Read Yimchungru Naga Luk 16 Bible Online

Luk 16 - Yimchungru Naga bible

Luk 16

¹Tüsho apinü ajingyanrübo ki tha: “Khinkihthsürü lakhi alarü mihtsürü khülang lakheah, tüsho ha mihtsürünü anihbuh kukrukbo phinphurukkhi dünkheak mudokhi api ki handarü.

²Jumonü apinü anihbuh jibah tha, ‘Inü nü dünkheak sokhi ha tümü a? Nü khinkihthsükhi khemütsana jihang, tümüde kheaküa nü khinkihthsürü müthsü.’

³Judüki khinkihthsübuhnü aküdah thsüde tha, ‘I küde athsüba? Tümüde I putungpuhnü khinkih thsüpü I kheaknü lude tsochoh. Inü alo mukiukhuk; inü akheangpü achihlah.

⁴Tümü rhimobeanü inü mükheahdo, junangde küyimki I khinkihthsükhi chingnü ayankhitbanü, arünü arü yambo ching I beyukbah.’

⁵Jumonü apinü api putungpuh shozüngrübo anihbuh kilim ji, tüsho akhuhbuh ki tha, ‘Nünü I putungrü ki küdükhüh züngla?’

⁶Tüsho apinü alo, ‘Müdangke qiumuk 100.’ Jumonü apinü anihbuh ki tha, ‘Nü yo khemütsanhüm lubah binang tüsho 50 thrütang.’

⁷Jushu apinü püpürü ki tha, ‘Tüsho nünü küdükhüh züngla?’ Jumonü apinü alo, ‘Wheat hi shungliu-qiuqiu 1000.’ Tüsho apinü tha, ‘Nü yo khemütsan-hüm lubah 800 thrütang.’

⁸Junangde aputungrünü thiyuro mülakhi khinkihthsübuh ju tsülah de tha tümütüsho apinü rük lade rhimo. Tümütüsho ha lomi tsührübo ju arü lün ching ayin tsührübo kheaknü rük labeah.

⁹Inü nüsa ki thachoh, nü thsungkheaknü alomi lakhit ju nü müyamrübo alü thsüpü rhimoang, junangde küyimki ju mülade akambanü, akheam müla lapungbo ching nü beyukbah.

¹⁰“Shepünü anükbe ching thiyuro lanü ahihkhüh ching she thiyuro labah; tüsho shepünü anükbe ching thiyuro mülanü ahihkhüh ching she thiyuro lapü yung.

¹¹Jumonü nünü alomi lakhit ching thiyuro mülakheasho, shepünü nü kilim thiyuro lakhit jihpü?

¹²Tüsho nünü püpürü mihtsürü lakhit ching thiyuro mülakheasho, shepünü nü yo thsüpü jihpü?

¹³Yamlarü shenü she atungrü mahne mütankihkhuk; tümüde apinü khülang thraneanbah tüsho püpü amuzhobah, yungsho apinü khülang ki mulong jihbah tüsho püpü abahyukbah. Nüsanü Thrünpuh tüsho lakhit mütankihkhuk.”

¹⁴Kheakü sho muzhorü Pharisirübonü she harü alala so, tüsho arünü api kheah-a münejih.

¹⁵Tüsho apinü arü ki tha, “Nüsa ju nüsa küdah thsüde mihtsürübo miki alim thsürübo ah, tüshe Thrünpuhnü nüsa mulongbo mükheahlah. Tümütüsho küpü mihtsürü bolung amo-achak lanü Thrünpuh miki athraneanbe lah.

¹⁶“Yakzan tüsho wukihrübo ju Johan khiungde alakheah. Ju kim chingnü Thrünpuh kiulongthsü thsangyuthsangrade arüdo, tüsho mihtsürü abannü ju ching yüzahpü nanachihchoh.

¹⁷Yakzan yo thiyumük khülang yihkhita bahpü kheaknü a thüning le alomi dükheakpü athülihbe ah.

¹⁸“Shepünü niuberü bahbah püpürü luchonü müzammüram yihbeakchoh; tüsho shepünü anihbuhnü abahkhi lubanü müzammüram yihbeakchoh.

¹⁹“Alarü mihtsürü khülang mürümmuchu khim tüsho atsüdak khimzhingzhing phuyubah nimung aban müthangmüsün ching lakheah.

²⁰Kheangtsührü khülang amung Lazar, mübonü lüpchimbah api chipiripit ki lakheah,

²¹tüsho alarü mihtsürü dükhüm kheaknü ayokhikhi tsühnede lüm. Khihnubonü she arübah amübo kheak müleak.

²²Kheangtsührü ju sheabah tüsho yunirübonü Abraham khüh ching bede yü. Alarü mihtsürü ju she shea kiuyukabah.

²³Thsümüchipung ching apinü zünga kheah tüsho limshu ching Abraham ju akhüh ching Lazar lade ngü.

²⁴Judüki apinü jide tha, ‘Abuh Abraham, I ki muzhoang, tüsho Lazar thiyibah api yingkhing ke ching athsobah I mulo rüngshang; tümüde I ha motru ching rungsahde lah.’

²⁵Tüshe Abrahamnü alo, ‘I tsah-a, nü rhangdung atsü ngüdo tüsho Lazar amütsü ngüdo de lümkhitang, tüshe kheakü ha ching sühakhimde lah tüsho nü a thsümüchi ching lah.

²⁶Tüsho ha alala kheak khiode, isa le nüsa dükeak asük ato lah, junangde ha chingnü nüsa kilim hode ayüpü künrünü mukuk yungsho ju chingnü isa kilim marükhuk.’

²⁷Judüki apinü tha, ‘Abuh, jumonü api I buh yamkhün kilim yüshang de inü nü ki mushuchoh,

²⁸tümüde I keoniorü 5 lah, junangde apinü arü ki thiyumütsan thsübah, jude yungsho arü she ha thsümüchi dangpung ching arübah.’

²⁹Abrahamnü api ki tha, ‘Arübo Mosa tüsho wukihrübo lah; arübonü arü yu anishang.’

³⁰Tüsho apinü tha, ‘Yung, abuh Abraham; tümüde khürü ashekhi chingnü arü kilim yüsho arünü mulong müthribah.’

³¹Tüshe apinü anihbuh ki tha, ‘Arünü Mosa tüsho wukihrübo yu manisho, ashekhi chingnü khürü arhang kamlolo she arünü mükinde alabah.’ ”