Read Yimchungru Naga Luk 12 Bible Online

Luk 12 - Yimchungru Naga bible

Luk 12

¹Ju kim ching, küyimki mükhebinkhi boto mihtsürü khülangnü khülang jungachihde amukhungkhea, apinü akhuhde api jingyanrübo ki thapü tankih, “Yiuhkhaprü Pharisirü phaüm dünkheak kümkangang.

²Tümütüsho amikheak makhiukpü thsüde tümü yihdoa müla, yungsho mümükheahpü thsüde rama müla.

³Jumonü nünü tümüpürü amiting ching thakheanü ayin ching sobah, tüsho nünü alungbe khiungshakbo ching tümü ramde athakheanü thüyam-münbo kheaknü azhiyukbah.

⁴“Tüsho inü nüsa ki thachoh, I müyamrübo, sherünü laksahbah ju dunglim tümü müthsükhuknü arü ki dütre.

⁵Tüshe nüsanü shepü ki trebeanü inü nüsa ki huhbah: Shepünü laksahbah dunglim thsümüchipung ching jipyukpü wu lanü api treang; am, inü nüsa ki thachoh, api treang!

⁶Shonak 2 dün khüjak 5 müyincho de? Tüsho arü khülang lang she Thrünpuh miki mümih.

⁷Tüshe nü kuyü alala khemütsande lah. Jumonü dütre; nü ju khüjak ahihdo kheaknü adün labe ah.

⁸“Inü nüsa ki thachoh, shepünü mihtsürübo miki I leangkhibanü, Thrünpuh yunirübo miki Mihtsürü Tsührünü she api leangkhibah.

⁹Tüshe shepünü mihtsürübo miki I bahyukbanü Thrünpuh yunirübo miki bahyukbah.

¹⁰Tüshe khürünü Mihtsürü Tsührü azhihde athakhi api neak bahjihbah; tüshe Amüsüh Me azhihde athakhi a neak mübahjih.

¹¹Küyimki arünü nü sinagogbo ching tüsho yakzanshuhrü le thiyukhüm-sühmüh larü ki bedarübanü küde aloba yungsho tümü thaba de mulong düsansan.

¹²Tümüde nünü tümü thabeanü Amüsüh Menü ju kim ching thsangyubah.”

¹³Boto ching khürünü api ki tha, “Thsangyurü, I khiung ki I kheak yamrüplurüp chamshihpü thajang.”

¹⁴Jisunü alo, “Mihtsürü, shepünü I nüke kurungkheak mahkhaprü yungsho achamjihrü kamshihkhea?”

¹⁵Tüsho apinü arü ki tha, “Yihnelune dünkheak kümkangang tüsho kurhangang, tümüde mihtsürü rhangdung ju nihbuh lakhit suhdahkhi ching müla.”

¹⁶Judüki apinü arü ki shihdanglimyu tha: “Alarü mihtsürü khülang lonü suhdahde akhiuk.

¹⁷Tüsho apinü aküdahnü lümde tha, ‘Inü küde athsüba, tümütüsho hi zopü akhiungshak müla?’

¹⁸Jumonü apinü tha, ‘Inü ha rhimobah: Inü I jakam lukkheambah tüsho atobe thsübah, tüsho ju ching inü I hibo le kukrukbo alala zobah.

¹⁹Tüsho inü I me ki thabah, “Me, nünü kam ahihdo thsungkheak kukruk hihde zolah; nü zuzu thsang; tsühang, yungang tüsho asühang.” ‘

²⁰Tüshe Thrünpuhnü api ki tha, ‘Nü makharü! Khihre tsütsü nü me tsoabahbah; dale tüsho nü thsungkheak tsanglunga zokhi shenü aluba?’

²¹Jumonü shepünü nihbuh thsungkheak lakhit zomukhungchonü, Thrünpuh kilim alarü yung.”

²²Tüsho apinü ajingyanrübo ki tha, “Jumonü inü nüsa ki thachoh, nüsa rhangdung thsungkheak tümü tsühba yungsho nüsa pang thsungkheak tümü phuyuba de mulong düsansan.

²³Rhangdung ju tsühyungbe kheaknü alü, tüsho pang ju khimmih kheaknü alü ah.

²⁴Khüyakbo lümakheahang, tümüde arünü mümükhean yungsho müyimlu, kukruk-zowupug yungsho jakam müla; tüshe Thrünpuhnü arü yimkipchoh. Wuhnubo kheaknü küdükhüh nüsa adün achakbe la?

²⁵Tüsho nüsa shepünü mulong sansankhinü anükhüh ashang lapü kukla?

²⁶Nüsanü aninibe mürhimokhuksho, tümü thsüpü aninga lakhi dünkheak mulong sansancho?

²⁷Thrilung sangbünbo küde tochonü lümakheahang: arünü mürhimo yungsho müchiyim; tüshe inü nüsa ki thachoh, Solomon she api müretahkhi alala ching harü bolung khülang nangde muphuyu.

²⁸Dale khihni thulu ching labah shido mori ching bahbe rim Thrünpuhnü phuyujihchosho, küdükhüh lang apinü nüsa muphuyujihpü, O nüsa akin ninirübo?

²⁹Jumonü nüsanü tümü tsühba tüsho tümü yungba de mulong düsansan.

³⁰Tümüde alomi trükshihbo alalanü harü yimchoh; tüsho nüsa harü yihnüpü lah de nüsa Abuhnü mükheahlah.

³¹Tüshe Thrünpuh kiulongthsü yimang, tüsho harü alala nüsa kilim jihbah.

³²“Dütre, aninibe boto, tümüde nüsa Abuhnü nüsa kilim kiulongthsü jihpü mulonglah.

³³Nüsa lakhitbo yinang tüsho zhochihrü kilim jihang. Mümürhütbe shoyukpung, ahührü müthüninpung yungsho tsünsuknü müthsümünimpung, amükheambe yinmi ching rahpung tsanglunga zoang.

³⁴Tümütüsho nü rahpung küching labanü, nü mulong she ju ching labah.

³⁵“Nüsa chim rümang tüsho nüsa tsünpungbo trushang;

³⁶mihtsürübonü arü putungrü arhangrü thünio chingnü arükhi aleangde labah api arübah athrungchoki arünü nahde khimdopü khimshuhjihkhi nangde laang.

³⁷Aputungrü arüde alachoki atünadode alakhi ngürü yamlarübo asühpü. Atsütsü inü nüsa ki thachoh, apinü nihbuh chim rümbah arübo yimtsühpü binshihbah, tüsho arübah arü ahiuhakhipbah.

³⁸Tüsho apinü mahne kipü yungsho mahsam kipü arübah arü jude ngüsho, jurü yamlarübo asühpü.

³⁹Tüshe ha mükheahang, thüyam putungrünü ahührü arüpü kim mükheahkhülaa, apinü aheangde alabah tüsho api yam müchakashungshih.

⁴⁰Jumonü nüsa she atünadoang, tümüde nüsanü mükkin müthsükhi kim ching Mihtsürü Tsührü arüchoh.”

⁴¹Judüki Peternü api ki tha, “Atungpuh, ha shihdanglimyu nünü isa ki lang thacho shi, mihtsürü alala ki a?”

⁴²Tüsho Atungpuhnü tha, “Dale tüsho aputungrünü ayamkhün kurungkheak yakzanshuhrü thsüshihbah arü kilim kim dükdü ching tsühyungpü shihcham jihshihpü athülünkhi tüsho lümlung lakhi khinkihthsürü ju shepü a?

⁴³Api putungrü arüde alachoki rhimode ngükhi yamlarü asühpü.

⁴⁴Atsütsü inü nüsa ki thachoh, apinü anihbuh lakhi alala kurungkheak api ju yakzanshuhrü kamshihbah.

⁴⁵Tüshe yamlarünü mulong ching, ‘I putungrü arüpü ruhde lah,’ de thasho, tüsho yamlarübo le yamlaberübo shikpü tüsho tsühyungde amüshangpü tankihsho,

⁴⁶ju yamlarü putungrü apinü kheahde mülachoki tüsho mümükheahkhi kim ching arübah, tüsho mahne thsüde khapbah amükinrü lung shihcham thsüjihbah.

⁴⁷Tüsho yamlarü shepünü nihbuh putungrü lümkhi mükheahbah, müthsakhamkhea yungsho api lümkhi yande mürhimokheanü ahihdo ki rhapbah.

⁴⁸Tüshe shepünü mümükheahkhea, tütüshe ashikpü thülünde lakmihsho nükde ashikbah. Tümütüsho shepü kilim hihde jih-a lanü, api kilimnü hihde akheangbah; tüsho ju kheaknü alü jihbuh kilimnü alübe kheangbah.

⁴⁹“I alomi kheak mo hande arüpü arükheah tüsho inü künangde alümkheanü ju takkihdo!

⁵⁰Tüshe I baptipü lah, tüsho ju muhoyikia I küdükhüh lümthsünükhi la!

⁵¹I alomi ching mungtsü jihpü arükheah de nüsanü lümcho shi? Inü nüsa ki thachoh, jude yung, tüshe achamnak lah.

⁵²Kheakünü rünbah thüyam khülang ching phüngü ju achamnakbah: mahsamnü mahne azhihbah, tüsho mahnenü mahsam azhihbah.

⁵³Buhrünü tsührü azhihde, tsührünü buhrü azhihde, berünü tsührübe azhihde tüsho tsührübenü berü azhihde, aninü atsühmeakbe azhihde, atsühmeakbenü ani azhihde achamnak akhiukbah.”

⁵⁴Judüki apinü botobo ki tha, “Küyimki nüsanü aniyüzahlimnü amo khülang yükihde angübanü, judüchokinü thachoh, ‘Tsüng arüchoh’; tüsho junangde lah.

⁵⁵Tüsho küyimki nüsanü düjinglim apung yünde angübanü thachoh, ‘Alamlampü lah’; tüsho junangde lah.

⁵⁶Yiuhkhaprübo! Nüsanü thüning tüsho alomi miro kheahkhitlah, tüshe tümü thsükhi nüsanü ha kim amütsan mümükheah le?

⁵⁷“Tümü thsükhi alim dünkheak nü küdah thsüde mahmükhapcho le?

⁵⁸Küyimki nü azhihrü lung nünü atorü ki yübanü, limro chingnü api kheak tsarihpü mürangang, jude yungsho apinü nü mahkhaprü ki bede ayübah, mahkhaprünü nü ju mihramrü ki jihbah, tüsho apinü nü rihyam ching yukbah.

⁵⁹Inü nüsa ki thachoh, nünü akheamkhibe shonak khiungde müjihyikia nü ju chingnü makhiukkhuk.”