Read Yimchungru Naga Luk 3 Bible Online

Luk 3 - Yimchungru Naga bible

Luk 3

¹Tiberia Kaesar kiulongthsükhi kam thürükheak phüngüpü ching, Pontia Pilat Judea kovünor, Herod Galilee yakzanshuhrü, tüsho aniurü Philip Iturea le Trakonita yakzanshuhrü, tüsho Lysania Abilene yakzanshuhrü,

²achangbe amükeamrü Anna tüsho Kaifa lachoki, sunglo ching Thrünpuh yu Zakaria tsührü Johan kilim arü;

³tüsho apinü neak bahpü mulong müthride baptipü thsangyuthsangrade Jordan lomi alala ching yü.

⁴Isaia wukihrü yubo hüm ching ha thrüta lah, “Sunglo ching zhikhi düsheak khülang: ‘Atungpuh limro thsakhamjang, api tsahpungbo mukhiungarihdo thsüjang.

⁵Jindükhün aban adangmibah, müzüng tüsho awung aban arihde akambah. Akhürang limrobo mukhiungarihdo akambah, dükukthuruk limrobo shahshah akambah.

⁶Tüsho mihtsürü alalanü Thrünpuh akhümkhit ngübah.’ ”

⁷Johannü apinü baptishihpü arürü botobo ki tha, “Nüsa phuruto tsührübo! Bukakhiuk arüpü lakhi chingnü shepünü nüsa müzüna tsoshihkhea?

⁸Mulong müthrikhi ayede aso asoang, tüsho nüsa küdah thsüde, ‘Isa abuh Abraham lah’ de athapü dütankih; tümüde inü nüsa ki thachoh, Thrünpuhnü harü lungbo chingnü Abraham tsührübo asürüshihpü kuklah.

⁹Kheakü ha she sangying aban kheak awü dünkih-a lah; jumonü aso masokhi sangdung aban kiushakbah tüsho mo ching yukbah.”

¹⁰Tüsho botonü api ki keokhi, “Dale tüsho isanü tümü rhimoba?”

¹¹Tüsho apinü arü ki alo, “Shepü pangkhümpü mahne lanü, apinü amülabuh kilim jihshang; tüsho shepü tsühyungbe lanü apinü she jude thsüshang.”

¹²Ruk-threrübo she baptipü arü, tüsho api ki keokhi, “Thsangyurü, isanü tümü rhimoba?”

¹³Tüsho apinü arü ki tha, “Nüsa yihnüpü kheak hode düthrelo.”

¹⁴Bonungrübonü she api ki keokhi, “Tüsho isanü tümü rhimoba?” Tüsho apinü arü ki tha, “Athsümünimrü yungsho arükchih mudode she sho she düjangkhijangra, tüsho nüsa mihkhah dün ngükhinü reangkeamang.”

¹⁵Mihtsürübonü mükkin thsüde tüsho api ju Khrista a shi yung de Johan dünkheak arü mulong ching keokhide alakhinü,

¹⁶Johannü arü alala ki alo, “Inü nüsa kenü baptijihchoh; tüshe I kheaknü atobe, ajingkhümpü zhi she inü atrünjihpü müthülünkhi arümuroh; apinü Amüsüh Me tüsho monü nüsa baptijihbah.

¹⁷Api rhimopung müsühabahpü, tüsho api jakam ching wheat hi hanmukhungpü akhah ching phürü shuhlah, tüshe atsütbo a apinü amümütbe monü atakbah.”

¹⁸Junangde atuthsukyu ahihdo lungnü apinü mihtsürübo ki thiyusheak atsübo thsangyuthsangra.

¹⁹Tüshe aniurü Philip niube Herodia, tüsho amütsü rhimo alala apinü arhimokhi dünkheak anihbuhnü athürühkhi Herod yakzanshuhbuhnü,

²⁰harü alala zünrubah Johan rihyam ching zo.

²¹Kheakü küyimki mihtsürü alala, tüsho Jisu she baptibah tamkhüntamnüde alakhea, thüning khimshuh-a lakheah,

²²tüsho müthrithrümpü nangde Amüsüh Me api kheak aki, tüsho yinmi chingnü düsheak khülang arü, “Nü inü amuzhodakkhi tsührü; nü kheak inü tsüde mulong keamchoh.”

²³Küyimki api thsangyuthsangrapü tankihkhea, Jisu kam 30 azorü lakheah. Mihtsürübonü alümkhi nangde api ju Heli tsührü Josep tsührü lakheah,

²⁴Matthat tsührü, Levi tsührü, Melki tsührü, Jannai tsührü, Josep tsührü,

²⁵Mattathia tsührü, Amos tsührü, Nahum tsührü, Esli tsührü, Naggai tsührü,

²⁶Maath tsührü, Mattathia tsührü, Semein tsührü, Josek tsührü, Joda tsührü,

²⁷Joanan tsührü, Rhesa tsührü Zerubbabel tsührü, Shealtiel tsührü, Neri tsührü,

²⁸Melki tsührü, Addi tsührü, Kosam tsührü, Elmadam tsührü, Er tsührü,

²⁹Jihusua tsührü, Eliezer tsührü, Jorim tsührü, Matthat tsührü, Levi tsührü,

³⁰Simeon tsührü, Juda tsührü, Josep tsührü, Jonam tsührü, Eliakim tsührü,

³¹Melea tsührü, Menna tsührü, Mattatha tsührü, Nathan tsührü, David tsührü,

³²Jesse tsührü, Obed tsührü, Boaz tsührü, Salamon tsührü, Nashon tsührü,

³³Amminadab tsührü, Admin tsührü, Arni tsührü, Hezron tsührü, Perez tsührü, Juda tsührü,

³⁴Jakob tsührü, Isak tsührü, Abraham tsührü Tera tsührü, Nahor tsührü,

³⁵Serug tsührü, Reu tsührü, Peleg tsührü, Eber tsührü, Shela tsührü,

³⁶Kainan tsührü, Arphaxad tsührü, Shem tsührü, Noa tsührü, Lamek tsührü,

³⁷Methusela tsührü, Enok tsührü, Jared tsührü, Mahalalel tsührü, Kenan tsührü,

³⁸Enosh tsührü, Seth tsührü, Adam tsührü, Thrünpuh tsührü.