Read Yimchungru Naga Luk 21 Bible Online

Luk 21 - Yimchungru Naga bible

Luk 21

¹Judüki apinü abinkih-a kheah, tüsho alarünü arü thsambahbo arüngyam rahpung ching yukde ngü,

²tüsho kheaküshe apinü khimoberü khülangnü shonak anini 2 yukde ngü.

³Jumonü apinü tha, “Atsütsü inü nüsa ki thachoh, khimoberü hanü püpürü alala kheaknü alü yukdo.

⁴Harü mihtsürü alalanü arü lakhit chingnü arü thsambahbo jihdo; tüshe alibe a nihbe zhochihkhi ching anihbe rhangdung lapü lakhi alala jihdo.”

⁵Api jingyanrü khürünü akheahakham lungbo tüsho Thrünpuh kilim müsühkhitkhi thsambahbonü arüngyam thsükhi dünkheak thade alakheah. Tüshe Jisunü tha,

⁶“Nüsanü ha ching kheahde alakhi, lung khülang she maningpü kim arübah; jurü alala keamabahbah.”

⁷Tüsho arünü api ki keokhi, “Thsangyurü, harü küyimki dünjiba? Tüsho adünjipü thsüchoki amütsan tümü laba?”

⁸Tüsho apinü tha: “Nüsa mümülapyukpü kümkangang. Tümüde ahihkhüh I mung chingnü thade arübah, ‘I api ah,’ tüsho, ‘Kim thünindo.’ Jumonü arü dunglim düyü.

⁹Tüshe küyimki nüsanü thirithsü tüsho alanaji sobanü dümüyinsah; tümüde harü akhuh dünjibah, tüshe akheam a nahde marü.”

¹⁰Apinü arü ki tha, “Trükshihnü trükshih, kiulongthsünü kiulongthsü azhihde awusubah.

¹¹Dangpung dangpung ching muliuyuk züngkhi ato tüsho khümzung le arümbo labah; tüsho thüning chingnü atrebe tüsho amütsan ato labah.

¹²Tüshe harü alala müngüh, arünü nüsa kheak arü khah chungde thsümüchibah, arünü nüsabo sinagogbo tüsho rihyambo ching rama jihbah, tüsho nüsa ju I mung dünkheaknü kiulongthsürübo le kovünorbo miki bede arübah.

¹³Tüshe ju nüsa thsungkheaknü thiyumütsan thsüpü kim labah.

¹⁴Jumonü tümü alobaki de nüsa mulong ching dülümjung;

¹⁵tümüde nüsa azhihrü alalanü mazhihkhukpü yungsho müdanglokhukpü thsüde inü nüsa kilim thiyu tüsho lümlungbo jihbah.

¹⁶Nüsabo ju bebuhrü le keoniorü, betsührü tüsho müyamrübonü she mülapyukbah; tüsho arünü nüsa khürü a asheshihbah.

¹⁷Tüsho I mung dünkheaknü alalanü nüsa thraneanbah.

¹⁸Tüshe nüsa kuyü khülang she müdükheak.

¹⁹Düküngde azhipkhi ching nüsa rhangdung alü thsübah.

²⁰“Tüshe küyimki Jirusalem ju bonungrünü zündoa nüsanü angübanü athsümünim thünindo de mükheahang.

²¹Judüki Judea ching larü müzüngbo ching yüshang, kiuto ching larü wukhiukang, tüsho mükeak ching larübo kiuto ching düyüzahshih.

²²Tümüde harü ju royimkhi nimungbo lah, junangde thrüta lakhi alala dünjibah.

²³Tüshe jurü nimungbo ching mübünkeangde alarü tüsho khungarü niuh duhde alarübo are! Tümüde lomi ching lümthsünü ato tüsho ha mihtsürübo kheak bukakhiukkhi labah.

²⁴Arübo nukshangnü akeambah, tüsho trükshih alala ching ramde ayübah, tüsho khiungkerü kimbo müdünjiyikia Jirusalem ju khiungkerünü ajungbah.

²⁵“Tüsho judüki ani ching, khinu ching tüsho chiningbo ching amütsanbo labah; alomi kheak trükshih lümthsünü, tüsho keto ahukde abukkhinü ayingyingkhi labah;

²⁶alomiküp ching arüpü mütsankhinü mihtsürübo sheshibah, tümüde thüning ching chiningbo niukbah.

²⁷Judüki arünü Mihtsürü Tsührü wu tüsho müretah ato lade amo ching arükhi ngübah.

²⁸Küyimki harü dünjipü tankihbanü abinkih-a kheahang tüsho nüsa ku dukoang, tümütüsho nüsa akhümkhit thüninde arüchoh.”

²⁹Tüsho apinü arü ki shihdanglimyu khülang tha: “Khubasodung, tüsho sangdungbo alala kheak kheahang.

³⁰Küyimki ayübo chinde arübanü, nüsanü kheahchoh tüsho kheakü muzhu thünindo de mükheahchoh.

³¹Junangde nüsanü küyimki harü dünjikhi ngübanü, Thrünpuh kiulongthsü thüninde lah de mükheahang.

³²Atsütsü inü nüsa ki thachoh, harü alala müdünjiyikia ha lün hode mutso.

³³Thüning tüsho alomi hode atsobah, tüshe I yubo küyimkishe hode mutso.

³⁴“Tüshe nüsa kurhangang, jude yungsho aniojikhi, müshangmuru, ha rhangdung mulong sansannü nüsa mulong mülangrüpdo alabah, tüsho ju nimung nüsa phuhpü müthsübitde arübah.

³⁵Tümüde alomi ching larü alala kheak ju azheang khülang nangde arübah.

³⁶Jumonü kamruhroro kurhangang tüsho tamkhüntamnüang, junangde harü alala dünjichoki nünü atsokhitkhukbah tüsho Mihtsürü Tsührü miki zhipkhukbah.”

³⁷Animung kim ching apinü arüngyam ching thsangyu, tüshe azhing ching a wukhiukbah Oliv Müzüng ching yap,

³⁸tüsho yapsu mükikde mihtsürü alalanü arüngyam ching api yu anipü api kilim arü.