang tüsho nüsanü angübah; thrungang tüsho nüsa kilim khimshuhjihbah.

¹⁰Tümütüsho shepünü kheangchonü leangkhichoh, tüsho shepünü yimchonü ngüchoh, tüsho shepünü thrungchonü api kilim khimshuhjihbah.

¹¹Nüsa bolung buhrü khürü tsührünü yikhap kheangsho, apinü anihbuh kilim lung jihba shi? Yungsho apinü thüngüh kheangsho, ju müthri api kilim phuruto jihba shi?

¹²Yungsho apinü thunuke kheangsho, api kilim lungthsühri jihba shi?

¹³Junangde nüsa amütsü thsüa lalashe, nüsa tsührübo kilim atsü jihpü mükheahsho, nüsa Abuhnü api ki kheangrü kilim Amüsüh Me küdükhüh she ajihba!”

¹⁴Apinü amünean aduh me yankhitde alakheah. Jumonü küyimki amünean me wukhiukkheanü aduh-a lakhi junü thiyu tha; tüsho botobonü müyinsah.

¹⁵Tüshe arü khürünü tha, “Apinü amünean mebo yakzanshuhrü Beelzebub hode amünean mebo yankhitchoh.”

¹⁶Tüsho püpürünü api rükakide yinmi chingnü amütsan khülang kheang.

¹⁷Tüshe apinü arü lümkhibo mükheahde arü ki tha: “Kiulongthsü aban nihbuh azhihde achamnakkhi athsümünim kamchoh, tüsho yamkhün khülangnü nihbuh yamkhün azhihkhi ju lungabahchoh.

¹⁸Arimrinü she nihbuh azhihde chamnaksho, küde thsah api kiulongthsü zhippü? Tümütüsho inü Beelzebub hode amünean mebo yankhitchoh de nüsanü thachoh.

¹⁹Tüsho Beelzebub hode inü amünean mebo yankhitchosho, shepü hode nüsa tsührübonü arü yankhitcho? Jumonü arübo ju nüsa mahkhaprübo thsübah.

²⁰Tüshe inü Thrünpuh yingkhing hode amünean mebo yankhita lasho, tsükjide Thrünpuh kiulongthsü nüsa kheak arüdo.

²¹Küyimki sühmüh lakhi mihtsürü khülangnü thirithsü zülu alala yihbah nihbuh yam aheangbanü api kukrukbo kümkhita lachoh.

²²Tüshe küyimki api kheaknü sühmüh lakhi arübah api kukbanü apinü mulonglamkhi zülu lude tsochoh, tüsho apinü ayankhikhibo chama luchoh.

²³Shepü I lung mülanü I azhihde lah, tüsho I lung bemukhungrü hiumüzütjihchoh.

²⁴“Küyimki mihtsürü khülang kheaknü amünean me wukhiukbanü, sühakhimpü yimde akung dangpungbo hode yüchoh; tüsho müyimkhitsho apinü thachoh, ‘I arüpung I yam lim alode ayübah.’

²⁵Tüsho küyimki api arübanü, ju phüta tüsho tsanglunga ngüchoh.

²⁶Judüki apinü yübah api kheaknü amütsübe me thüne bebah arüchoh, tüsho arünü yüzahbah ju ching lachoh; tüsho mihtsürü ashube kuhi ju akhuhbe kheaknü amütsübe kamchoh.”

²⁷Tüsho apinü harü thade alachoki, boto ching aliberü khülangnü zhide api ki thaa, “Nü zübekhi tüsho nü niuh duhkhi liberü asühpü!”

²⁸Tüshe apinü tha, “Ju kheaknü alü, sherünü Thrünpuh yu anichonü arü asühpü!”

²⁹Tüsho küyimki boto ju müjimkhuluka mukhungkhea, apinü athapü tankih, “Ha amütsü lün ah. Hanü khinthiyinbe kheangchoh, tüsho wukihrü Jona amütsan kheak hode amütsan tümü müjih.

³⁰Nineve ki Jona amütsan khülang kamkhi nangde ha lün ki Mihtsürü Tsührü labah.

³¹Düjinglim kiulongthsübenü ha lün kheak mahkhapkhi ching bahyukbah, tümüde alibenü Solomon lümlung anipü alomi akheambo chingnü arü; tüsho atsütsü Solomon kheaknü atobe ha ching lah.

³²Nineve mihtsürübonü ha lün kheak mahkhapkhi ching wusubah tüsho ju bahyukbah, tümüde Jonanü thsangyuthsangrakhinü arü mulong müthri; tüsho atsütsü Jona kheaknü atobe ha ching lah.

³³“Shenü she tsün takkihbah ajik dangpung yungsho muluk khüp muzhochoh, tüshe shepü azahchonü tsün ju angüpü thsüde adubopung kheak zochoh.

³⁴Pang yo tsün ju mük ah, jumonü küyimki nü mük tsüde alabanü, nü pang alala ayinnü mide lah. Tüshe küyimki nü mük mütsübanü, nü pang she amitingnü milah.

³⁵Jumonü nü kheak lakhi tsün ju amiting mülapü kümkangang.

³⁶Junangde nü pang alala amiting mülade ayinnü mide lasho, tsünpung ayinatrümnü nü kheak tahkhi nangde nü pang alala ayinnü mide alabah.”

³⁷Apinü athashu, Pharisirü khülangnü api lung yimtsühpü jiyuk, jumonü apinü yüzah tüsho yimtsühpü bin.

³⁸Küyimki Pharisirünü ju ngükhea, apinü akhuhde khah mümütsakde yimtsühkhi dünkheak müyinsah.

³⁹Tüsho Atungpuhnü api ki tha, “Kheakü nüsa Pharisirünü pung tüsho phuru aleanglim müsühchoh, tüshe nüsa alunglim a yihnelune tüsho mihbukmuyuknü milah.

⁴⁰Makharübo! Shepünü aleanglim thrünkheanü alunglim she athrünkhi yung de?

⁴¹Tüshe nüsa pung le phuru ching lakhi ju zhochihrü kilim jihang; jushu nüsa thsungkheak alala amüsüh labah.

⁴²“Tüshe nüsa Pharisirübo are! Tümütüsho nüsanü khiungün le rhümthünea wonin tüsho wokephüyak alala kingaün jihchoh, tüshe thiyuro tüsho Thrünpuh amuzho bahyukchoh. Püpü ju she mübahyukde nüsanü harü rhimopü lado.

⁴³Nüsa Pharisirübo are! Tümütüsho nüsanü sinagog ching binkiu atsübe tüsho yinzüyindopung ching salüm jihshihpü mürühchoh.

⁴⁴Nüsa yakzan thsangyurübo le Pharisirübo, yiuhkhaprübo are! Tümüde nüsa ju amüngükhi kiuyukbo nangde lah, tüsho jurü kheak tsahrü mihtsürünü mümükheah.”

⁴⁵Judüki mahkhaprü khülangnü api ki alo tüsho tha, “Thsangyurü, harü thakhinü she nünü isa mükhemükimchoh.”

⁴⁶Tüsho apinü tha, “Nüsa mahkhaprübo she are! Tümüde mühankhukpü thsüde nüsanü mihtsürübo hah mühahchoh, tüshe nüsa nihbuh a yingkhing khülang she hahmülang müqiu.

⁴⁷Nüsa are! Tümüde nüsanü wukihrübo kiuyuk thsüchoh, tüsho nüsa buhrübonü arü laksahkheah.

⁴⁸Nüsanü nüsa buhrü rhimobo leangkhichoh de nüsanü thiyumütsan thsüchoh; tümüde arünü arübo laksah, tüsho nüsanü arü kiuyukbo thsüchoh.

⁴⁹Jumonü Thrünpuh lümlungnü thachoh, ‘Inü arü kilim wukihrübo tüsho amüsüh-thsangyurübo yüshihbah, tüsho arünü arü khürü laksahbah tüsho thsümüchibah.’

⁵⁰Junangde alomiküp khimtanchokinü wukihrü alala thiyihbo bukkhi dünkheak ha lün thsümüchibah,

⁵¹Abel thiyih kheaknü kingaün sadam le arüngakopung dükeak bukkhi Zekaria thiyih khiungde. Am inü nüsa ki thachoh, ha lün thsümüchibah.

⁵²Nüsa mahkhaprübo are! Tümüde nüsanü mükheahmudu mükhipmürabe lude tsodo. Nüsanü müyüzah tüsho yüzahde alarü zhipdo.”

⁵³Küyimki Jisu ju chingnü chamachihkhea, Pharisirü tüsho yakzan thsangyurübonü api azhihde ahihkhüh müküpde akeokhipü tankihde,

⁵⁴apinü tümükhüh thakhi jimde aleang.