Read Yimchungru Naga Luk 13 Bible Online

Luk 13 - Yimchungru Naga bible

Luk 13

¹Ju kim ching Pilatnü arünü laksah-a kingaünkhi lung thiyih düsahkhi Galileerü dünkheak Jisu ki tharü khürü lakheah.

²Jisunü alo, “Arü ha ruk thsümonü harü Galileerü ju Galileerü püpürü alala kheaknü aneakrü amütsübe lakheah de nüsanü lümcho shi?

³Inü nüsa ki thachoh, jude yung; tüshe nüsanü mulong mümüthrisho ju ruk nüsa alala dükheakbah.

⁴Yungsho Siloam ching rünchang arü 18 kheak keambah alaksahkhi, arübo ju Jirusalem ching larü püpürü mihtsürü alala kheaknü aneakrü amütsübe lakheah de nüsanü lümcho shi?

⁵Inü nüsa ki thachoh, ju yung; tüshe nüsanü mulong mümüthrisho, ju ruk nüsa alala dükheakbah.”

⁶Apinü ha shihdanglimyu tha: “Mihtsürü khülangnü kurungasolu ching khubasodung khülang khima lakheah, tüsho apinü ju kheak sangaso yimde arübah müngü.

⁷Judüki apinü kurungasolu neakbuh ki tha, ‘Kheahang, kam mahsam inü ha khubasodung kheak sangaso kheahde arüdo tüshe müngü. Ju kiushakang; tümüde hanü alo kungabahshihchoh?’

⁸Tüshe apinü anihbuh ki tha, ‘Atobuh, inü ju mükamde kiua alo thrümkihanü khihkam she ju lashang.

⁹Shikam hanü aso asosho tsülah. Tüshe jude yungsho, dunglim nünü akiushakpü kuklah.’ ”

¹⁰Kheakü apinü Amuni sinagog khülang ching thsangyude alakheah.

¹¹Tüsho ju ching aliberü khülang kam thürükheak tizheah menü jing kikshihkhi lakheah. Alibe ju kikabahbah masürükhukde alakheah.

¹²Tüshe küyimki Jisunü alibe ngükhea, apinü alibe ju api kilim jihbah tha, “Alibe, nü tukthsü chingnü nü zuzu kamdo.”

¹³Apinü anihbe kheak akhah nimkih tüsho judüchokinü alibe ju langakindo kam, tüsho Thrünpuh müretah.

¹⁴Tüshe sinagog yakzanshuhbuhnü bukakhiuk, tümütüsho Jisunü Amuni thsüngu; tüsho apinü boto ki tha, “Mihtsürübonü arhimopü nimung thuruk lah; jumonü arang tüsho jurü ching thsüngua lung, tüshe Amuni yung.”

¹⁵Judüki Atungpuhnü api ki alo tüsho tha, “Nüsa yiuhkhaprübo! Nüsa mihbüm abannü Amuni moshipung yungsho donki ayam chingnü trünkhia kemüyihjihpü bede müyücho de?

¹⁶Dale tüsho ha Abraham tsührübe, shepü arimrinü kam thürükheak tizheah rhüka zokheanü Amuni zuzu mükamshihbea de?”

¹⁷Küyimki apinü harü thakhea, api azhihrü alala achih ngüabah; tüsho apinü müretah rhimokhi alala dünkheaknü boto alalanü asühachih.

¹⁸Judüki apinü tha, “Thrünpuh kiulongthsü tümü kiphahla? Tüsho inü tümü kheak akeba?

¹⁹Haju mihtsürü khülangnü woninji lubah api wündo ching yukkhi kiphahlah; ha tochoh tüsho sangdung ato kamchoh, tüsho thüning wuhnubonü ju khahbo ching arü sapbo shuchoh.”

²⁰Kheaküshe apinü tha, “Thrünpuh kiulongthsü ju inü tümü kheak akeba?

²¹Haju aliberü khülangnü phaüm lubah aümdungkhi 3 adünkhi ching düsah-a mülamyi khiungde azokhi kiphahlah.”

²²Tüsho apinü kiutobo le kiulongbo ching thsangyude Jirusalem lim yü.

²³Judüki khülangnü api ki tha, “Atungpuh, akhümkhitrü nükla shi?” Tüsho apinü arü ki tha,

²⁴“Chipimurung amütsümbe chingnü ayüzahpü mürangang, tümüde inü nüsa ki thachoh, ahihkhühnü ayüzahpü yimbah tüshe mukukde alabah.

²⁵Küyimki thüyam putungrünü khülang ki asürübah khimdopü ju arihba, nüsanü wungdo zhipbah thrungde athabah, ‘Atungpuh, Atungpuh, isa thsungkheak khimshuhjang,’ tüsho apinü nüsa ki thabah, ‘Nüsa küchingnüanü inü nüsa mümükheah,’

²⁶judüki nüsanü athapü tankihbah, ‘Isa nü miki tsühyungkheah, tüsho nünü kiudunglimrobo ching isa thsangyukheah.’

²⁷Tüshe apinü athabah, ‘Inü nüsa ki thachoh, nüsa küchingnüanü inü mümükheah. Nüsa amülim rhimorü alala I kinü tsoang.’

²⁸Nüsanü Abraham, Isak tüsho Jakob tüsho wukihrübo alala Thrünpuh kiulongthsü ching ngübah nüsa jipkhita bahchoki, ju ching atripkhi tüsho hü mütrütkhi labah.

²⁹Mihtsürübo aniakhiuklim le aniyüzahlim, dukulim le düjinglimnü arübah tüsho Thrünpuh kiulongthsü ching binbah.

³⁰Tüsho ju ching ashurü ju akhuhrü, tüsho akhuhrü ju ashurü kampü lah.”

³¹Ju nimung Pharisirü khürü arübah api ki tha, “Akhiukang tüsho ha chingnü tsoang, tümüde Herodnü nü laksahpü künlah.”

³²Tüsho apinü arü ki tha, “Yübah shirung ki thaang, ‘Kheahang, inü khihni le shido amünean mebo yankhitde athsüngube rhimopü lah, tüsho asam nipü I rhimo akhik thsübah.’

³³Tütüshe I khihni, shido tüsho zhihdo I limro ching tsahpü lah; tümüde wukihrü khülang ju Jirusalem ching yungde püpü ching laksahpü yak müla.

³⁴“O Jirusalem, Jirusalem, wukihrübo laksahbe tüsho anihbe kilim yüshihrübo rusahbe! Thunu dretonü ajipjipbo aghidükeang khüp bemukhungkhi nangde inü küdükhüh ki nü tsührübo bemukhungpü künkhea, tüshe nünü mümulongde alakheah!

³⁵Kheahang! Nü yam zhikrangkhündo lah; tüsho atsütsü inü nü ki thachoh, ‘Shepü Atungpuh mung ching arüchonü api müngühmühi’ de nünü müthayi kim khiungde nünü I müngü.”