Read Yimchungru Naga Luk 2 Bible Online

Luk 2 - Yimchungru Naga bible

Luk 2

¹Judüki nimungbo ching alomiküp alala mung thrütpü Kaesar Augusta kilimnü thiyuzüng khülang yüshih.

²Ha Siria kovünor Kurini lachoki akhuhbe mung thrütkhi lakheah.

³Tüsho alalanü mung thrütpü nihbuh kiuto ching yü.

⁴Tüsho Josep she Galilee ching lakhi Nazareth kiuto chingnü, Judea ching Bethlehem de ajikhi David kiuto ching yü, tümütüsho api David yamkhün chingnü alakheah.

⁵Ju ching apinü mung thrütpü aniube thsüpü keoa mübünkeangde alakhi Mari bebah yü.

⁶Küyimki ane ju ching lakheanü, khungarü ngüpü kim khiungde arü,

⁷tüsho alibenü nihbe tsührü akhuhbe zübe. Alibenü api ju khim chingnü hinga hi-müjakpung ching yapshih, tümütüsho arü binpü hanyam ching khiungshak mülade alakheah.

⁸Tüsho ju lomi ching namfimihnu neakrübo azhing ching arü mihnu neakde alakheah.

⁹Atungpuh yunirü khülang arü ki akhiuk, tüsho Atungpuh müretahkhinü arü mükamde tah, tüsho arü trede kam.

¹⁰Yunirünü arü ki tha, “Dütre; tümüde kheahang, inü mihtsürü alala thsungkheak asühpü ato thiyusheak atsü hande arüchoh;

¹¹tümüde khihni nüsa kilim David kiuto ching akhümkhitrü, Atungpuh Khrista zübea lah.

¹²Tüsho nüsa thsungkheak ha amütsan khülang labah: khungarü khülang ahingbekhimnü hingbah hi-müjakpung ching yapde nüsanü angübah.”

¹³Tüsho zukleangnü yinmirü boto yunirü lung Thrünpuh shide tüsho thade akhiuk:

¹⁴“Achangbe ching Thrünpuh müretahshang, tüshe shepü kheak apinü mulong keamchonü alomi ching mihtsürü bolung mungtsü lashang!”

¹⁵Küyimki yunirübo arü kheaknü yinmi lim tsoabahkhea, namfimihnu neakrübo khülangnü khülang ki thaachih, “Isanü Bethlehem lim yüanü tüsho Atungpuhnü isa ki mükheahshihkhi dünjia lanahnü kheahanü.”

¹⁶Arünü niokheamde yü tüsho Mari le Josep tüsho khungarü hi-müjakpung ching yapde ngü.

¹⁷Küyimki arünü angükheanü ha khungarü dünkheak arü ki thakhi arünü thari;

¹⁸tüsho namfimihnu neakrübonü arü ki thakhi sorü alalanü ju dünkheak müyinsah.

¹⁹Tüshe Marinü harü alala anihbe mulong ching lümakheahde la.

²⁰Tüsho namfimihnu neakrübonü arü ki thakhi nangde arünü alala so tüsho ngübah Thrünpuh müretahde tüsho shijihde alode arü.

²¹Tüsho nimung tizheahpü ching, küyimki api tsütabahkhea, nuyam ching mülayide yunirünü ajihkhi api mung Jisu de ji.

²²Tüsho Mosa yakzan yande küyimki arü tsangkhitpü kim khiungkhea, arünü api Atungpuh miki jihpü Jirusalem lim bede wutu

²³(ha Atungpuh yakzan ching thrüta lakheah, “Adüjirü athrürü aban Atungpuh kilim amüsüh labah”)

²⁴tüsho Atungpuh yakzan ching thrüta lakhi nangde shuhmülanga kingaünpü ju, “Guduru 2 yungsho müthrithrümpü nunu 2.”

²⁵Judüki Jirusalem ching mihtsürü khülang amung Simeon lakheah, tüsho ha mihtsürü thiyuro-lungki tüsho shuhmülanga jihrü Israel khümkhitkhi kheahde, tüsho api kheak Amüsüh Me lakheah.

²⁶Junangde apinü Atungpuhnü alokhikhi Messia arükhi müngüyikia ashepü müngü de Amüsüh Menü api ki akhiuka huh.

²⁷Tüsho Menü qiude apinü arüngyam ching arü; tüsho küyimki api thsungkheak yakzan yande arhimopü bebuhrünü khungarü Jisu bede yüzahkhea,

²⁸apinü akhah ching api shuh-a lu tüsho Thrünpuh shide tha,

²⁹“Atungpuh, kheakü nü yu yande nü yamlarü mungtsü chingnü chamachihshang;

³⁰tümüde I müknü nü akhümkhit ngüdo;

³¹küpü nünü mihtsürü alala miki thsakhamkhea,

³²khiungkerü ki akhiuka huhpü ayin khülang, tüsho nü mihtsürü Israel müretah thsungkheak.”

³³Tüsho api dünkheak thakhi ching abuh le abe bünenü müyinsah;

³⁴Simeonnü arü müngühjih tüsho abe Mari ki tha, “Khungarü ha Israel ching ahihkhüh thsümünimpü tüsho khümkhitpü Thrünpuhnü amokhitkhi lah, tüsho azhihde athapü amütsan khülang labah,

³⁵junangde ahihkhüh rama lakhi lümkhi akhiuka huhbah. Tüsho nukshang ayuk nangde mulong rozhaknü nü mulong thsümünimbah.”

³⁶Tüsho Asher trük chingnü Phanuel tsührü wukihrü liberü khülang Anna khide shina lakheah; alibe yamkhün thsübah aniubuh lung kam thüne lakheah,

³⁷tüsho anihbe kam 84 khiungde khimode la. Alibenü küyimkishe arüngyam bahbah mutso tüshe azhing ayin kingaünde, khümkeakde tüsho tamkhüntamnüde alakheah.

³⁸Tüsho ju kim ching atubah alibenü Thrünpuh ki makshe jih, tüsho Jirusalem rhokhitpü kheahde alarü alala ki api dünkheak asuk.

³⁹Tüsho küyimki arünü Atungpuh yakzan yande lüpdükhi rhimokhea, arünü Galilee ching, arü kiuto Nazareth lim alodarü.

⁴⁰Tüsho khungarü ju zode sühmüh lade, lümlungnü mide kam; tüsho Thrünpuh mihmüthsüm api kheak lakheah.

⁴¹Kheakü api bebuhrünü phungho-thünio ching kam aban Jirusalem ching yüde alakheah.

⁴²Tüsho küyimki api kam 12 lakhea, arünü jipü-yakli yande wutu;

⁴³küyimki thünio akheam thsükhea, arü alode arüchoki, azübuh Jisu a Jirusalem ching tukloa la. Api bebuhrünü ju mümükheah,

⁴⁴tüshe arü nimungroro hantsahde alachoki boto bolung belah de lüm, tüsho arünü keoniorü tüsho müyamrü bolung yim;

⁴⁵tüsho küyimki arünü api müngükheanü Jirusalem lim api yimde alode yü.

⁴⁶Nimung mahsam dunglim arünü api ju thsangyurü bolung binde, arü ki anide tüsho keokhide arüngyam ching ngü;

⁴⁷tüsho api anikhitkhi tüsho alokhi sorü alalanü müyinsah.

⁴⁸Tüsho arünü api ngüchoki müyinsah; tüsho abenü api ki tha, “I tsah-a, tümüde nünü isa ki hade arhimokhea? Kheahang, nü buh tüsho I mulong sansande nü yimde alakheah.”

⁴⁹Tüsho apinü arü ki tha, “Küde thsah nüsanü I yimkhea? I ju I Buh yam ching labah de nüsanü mümükheahkhea de?”

⁵⁰Tüsho apinü arü ki thakhi arünü manikhit.

⁵¹Tüsho apinü arü lung Nazareth lim alode yü, tüsho arü ki mihyuanide alakheah; tüsho abenü harü alala mulong ching zo.

⁵²Tüsho Jisu ju lümlung ching tüsho trungdung, Thrünpuh tüsho mihtsürü amuzho ngükhi ching zokihde yü.